Ин 12 - У Сугынь

12 ГЛАВА 1-8 Иисусын йолжым шӱрымаш. 9-11 Лазарьым пушташ кутырен келшымаш. 12-19 Иисус Иерусалимыш миен шуэш. 20-36 Иисус Шкенжын колышашыж нерген каласкала. 37-43 Иудей-влакын ӱшаныдымышт. 44-50 Иисусын шомакше айдемым титаканыш луктеш.

¹ Иисус Кугече деч куд кече ончыч Вифанийыш, колымаш гыч Тудын ылыжтыме Лазарьын илыме верыш, толын.

² Тушто Иисус лӱмеш кас кочкышым эртареныт. Марфа уна-влакым ончен, а Иисус дене пырля ӱстелтӧрыштӧ улшо-влак коклаште иктыже Лазарь лийын.

³ Тунам Мария пеш шергакан ик кремга яндар нард миром налын, Иисусын йолешыже шӱрен да шке ӱпшӧ дене ӱштын. Уло пӧрт тамле миро пуш дене темын.

⁴ Иисусын тунемшыж-влак кокла гыч иктыже, Искариот манме Симонын Иудаже, – варажым Иисусым ужалыше – каласен:

⁵ «Молан тиде миром кум шӱдӧ динарийлан ужалыме да оксажым йорло-влаклан шеледен пуымо огыл?»

⁶ Йорло-влак верч тургыжланымылан огыл, а тудо вор лийын, садлан тыге ойлен: окса яшлык тудын пеленже улмаш, тушко пыштымым нумалын.

⁷ Иисус каласен: «Тудым ида азапландаре. Тидым тудо Мыйым тойымо кечылан арален коден.

⁸ Йорло-влак эре тендан дене лийыт, а Мый тендан дене эре ом лий».

⁹ Иисус Вифанийыште улмым пален налмеке, шуко иудей тушко толын, но Иисуслан верч гына огыл, а колымаш гыч Тудын ылыжтыме Лазарьымат ужнешт улмаш.

¹⁰ Тыге архиерей-влак Лазарьымат пушташ шонен пыштеныт,

¹¹ вет тудлан лийын шуко иудей нунын деч кораҥын да Иисуслан ӱшанен.

¹² Пайремыш толшо шуко калык вес кечын, Иисус Иерусалимыш толеш манмым колмеке,

¹³ пальме укшым налын, Тудын ваштареш лектын да кычкырен: «Осанна! Господь лӱм дене Толшо Израильын Кугыжаже моктымо!»

¹⁴ Иисус, самырык оселым муын, тудын ӱмбаке шинчын. Возымо семын лийын:

¹⁵ «Сион ӱдыр, ит лӱд! Теве, самырык оселым кушкыжын, тыйын Кугыжат толеш».

¹⁶ Тӱҥалтыште тунемшыж-влак тидым умылен огытыл, но варарак, Иисусын шке чапышкыже нӧлталтмеке, Тудын нерген тыге возымым да Тудын дене тыге ыштымым нуно шарналтеныт.

¹⁷ Иисусын шӱгар гыч Лазарьым ӱжмыжӧ да колымаш гыч ылыжтымыже годым Тудын дене пырля лийше калык мом ужмыж нерген таныклен.

¹⁸ Тыгай палдарыше палым ыштымыж нерген еҥ тӱшка колын улмаш, сандене Тудым вашлияш лектын.

¹⁹ А фарисей-влак шке коклаштышт ойленыт: «Ужыда мо, нимомат ыштен огыда шукто. Уло тӱня Тудын почеш кая».

²⁰ Пайремыш Юмылан кумалаш толшо-влак коклаште икмынярышт эллин лийыныт.

²¹ Нуно Филипп деке миеныт – тудыжо Галилейысе Вифсаида гыч лийын – да тудын деч йодыныт: «Пагалыме, ме Иисусым ужнена».

²² Филипп каен да тидын нерген Андрейлан ойлен, а вара Андрей ден Филипп тидын нерген Иисуслан каласеныт.

²³ Но Иисус вашештен: «Айдеме Эргын чапланыме жапше шуын.

²⁴ Чынак, чынак тыланда ойлем: шыдаҥ пырче мландыш возеш да ок коло гын, тудо шкетын кодеш, а кола гын, шуко шурным пуа.

²⁵ Кӧ шке чонжым йӧрата, тудо чонжым йомдара, а кӧ тиде тӱняште шке чонжым ужмышудымо, тудо чонжым курымашлык илышлан арален кода.

²⁶ Кӧ Мыланем служитла гын, тек Мыйын почешем кая, кушто Мый улам, туштак тарземат лиеш. Кӧ Мылам служитла гын, тудым Ачам пагала.

²⁷ Ынде чонем моткоч тургыжлана. Мом Мый каласен кертам? Ачай, тиде жап деч Мыйым утаре. Уке, Мый тиде шагатланак кӧра толынам.

²⁸ Ачай, шке лӱметын чапшым ончыкто!» Пылпомыш гыч йӱк шоктен: «Мый тудын чапшым ончыктенам да адак ончыктем».

²⁹ Тушто шогышо калык тидым колын да ойлен: «Тиде кӱдырчӧ». А весышт маныныт: «Тудлан Суксо ойлен».

³⁰ Иисус нунылан вашештен: «Тиде йӱк Мылам верч огыл, калыклан верч лийын.

³¹ Кызыт тиде тӱнялан судитлымаш толын, ынде тиде тӱнян тӧраже поктен колтымо лиеш.

³² А кунам Мый мландӱмбач нӧлталме лиям, Мый чылам Шке декем ӱжын налам».

³³ Нине шомакше дене Тудо кузе колышашыжым палдарен.

³⁴ Калык вашештен: «Христос курым-курымеш лиеш манын, ме закон гыч палена. Айдеме Эрге нӧлталме лийшаш манын, кузе Тый ойлет? Тиде Айдеме Эргыже кӧ?»

³⁵ Иисус нунылан каласен: «Эше кӱчык жап волгыдо тендан дене лиеш. Пычкемыш тендам ынже авалте манын, волгыдо годым коштса. Кӧ пычкемыште коштеш, кушко кайымыжым ок пале.

³⁶ Волгыдын икшывыж-влак лияш манын, волгыдо тендан дене улмо годым волгыдылан ӱшаныза». Тидым каласымеке, Иисус нунын шинча ончыч йомын.

³⁷ Еҥ-влак ончылно Иисус палдарыше палым тынар ончыктен гынат, Тудлан ӱшанен огытыл,

³⁸ вет пророк Исаиян шомакше шукталтшаш улмаш. Исаия ойлен: «Господь, мемнан ойлымылан кӧ ӱшанен? Господьын куатше кӧлан почылтын?»

³⁹ Нунын ӱшанен кертдымыштын амалжым Исаия вес вере ойлен:

⁴⁰ «Тудо шинчаштым сокырым ыштен да шӱмыштым кӱш савырен, Садлан шинчашт дене огыт уж, шӱмышт дене огыт умыло. Мыланем нуным паремдаш манын, Мый декем огыт савырне».

⁴¹ Иисусын чапшым ужын, Исаия тыге каласен. Иисус нерген тудо ойлен.

⁴² Туге гынат вуйлатыше-влак кокла гычат Иисуслан шукын ӱшаненыт, но синагог гыч ынышт кораҥде манын, фарисей-влаклан лийын, ӱшанымыштым почын ойлен огытыл.

⁴³ Нуно еҥ ончылно чапланымым Юмо деч налме чап деч утларак акленыт.

⁴⁴ Иисус виян йӱк дене каласен: «Мыланем ӱшаныше Мылам огыл, а Мыйым Колтышылан ӱшана.

⁴⁵ Мыйым ужшо Мыйым Колтышымат ужеш.

⁴⁶ Мый волгыдо улам, Мыланем ӱшаныше кокла гыч иктат пычкемышеш ынже код манын, тиде тӱняшке толынам.

⁴⁷ Кӧ Мыйын шомакем колыштеш, но ок ӱшане, тудым титаканыш ом лук: Мый тӱням титаканыш лукташ огыл, а утараш толынам.

⁴⁸ Кӧ Мыйым шкеж деч кораҥда да шомакем шӱмышкыжӧ ок пыште, тудын титаканыш лукшыжо уло: Мыйын ойлымо шомакем пытартыш кечын тудым титаканыш луктеш.

⁴⁹ Вет Шке гыч огыл ойленам, а мом каласаш да мом ойлаш Мыйым колтышо Ача Мылам кӱштен.

⁵⁰ Мый палем: Тудын кӱштымыжӧ – курымашлык илыш, тыгеже мом ойлем, Ачан Мылам каласымыже семын ойлем».