СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ 3 - У Сугынь

3 ГЛАВА 1-6 Иисус Моисей деч кӱшнӧ шога. 7 – 4:13 Юмын калыклан каныш.

¹ Тыгеракын, святой иза-шольо-влак, пылпомышсо тудо ӱжмашымак налше-влак, мемнан почын ойлымо ӱшанымашын Апостолжо да Архиерейже Иисус Христосым умылен налза.

² Моисей семынак Тудо Шогалтышыжлан ӱшанле лийын, Моисейже Юмын уло пӧртыштыжӧ ӱшанле улмаш,

³ но кузе пӧртым чоҥышын чапше пӧртын чапше деч кугурак, тугак Иисусат Моисейын деч кугу чапым сулен налаш йӧрышӧ.

⁴ Вет кажне пӧртын чоҥышыжо уло, а чылажымат чоҥышыжо – Юмо.

⁵ Моисеят Тудын уло пӧртыштыжӧ служитлыше семын ӱшанле улмаш. Мо нерген Юмо варарак каласышаш улмаш, тидым таныклышаш улмаш.

⁶ Но Христосшо Юмын пӧртыштӧ Эрге семын ӱшанле лийын. А лӱддымылыкнам да мемнам куандарыше ӱшанен вучымашнам мучаш марте пеҥгыдын арален кодена гын веле, Тудын пӧртшӧ ме улына.

⁷ Сандене Святой Шӱлыш ойлымо семын ыштыза: «Тачысе кечын Тудын йӱкшым колыда гын,

⁸ ӧпкелыме годымсыла ир мландыште тергыме кечысыла шӱмдам ида пешкыдемде.

^9-10 Тушто тендан ачада-влак Мыйым тергеныт, да Мыйын ыштымем нылле ий ужыныт. Сандене Мый тиде тукымлан шыдешкенам да каласенам: ”Нуно шӱмышт дене эре йомын коштыт, Мыйын корнем пален налын огытыл”.

¹¹ Сандене шыдем дене товатленам: нуно Мыйын ласкалыкышкем огыт пуро».

¹² Иза-шольо-влак, тендан кокла гыч иктаж-кӧн шӱмжӧ осал да ӱшаныдыме ынже лий да илыше Юмо деч ынже кораҥ манын шекланыза.

¹³ Тендан кокла гыч нигӧ, язык дене ондалалтын, пешкыдемше ынже лий манын, эше «тачысе кечын» маналтме годым икте-весыдам кече еда кумылаҥдыза.

¹⁴ Вет ме тӱҥалтыш ӱшанымашым мучаш марте пеҥгыдын арален кодена гын веле, Христос дене ушнен шогена.

¹⁵ Каласыме: «Тачысе кечын Тудын йӱкшым колыда гын, ӧпкелыме годымсыла шӱмдам ида пешкыдемде».

¹⁶ Колыштшо-влак кокла гыч южышт ӧпкеленыт, но Моисей дене Египет гыч лекше чыла еҥ огыл.

¹⁷ Кӧлан Юмо нылле ий шыдешкен? Языкыш пурышо-влаклан огыл мо? Нуно лулегыштым ир мландеш пыштеныт.

¹⁸ «Мыйын ласкалыкышкем огыт пуро» манын, Юмо кӧлан товатлен? Мутым колыштдымо-влаклан огыл мо?

¹⁹ Тыгеракын, ужына: ӱшанымашышт уке улмылан нуно тушко пурен кертын огытыл.