СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ 5 - У Сугынь

5 ГЛАВА 11 – 6:12 Ӱшанымаш деч ида кораҥ.

¹ Еҥ-влак кокла гыч ойырен налме кеч-могай архиерейым еҥ-влак верч Юмын ончылно служитлаш шогалтыме, тудыжо пӧлекым да язык верч надырым пуышаш.

² Тудо нимом палыдыме да йоҥылышым ыштылше-влакым чаманен кертеш, вет тудымат вийдымылык темда,

³ сандене тудо калыкын языкше верч пуымо семын шкенжын языкше верчат надырым пуышаш.

⁴ Архиерей лияш чапым нигӧ шкаланже шке ок нал, а Юмо тудым Аароным ӱжмӧ семын ӱжеш.

⁵ Тыге Христосат архиерей чапыш Шкенжым Шке нӧлталын огыл, Тудлан тиде чапым Юмо пуэн да каласен: «Тый Мыйын Эргым улат, таче Мый Тыйым шочыктенам».

⁶ Вес вере тыге ойла: «Мелхиседекын иерей радамже дене Тый курымашлык иерей улат».

⁷ Кап дене илымыж годым Христос шке юмылтымыжым да кумалмыжым Тудым колымаш деч утарен Кертшылан, йӱкын кычкырен, шинчавӱд йӧре, надырлан конден, да мут колыштшо улмыжлан кӧра Тудын кумалмыжым колмо.

⁸ Тудо Эрге гынат, орланымыж гоч мутым колышташ тунемын,

⁹ а тичмашлыкыш шумекше, Тудын мутшым колыштшо кажне еҥлан курымашлык утарымашым кондышо лийын,

¹⁰ да Юмо Тудым Мелхиседекын иерей радамже дене Архиерейлан шогалтен.

¹¹ Тидын нерген мемнан ойлышашна шуко, но умылтараш неле, вет те колышт моштыдымо лийында.

¹² Тиде жап марте те туныктышо лийшаш улыда ыле гынат, тендам Юмын шомакын тӱҥалтыш шинчымашыжлан угычын туныкташ кӱлеш, тыланда шӧр кӱлеш лийын, а пешкыде кочкыш огыл.

¹³ Кӧ але шӧрым кочкеш, чынлан тунем шуын огыл, вет тудо але аза.

¹⁴ Пешкыде кочкыш – кушкын шушо-влаклан. Эре тыршымышт дене нунын уш ден шижмашышт поро ден осалым ойырен мошташ туныктымо улыт.