Ин 1 - У Сугынь

1 ГЛАВА 1-18 Шомак айдеме лийын. 19-34 Тынеш Пуртышо Иоаннын таныклымыже. 35-42 Эн ончычсо тунемшыж-влак. 43-51 Иисус Филипп ден Нафанаилым ӱжеш.

¹ Тӱҥалтыште Шомак улмаш. Шомак Юмо дене улмаш, да Шомак Юмо улмаш.

² Тӱҥалтыштак Тудо Юмо дене улмаш.

³ Мо ышталтын, чылажат Тудын гоч лийын, Тудын деч посна нимо ышталтын огыл.

⁴ Тудын кӧргыштыжӧ илыш улмаш, а илыш – еҥ-влаклан волгыдо.

⁵ Волгыдо пычкемыште волгалтеш да тудым пычкемыш авалтен огыл.

⁶ Теве Юмо айдемым колтен, тудын лӱмжӧ Иоанн.

⁷ Чылан Волгыдо нерген уверым колышт да ӱшанышт манын, Иоанн Волгыдо нерген таныклаш толын.

⁸ Тудо шкеже Волгыдо лийын огыл, а Волгыдо нерген таныклаш колтымо улмаш.

⁹ Но чын Волгыдо улмаш. Тудо тӱняшке толшо чыла айдемымат волгалтара.

¹⁰ Тӱняште Тудо улмаш, тӱня Тудын гоч ышталтын, но тӱня Тудым пален огыл.

¹¹ Тудо шкенжын-влак деке толын, но шкенжын-влак Тудым порын вашлийын огытыл.

¹² А кӧмыт Тудым порын вашлийыныт да Тудын лӱмжылан ӱшаненыт, нунылан Юмын икшывыже лияш властьым пуэн

¹³ Нуно вӱр деч огыл, кап кумыл деч огыл, пӧръеҥ кумыл деч огыл, а Юмо деч шочыныт.

¹⁴ Шомак капаҥын да мемнан коклаште илен. Ме Тудын чапшым, Ачан Ик Шкет Эргыжын гай чапшым, ужынна. Тудо порылык да чын дене темын улмаш.

¹⁵ Иоанн, Тудын нерген таныклен, виян ойлен: «Мый ойленам: мыйын почеш Толшо мыйын ончылно лие, вет Тудо мый дечем ондак улмаш. Тиде – Тудо».

¹⁶ Тудын тичмашлыкше деч ме чылан порылык ӱмбаке порылыкым налынна.

¹⁷ Закон Моисей гоч пуалтын, а порылык ден чын Иисус Христос гоч толыныт.

¹⁸ Юмым нигӧ нигунам ужын огыл, Ачан кӧргыштӧ улшо Ик Шкет Эрге Тудым палдарен.

¹⁹ Иоаннын таныклымыже теве тыгай. Иудей-влак тудын деч кӧ улат манын йодаш Иерусалим гыч иерей-влакым да Левий тукым еҥ-влакым колтеныт.

²⁰ Тудо, нимом шылтыде, тура ойлен, мый Христос омыл манын увертарен.

²¹ Нуно йодыныт: «Тый вара кӧ улат? Тый Илия улат?» «Уке», – вашештен. «Але саде пророк улат?» «Уке», – каласен тудо.

²² Нуно ойленыт: «Тый кӧ улат? Мемнам колтышо-влаклан вашмутым пуышаш улына. Тый Шкендым кӧлан шотлет?»

²³ Тудо пророк Исаиян мутшо дене вашештен: «Господьлан корным вияшым ыштыза манын, ир мландыште кычкырышын йӱкшӧ улам».

²⁴ А колтымо-влак фарисей кокла гыч лийыныт.

²⁵ Нуно Иоанн деч йодыныт: «Тый Христосат, Илият да саде пророкат отыл гын, молан еҥ-влакым тынеш пуртет?»

²⁶ Иоанн вашештен: «Мый вӱд дене тынеш пуртем, но тендан коклаште Весе уло – те Тудым огыда пале,

²⁷ Тиде Тудо, кӧ мыйын почешем толеш да мый дечем ончылно лиеш, мый Тудын йолчием кылжымат рудаш ом йӧрӧ».

²⁸ Чыла тиде Вифаварыште, Иордан эҥер вес могырышто, лийын. Тушто Иоанн тынеш пуртен.

²⁹ Вес кечынже Иоанн тудын деке толшо Иисусым ужын да ойлен: «Теве Юмын Пачаже, Тудо тӱнян языкшым Шке ӱмбакыже налеш!

³⁰ Мыйын почеш толшо Айдеме мый дечем ондак лийын, сандене Тудо мый дечем ончылно манын, кӧн нерген ойленам, тиде – Тудо.

³¹ Кӧ Тудо, мый шкеат пален омыл, но Израильлан палыме лийже манын, мый вӱд дене тынеш пурташ толынам».

³² Иоанн таныклен ойлен: «Пылпомыш гыч кӧгӧрчен семын Шӱлыш волымым да Тудын дене кодмым мый ужым.

³³ Кӧ Тудо, мый шкеат пален омыл, но мыйым вӱд дене тынеш пурташ Колтышо каласыш: ”Шӱлыш кӧн ӱмбакыже волымым да кӧ дене кодмым ужат, Тудо – Святой Шӱлыш дене тынеш пуртышо”.

³⁴ Мый тидым ужым да таныклем: Тудо – Юмын Эрге».

³⁵ Вес кечын Иоанн угыч туштак шоген, тудын дене пырля кок тунемшыже лийын.

³⁶ Воктене коштшо Иисусым ужмеке, Иоанн ойлен: «Теве Юмын Пачаже!»

³⁷ Тидым колмеке, Иоаннын кок тунемшыже Иисус почеш каеныт.

³⁸ Тудыжо савырнен, почешыже ошкылмыштым ужынат, нунылан ойлен: «Тыланда мо кӱлеш?» Нуно йодыныт: «Равви, кушто Тый илет?» Равви мутшо туныктышо манме лиеш.

³⁹ Тудо ойлен: «Ончалаш толза». Жап лу шагат наре улмаш. Нуно Тудын дене пырля каеныт, кушто илымыжым ужыныт да кас марте Тудын дене лийыныт.

⁴⁰ Иоаннын мутшым колшо да Иисус почеш кайыше кок еҥ гыч иктыже Симон-Петрын Андрей шольыжо лийын.

⁴¹ Тудо эн ондак Симон изажым кычал муын да тудлан каласен: «Ме Мессийым муынна». Мессий мутшо Христос манме лиеш.

⁴² Вара тудым Иисус деке намиен. Иисус тудым ончалын каласен: «Тый Ионан Симон эргыже улат. Тыйым Кифа манын лӱмдаш тӱҥалыт». Тиде лӱмжӧ Петр, вес семынже кӱ манме лиеш.

⁴³ Вес кечын Иисус Галилейыш каяш шонен пыштен. Тудо Филиппым вашлийын да ойлен: «Почешем кае!»

⁴⁴ Филипп Вифсаида гыч улмаш, Петр ден Андреят тиде ола гычак лийыныт.

⁴⁵ Филиппше Нафанаилым вашлийын да тудлан каласен: «Кӧн нерген Моисей законеш возен, да кӧн нерген пророк-влакат сереныт, ме Тудым муынна. Тиде Иисус, Назарет гыч Иосифын эргыже».

⁴⁶ Нафанаил вашештен: «Назарет гыч иктаж-мо сай лийын кертеш мо?» Филипп тудлан ойлен: «Тол да ончо».

⁴⁷ Иисус, Шкеж деке лишемше Нафанаилым ужмеке, тудын нерген каласен: «Теве чынжымак Израиль еҥ, тудын нимогай шоякшат уке».

⁴⁸ Нафанаил йодын: «Мыйым кушеч палет?» Тидлан Иисус вашештен: «Филипп тыйым ӱжмӧ деч ончычак тыйым смоква пушеҥге йымалне ужынам ыле».

⁴⁹ Нафанаил каласен: «Равви, Тый Юмын Эрге улат, Тый Израильын Кугыжаже улат!»

⁵⁰ Иисус тудлан вашештен: «Тыйым смоква пушеҥге йымалне ужынам манын ойлымемлан кӧра ӱшанет? Тылеч кугуракымат ужаш тӱҥалат».

⁵¹ Вара ешарен: «Чынак, чынак тыланда ойлем: тылеч вара почмо пылпомышым да Юмын Суксыж-влакын Айдеме Эрге деке волымым да кӱзымым ужыда».