Ин 13 - У Сугынь

13 ГЛАВА 1-20 Иисус тунемшыж-влакын йолыштым мушкеш. 21-30 Иисус Тудым кӧ ужалыме нерген ойла. 31-35 У кӱштымаш. 36-38 Петрын кораҥмыжым ончык ужын ойлымаш.

¹ Кугече пайрем деч ончыч Иисус, Шкаланже тиде тӱня гыч Ача деке куснымо жап шумым паленат, тиде тӱняште лийше йӧратыме еҥже-влаклан мучаш марте йӧратымашым ончыктен.

² Кас кочкыш жап шумеке, Иисусым ужалаш шонымым Искариот манме Симонын Иуда эргыжын шӱмышкыжӧ диавол пыштен шуктен улмаш.

³ Иисус пален: Ача Тудын кидыш чылажымат пуэн, Тудо Юмо дечын толын да ынде Юмо декак кая.

⁴ Сандене ӱстелтӧр гыч кынелын, ӱмбал вургемжым кудашын да шӱргышовычым ӱшталын.

⁵ Вара атыш вӱдым пыштен, тунемшыж-влакын йолыштым мушкаш да ӱшталме шӱргышовычшо дене ӱшташ тӱҥалын.

⁶ Симон-Петр деке Тудо миен. Тудыжо ойлен: «Господь, Тый мыйын йолем мушнет мо?»

⁷ Иисус вашештен: «Мом Мый ыштем, тый эше от умыло, но вара умылет».

⁸ Петр ойлен: «Тый мыйын йолем курымеш от муш!» Иисус вашештен: «Тыйым ом муш гын, Мый денем тыйын ужашет ок лий».

⁹ Симон-Петр каласен: «Господь, йолем веле огыл, кидемат, вуемат муш!»

¹⁰ Иисус каласен: «Мушкылтшо еҥ тӱрыснек яндар, тудлан йол деч молым мушмо ок кӱл. Те яндар улыда, но чылан огыл».

¹¹ Кӧ Тудым ужала, Иисус пален, сандене «Те чылан огыл яндар улыда» манын каласен.

¹² Нунын йолыштым мушмеке, Иисус ӱмбал вургемжым чиен, ӱстелтӧрыш пӧртылын да каласен: «Мом Мый тыланда ыштышым, те умыледа?

¹³ Те Мыйым Туныктышо да Господь маныда. Чын ойледа, Мый Туныктышо да Господь улам.

¹⁴ Мый, Туныктышо да Господь, тендан йолдам мушкынам гын, тугеже теат икте-весыдан йолдам мушшаш улыда.

¹⁵ Кузе Мый тыланда ыштенам, теат тугак ыштыза манын, Мый тыланда корным ончыктенам.

¹⁶ Чынак, чынак тыланда ойлем: тарзе шке озаж деч кугу огыл да колтымат колтышыж деч кугу огыл.

¹⁷ Ынде тидым паледа. Тыгак ышташ тӱҥалыда гын, пиалан лийыда.

¹⁸ Чыланда нерген ом ойло: Мый ойырен налме еҥем-влакым палем. Но Возымаште каласыме: ”Мый денем пырля киндым кочшо Мыйын ӱмбак йолтаганжым нӧлталын”. Тиде шомак шукталтшаш.

¹⁹ Тыге лиймеке, тиде Мый Улам ӱшаныза манын, Мый кызыт, тыге лийме деч ончыч, тыланда тидым ойлем.

²⁰ Чынак, чынак тыланда ойлем: Мыйын колтымо айдемым кӧ порын вашлиеш, Мыйым порын вашлиеш; а кӧ Мыйым порын вашлиеш, Мыйым Колтышым порын вашлиеш».

²¹ Тидым ойлымеке, Иисусын чонжо моткоч пудыранен. Тудо вик каласен: «Чынак, чынак тыланда ойлем, тендан кокла гыч иктыже Мыйым ужала».

²² Кӧн нерген ойла манын умылыде, тунемшыж-влак икте-весе ӱмбаке онченыт.

²³ Тунемшыж-влак кокла гыч иктыже – кӧм Иисус поснак йӧратен – Иисус деке эн лишне лийын.

²⁴ Кӧн нерген ойла, йодшо манын, Симон-Петр тудлан вуйым савалтен.

²⁵ Иисусын оҥешыже эҥертен, тунемше йодын: «Господь, тидыже кӧ?»

²⁶ Иисус вашештен: «Тушкалтен, кинде катышым кӧлан пуэм, тудо». Иисус кинде катышым тушкалтен да Искариот манме Симонын Иуда эргыжлан пуэн.

²⁷ Иуда кинде катышым налын, да сатана тунамак кӧргышкыжӧ пурен. Иисус Иудалан каласен: «Мом ыштынет, вашкерак ыште».

²⁸ Молан тудлан тидым ойлен, ӱстелтӧрысӧ-влак кокла гыч нигӧ умылен огыл.

²⁹ Окса яшлык Иуда дене улмаш, садлан шкаланышт пайремлан мо кӱлешым налаш але иктаж-мом йорло-влаклан пуэдаш Иисус кӱшта манын, южышт шоненыт.

³⁰ Кинде катышым налмеке, Иуда тунамак лектын каен. Йӱд лийын.

³¹ Иуда лекмеке, Иисус каласен: «Теве ынде Айдеме Эрге чапланен, да Тудын гоч Юмо чапланен.

³² Юмын чапше Айдеме Эргын гоч почылтын гын, Юмат Тудын чапшым Шкенжын гоч ончыкта, да тидым вашке ышта.

³³ Икшыве-влак, тендан дене пырля Мый эше кӱчык жап лиям. Те вара Мыйым кычалаш тӱҥалыда, но мом Мый иудей-влаклан ойленам, кызыт тыландат ойлем: кушко Мый каем, тушко те миен огыда керт.

³⁴ Мый тыланда у кӱштымашым пуэм: икте-весыдам йӧратыза. Кузе Мый тендам йӧратенам, теат тугак икте-весыдам йӧратыза.

³⁵ Тендан коклаште йӧратымаш лиеш гын, Мыйын тунемшем улмыдам чылан палат».

³⁶ Иисус деч Симон-Петр йодын: «Господь, кушко Тый кает?» Иисус вашештен: «Кушко Мый каем, кызыт тый Мыйын почешем миен от керт, но варарак миет».

³⁷ Петр Тудлан ойлен: «Господь, молан мый Тыйын почешет кызыт миен ом керт? Мый Тыйын верч чонемат пыштем».

³⁸ Иисус каласен: «Мыйын верч чонетым пыштет? Чынак, чынак тыланет ойлем: агытан муралтымешке, Мыйым ом пале манын, тый кум гана каласет».