Ин 14 - У Сугынь

14 ГЛАВА 1-14 Ача деке корно. 15-31 Иисус Святой Шӱлышым пуаш сӧра.

¹ «Тек тендан шӱмда ок тургыжлане. Юмылан ӱшаныза да Мылам ӱшаныза.

² Ачамын пӧртыштыжӧ илыме вер шуко уло. Тыге огыл гын, Мый тыланда ”Верым ямдылаш каем” манын каласем ыле.

³ Мый каем да тыланда верым ямдылем, а вара, кушто Мый улам, теат тушто лийза манын, Мый мӧҥгеш пӧртылам да тендам Шке декем налам.

⁴ А кушко Мый каем, те паледа, корнымат паледа».

⁵ Фома каласен: «Господь, Тый кушко кает, ме огына пале. Кузе ме корным пален кертына?»

⁶ Иисус вашештен: «Мый корно, чын да илыш улам. Мыйын гоч огыл гын, Ача деке иктат миен огеш керт.

⁷ Те Мыйым паледа ыле гын, Ачамат паледа ыле. Тиде жап гыч те Тудым паледа, Тудым ужында».

⁸ Филипп ойлен: «Господь, мыланна Ачам ончыкто, тиде мыланна сита».

⁹ Иисус тудлан каласен: «Мый тынар жап тендан дене улам, а тый, Филипп, Мыйым от пале? Кӧ Мыйым ужын, тудо Ачам ужын. Кузе тый ”Мыланна Ачам ончыкто” манын ойлет?

¹⁰ Мый Ача дене, а Ача Мый денем ушнен шогымылан от ӱшане? Мом Мый тыланда ойлем, Шке гыч огыл ойлем: Мый денем ушнен шогышо Ача шке пашажым ышта.

¹¹ Мыланем ӱшаныза: Мый Ача дене ушнен шогем, Ача Мый денем ушнен шога. А Мыйын шомакемлан огыда ӱшане гын, ыштыме пашамлан кӧра Мыланем ӱшаныза.

¹² Чынак, чынак тыланда ойлем: мом Мый ыштем, Мылам ӱшанышат тудымак ышташ тӱҥалеш да тиддеч кугуракымат ышташ тӱҥалеш, вет Мый Ачам деке каем.

¹³ Мыйын лӱм дене Ача деч мом йодыда гын, Мый чылажымат шуктем, да тидын дене Ачан чапше Эргыж гоч коеш.

¹⁴ Мыйын лӱмем дене иктаж-мом йодыда гын, Мый тудым ыштем.

¹⁵ Те Мыйым йӧратеда гын, Мыйын кӱштымем шуктыза.

¹⁶ Мый Ача деч сӧрвален йодам, да Тудо тыланда вес Йывыртыктышым пуа, Тудыжо тендан дене пырля курымеш лиеш.

¹⁷ Тиде – Чынын Шӱлышыжӧ, тӱня Тудым налын ок керт, вет Тудым ок уж да ок пале. Но те Тудым паледа: Тудыжо тендан дене кодеш да тендан дене ушнен шога.

¹⁸ Мый тендам тулыкеш ом кодо, тендан деке толам.

¹⁹ Эше икмыняр жап, да тӱня Мыйым ок уж, а те Мыйым ужыда: Мый илем, да теат илаш тӱҥалыда.

²⁰ Тудо кечын те умыледа: Мый Ачам дене ушнен шогем, те Мый денем ушнен шогеда, а Мый тендан дене ушнен шогем.

²¹ Мыйын кӱштымаш-влакем кӧн уло да нуным кӧ шукта, тудо Мыйым йӧрата. А кӧ Мыйым йӧрата, Ачам тудым йӧраташ тӱҥалеш, Мыят тудым йӧратем да тудлан Шкемым палдарем».

²² Искариот огыл Иуда ойлен: «Господь, тиде кузе? Молан Тый Шкендым мыланна палдарынет, а тӱнялан огыл?»

²³ Иисус вашештен: «Кӧ Мыйым йӧрата, тудо Мыйын шомакем шукта. Ачам тудым йӧраташ тӱҥалеш, Ме тудын деке миена, тушто Шкаланна илыме верым ыштена.

²⁴ Кӧ Мыйым ок йӧрате, шомакем ок шукто. А колыштмо шомакда Мыйын огыл, а Мыйым колтышо Ачан.

²⁵ Тидым Мый тыланда тендан дене лиймем годым ойленам.

²⁶ А Ача Мыйын лӱмем дене Йывыртыктышым, Святой Шӱлышым, колта. Тудыжо тендам чылалан туныкта да, мом Мый ойленам, тыланда чылажымат ушештара.

²⁷ Тыланда тыныслыкым кодем, Шкемын тыныслыкем тыланда пуэм; тӱня пуымо семын огыл Мый пуэм. Тек тендан шӱмда ок пудыране да ок лӱд.

²⁸ Мый каем, но тендан деке угыч толам манын, ойлымем те колда. Те Мыйым йӧратеда гын, ”Ача деке каем” каласымемлан куанеда ыле, вет Ачам Мый дечем кугу.

²⁹ Тыге лийме деч вара те ӱшаныза манын, Мый тидын нерген ончылгоч ойленам.

³⁰ Тылеч вара Мый тендан дене шуко мутланаш ом тӱҥал: тиде тӱнян тӧраже ынде лишемеш. Мыйын ӱмбалне тудын нимогай властьше уке.

³¹ Но тӱня палыже: Мый Ачам йӧратем да кузе Тудо Мылам кӱштен, туге ыштем. Кынелза, тышеч каена».