СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ 4 - У Сугынь

4 ГЛАВА 14 – 5:10 Иисус – эн кугу Архиерей.

¹ Тыгеракын, Юмын ласкалыкышкыже пураш сӧрымаш эше уло гын, тендан кокла гыч нигӧ ӧрдыжеш ынже код манын, шекланышаш улына.

² Вет нунылан каласкалыме семынак тиде сӧрымаш нерген куан уверым мыланнат каласкалыме. Но нуно колмо шомакыштым ӱшаныме дене шӱмышкышт пыштен огытыл, сандене тудо нунылан пайдам конден огыл.

³ Юмын ласкалыкышке ме, ӱшанаш тӱҥалше-влак, пурена. Юмо каласен: «Шыдем дене товатленам: нуно Мыйын ласкалыкышкем огыт пуро». Кеч Тудын пашаже тӱням негызлыме годсекак шуктымо улмаш.

⁴ Вет Возымаште ала-кушто шымше кече нерген тыге каласыме: «Шымше кечын Юмо чыла шке пашаж деч канен».

⁵ А тиде верыште каласыме: «Мыйын ласкалыкышкем огыт пуро».

⁶ Тыгеракын, южыштым тушко пурымаш вуча, а кӧлан ожно куан уверым увертарыме, нуно тушко мут колыштдымыштлан кӧра шуын огытыл.

⁷ Сандене Юмо угычын «тачысе кече» манме кечым палемден. Ондак каласыме шомакым Тудо тынар кужу жап эртымеке Давид гоч ойлен: «Тачысе кечын Тудын йӱкшым колыда гын, шӱмдам ида пешкыдемде».

⁸ Вет Иисус Навин нуным ласкалыкыш конда ыле гын, Юмо варарак вес кече нерген ок ойло ыле.

⁹ Тугеже, Юмын калыкшым шуматкече каныш вуча.

¹⁰ Кузе Юмо шке пашаж деч канен, тугак Юмын ласкалыкышкыже пурышат шке пашаж деч кана.

¹¹ Тыгеракын, нигӧ нунын семын мут колыштдымашке ынже шуҥгалт манын, тиде ласкалыкыш пураш тыршышаш улына.

¹² Вет Юмын шомакше илыше да виян, тудо кок могыран кеч-могай керде дечат пӱсӧ. Шӱлыш ден чон, йыжыҥла ден вем шелалтмешке тудо керылт пура, шӱмын шонкалымыжым да кумылжым лончыла.

¹³ Тӱняште Юмо деч шылтыме нимо уке, Тудын шинча ончылныжо чылажат чара да койшо; Тудын ончылно ме мутым кучышаш улына.

¹⁴ Пылпомыш вошт эртыше пеш кугу Архиерейна, Юмын Эрге Иисусна уло гын, тугеже почын ойлымо ӱшанымынам пеҥгыдын кучышаш улына.

¹⁵ Вет мемнан Архиерейна вийдымылыкнам чаманен кертеш: мемнан семынак Тудым чыла шотыштат тергыме, но языкдыме улмаш.

¹⁶ Тыгеракын, чаманымашым налаш да Юмын порылыкшым кӱлеш жапыште полышлан муаш манын, порылык престол деке лӱдде мийышаш улына.