Ин 11 - У Сугынь

11 ГЛАВА 1-16 Лазарьын колымыжо. 17-37 Лазарьын акаж-влакым Иисус лыпландара. 38-44 Иисус Лазарьым ылыжта. 45-57 Иисус ваштареш мутланен келшымаш.

¹ Лазарь лӱман ик еҥ черле улмаш. Тудо Вифаний гыч, акак-шӱжарак Мария ден Марфа илыме ял гыч, лийын.

² Марияже тудо улмаш, кӧ Господьым миро дене шӱрен да Тудын йолжым ӱпшӧ дене ӱштын. Черланыше Лазарь тудын изаже лийын.

³ Шӱжарже-влак Иисуслан каласаш колтеныт: «Господь, Тый кӧм йӧратет, тудо черле».

⁴ Тидым колмеке, Иисус каласен: «Тиде черланымаш колымашлан огыл, а Юмын чапшылан: тидын гоч Юмын Эргыже чаплана».

⁵ Марфам, тудын шӱжаржым да Лазарьым Иисус йӧратен.

⁶ Лазарьын черланымыж нерген колмеке, тиде вереш эше кок кечылан кодын,

⁷ а вара тунемшыж-влаклан каласен: «Мӧҥгеш Иудейыш каена».

⁸ Тудлан тунемшыж-влак ойленыт: «Равви, иудей-влак кызыт гына ӱмбакет кӱм кышкен пуштнешт ыле, а Тый угыч тушко кает?»

⁹ Иисус нунылан вашештен: «Кече кутыш латкок шагат огыл мо? Кӧ кечывалым коштеш, ок шӱртньӧ: тудо тиде тӱнян волгыдыжым ужеш.

¹⁰ Кӧ йӱдым коштеш, шӱртня: тудын дене волгыдо ок лий».

¹¹ Тыге ойлымеке, Иисус ешарен: «Мемнан Лазарь йолташна мален колтен, но Мый тудым помыжалтараш каем».

¹² Тунемшыж-влак ойленыт: «Господь, мала гын, тугеже тӧрлана».

¹³ Иисус нунылан Лазарь колымо нерген ойлен, но нуно тыглай малыме нерген каласкала шоненыт.

¹⁴ Тунам Иисус вик каласен: «Лазарь колен.

¹⁵ Мый тушто лийын омыл, сандене тендан верч куанем: ынде те ӱшанаш тӱҥалыда. Но ынде тудын деке каена».

¹⁶ Йыгыр манын лӱмдымӧ Фома моло тунемше-влаклан каласен: «Меат каена да Иисус дене пырля колена».

¹⁷ Тушко мийымеке, Лазарь ынде нылымше кече шӱгарыште кийымым Иисус пален налын.

¹⁸ Вифаний Иерусалим воктенак, иктаж латвич стадий нарыште лийын,

¹⁹ да изашт верч ойгырымо деч лыпландараш Марфа ден Мария деке шуко иудей миен улмаш.

²⁰ Иисус толмо нерген колмеке, Марфа Тудым вашлияш лектын. А Мария мӧҥгыштӧ шинчен.

²¹ Марфа Иисуслан каласен: «Господь, Тый тыште лият ыле гын, мыйын изам ок коло ыле!

²² Но мый кызытат палем: Тый мом Юмо деч йодат, Тудо Тылат пуа».

²³ Иисус тудлан ойлен: «Тыйын изат ылыж кынелеш».

²⁴ Марфа вашештен: «Палем, пытартыш кечын ылыж кынелтыме годым ылыжеш».

²⁵ Иисус каласен: «Мый ылыжмаш да илыш улам. Кӧ Мылам ӱшана, тудо кола гынат, илаш тӱҥалеш.

²⁶ А кӧ ила да Мылам ӱшана, нигӧ нигунам ок коло. Тидлан тый ӱшанет?»

²⁷ Марфа ойлен: «Туге, Господь. Тый Христос, Юмын Эрге, Кӧ тӱняшке толшаш, Тудо улат манын ӱшанем».

²⁸ Тыге ойлымеке, Марфа каен, Мария шӱжаржым ӧрдыжкӧ ӱжын да каласен: «Туныктышо тыште, Тудо тыйым ӱжеш».

²⁹ Мария, тидым колын, писын кынелын да Иисус деке каен.

³⁰ Иисус але ялыш пурен огыл, а кушто Тудым Марфа вашлийын, тудо верыштак лийын.

³¹ Мариян писын кынелмыжым да лектын кайымыжым ужмеке, пӧртыштӧ пырля лийше да тудым лыпландарыше иудей-влак почешыже каеныт, тудо шӱгар деке шорташ кая шоненыт.

³² А Мария, Иисус улмо верыш мийымеке, Тудым ужын, йол воктекыже кумык возын да каласен: «Господь, Тый тыште лият ыле гын, изам ок коло ыле!»

³³ Тудын шортмыжым да тудын дене пырля толшо иудей-влакын шортмыштым ужын, Шкеат шӱлыкаҥын да кумылжо тодылалтын.

³⁴ Тудо каласен: «Те Лазарьым кушан пыштенда?» Нуно вашештеныт: «Господь, миен ончал».

³⁵ Иисусын шинчавӱдшӧ лектын.

³⁶ Иудей-влак ойленыт: «Ончыза, кузе тудым йӧратен».

³⁷ А нунын кокла гыч южышт каласеныт: «Тудо сокырын шинчажым почын. Лазарь ынже коло манын, Тудо иктаж-мом ыштен ок керт ыле мо?»

³⁸ Адакат шӱлыкаҥын, Иисус шӱгар деке миен. Шӱгар курык кӧргыштӧ лийын, аҥжым кӱ петырен.

³⁹ Иисус каласен: «Кӱм кораҥдыза». Колышын Марфа шӱжарже Тудлан ойлен: «Господь, ынде ӱпшаш тӱҥалын, колымыжлан нылымше кече».

⁴⁰ Иисус тудлан вашештен: «Ӱшанет гын, Юмын чапшым ужат манын, Мый тыланет ойлен омыл мо?»

⁴¹ Кӱм колышо кийыме шӱгар аҥ деч кораҥденыт. Иисус пылпомышко ончалын да каласен: «Ачай, Мыйым колметлан Тылат тауштем.

⁴² Мыйым эре колат манын палем, но Мыйым Тыйын колтыметлан ӱшанышт манын, йыр шогышо еҥ-влаклан кӧра тыге ойлышым».

⁴³ Тыге каласымеке, виян йӱк дене кычкыралын: «Лазарь, лек!»

⁴⁴ Колышо лектын, кидше да йолжо тойымо вынер дене пӱтырымӧ лийын, шӱргыжӧ шовыч дене вӱдылмӧ. Иисус нунылан каласен: «Тудым рудыза да колтыза».

⁴⁵ Мария деке мийыше да Иисус мом ыштымым ужшо иудей-влак кокла гыч шукынжо Иисуслан ӱшаненыт.

⁴⁶ Но южышт фарисей-влак деке каеныт да Иисус мом ыштыме нерген каласкаленыт.

⁴⁷ Архиерей ден фарисей-влак Синедрионым погеныт да ойленыт: «Мыланна мом ышташ? Тиде Еҥ палдарыше палым шуко ышта.

⁴⁸ Тудым тыгак кодена гын, чылан Тудлан ӱшанаш тӱҥалыт. Тунам римлян-влак толыт да мемнан калыкнамат, святой вернамат пытарат».

⁴⁹ Нунын кокла гыч иктыже, Каиафа, тудо ийысе архиерей, нунылан каласен: «Нимом те огыда пале!

⁵⁰ Уло калык пытымешке, калык верч ик еҥ кола гын, мыланна сайрак лиеш манын огыда умыло».

^51-52 Тиде шкенжын шонымыжо лийын огыл, тиде ийын архиерей лийынат, пророкла ойлен: Иисус калык верч, да тиде калык верч веле огыл, а Юмын шаланен илыше икшывыж-влакымат иктыш ушашлан колышаш.

⁵³ Тиде кече гыч нуно Иисусым пушташ шонен пыштеныт.

⁵⁴ Садлан кӧра иудей-влак коклаште Иисус Шкенжым палдарен коштын огыл. Тушеч ир мланде воктенысе кундемыш, Ефраим лӱман олашке, каен да тушан тунемшыж-влак дене пырля кодын.

⁵⁵ Иудей-влакын Кугечышт лишемын. Эрныме йӱлам пайрем деч ончыч шукташ манын, уло эл гыч шукышт Иерусалимыш каеныт.

⁵⁶ Нуно Иисусым кычалыныт да, храм кундемыште шогышыла, шке коклаштышт ойленыт: «Кузе шонеда? Тудо пайремыш ок тол мо?»

⁵⁷ Архиерей да фарисей-влак кӱштеныт улмаш: Иисусым кучаш манын, Тудын кушто улмыжым кӧ пала, увертарышаш.