СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ 6 - У Сугынь

6 ГЛАВА 13-20 Юмын пеҥгыде сӧрымыжӧ.

^1-2 Сандене, Христосын шомакшын тӱҥалтыш шинчымашыжым лончылымым чарнен, тичмаш шинчымашыш шуаш тыршышаш улына. Колымашке наҥгайыше паша деч кораҥме да Юмылан ӱшаныме, тынеш пуртымаш-влак, айдеме ӱмбаке кидым пыштыме йӱлам эртарыме, колышо-влак ылыжме да курымашлык суд нерген туныктымылан угычын негызым пыштышаш огынал.

³ Юмо эрыкым пуа гын, кушкаш тыршена.

^4-6 Вет икана волгыдыш шушым, пылпомыш пӧлекын тамжым пален налшым, Святой Шӱлыш дене ушнен шогышым, Юмын поро шомакшым да шушаш саманын куатшым пален налшым, а вара кораҥшым, угычын языкым касарыктен, Юмо деке савыраш ок лий. Тыгай еҥ шке шӱмыштыжӧ Юмын Эргым пудален сака да Тудым вурса.

⁷ Мланде шке ӱмбакше чӱчкыдын велше йӱрым шупшеш да куштышылан пайдале кушкылым шочыкта гын, тудо Юмо деч суапландарымашым налеш.

⁸ Но мланде иман вондер ден коршаҥгым шочыкта гын, тудо – йӧрдымӧ, тудым каргымаш вуча, мучашыже – йӱлалтымаш.

⁹ Йӧратымына-влак, тыге ойлена гынат, илыш корныда сайрак да утаралтыда манын, ме ӱшанена.

¹⁰ Юмо чын огыл ок лий: святой-влаклан пашам ыштымыда годым ондакат, кызытат ыштыме пашадам да Тудым йӧратен тыршымыдам Тудо ок мондо.

¹¹ Но тендан кокла гыч кажныже, ӱшанен вучымо шукталтмылан пеҥгыдын инанен, мучаш марте тыгаяк тыршымашым ончыктыжо манын, мемнан ужмына шуэш.

¹² Йолагайыш ида савырне, а ӱшаныме да кужун чытыме дене Юмын сӧрымыжым налше-влак гай лийза.

¹³ Юмо деч кугу нигӧ уке, сандене Авраамлан сӧрымашым пуымыж годым Шкеж деч кугуракын лӱмжӧ дене товатлен кертын огыл, а шке Лӱмжӧ дене товатлен

¹⁴ ойлен: «Чынжымак, тыйым суапландаренак суапландарем да шукемденак тукыметым шукемдем».

¹⁵ Тыгеракын, чытен вучымыж дене Авраам сӧрымым налын.

¹⁶ Еҥ-влак шке дечышт кугурак дене товатлат. Товатлымаш ойлымым пеҥгыдемда да кеч-могай торешланымылан мучашым пышта.

¹⁷ Сандене Юмат, Шкенжын эрыкше вашталтдыме улмым сӧрымын наследникше-влаклан чылт раш ончыкташ манын, тудым товатлен пеҥгыдемден.

¹⁸ Нине вашталтдыме кок шомак гоч – тыште Юмо шойыштын кертын огыл – ме, Тудын пелен аралалтмашым мушо-влак, ӱшанен вучымым кучаш чот кумылаҥына.

¹⁹ Тиде ӱшанен вучымаш чонлан якыр гай, ӱшанле да пеҥгыде, тудыжо пӱрдыш вес могырыш шумеш пура.

²⁰ Тушко Иисус, Мелхиседекын иерей радамже дене курымашлык Архиерей лиймекше, ончыч кайыше семын мемнан верч пурен.