СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ 2 - У Сугынь

2 ГЛАВА 1-4 Утарымашын кугу улмыжо. 5-18 Юмын Эрге да айдеме тукым.

¹ Ойырлен кораҥаш огыл манын, мом колынна, тудым поснак сайын шотыш налшаш улына.

² Вет Суксо-влак гоч увертарыме шомакат пеҥгыде лийын, да кеч-могай титак, ойым колыштдымаш верч мутым чын кучыктымо.

³ Тугеже, тыгай кугу утарымашым огына шотло гын, кузе ме куржын утлен кертына? Тиде утарымашым эн ондак Господь увертарен, да Господьым колыштшо-влак тудым мыланна пеҥгыдемденыт.

⁴ Тиде утарымаш нерген Юмо Шкежат палдарыше пале да чудо-влак дене, тӱрлӧ куат дене, Святой Шӱлышым шке эрыкше почеш пуэдыме дене таныклен.

⁵ Мемнан ойлымо ончыкылык сандалыкым Юмо Суксо-влакын кидышкышт огыл пуэн.

⁶ Мӧҥгешла, ала-кӧ Возымаште ала-кушто таныклен ойлен: «Мо тугай айдеме? А Тый тудым шарнет. Але айдемын эргыже? А Тый тудын деке порын савырнет.

⁷ Тудым Суксо-влак деч изиш веле ӱлыкрак волтенат. Тый тудым чап да пагалымаш дене леведынат, кидет дене ыштыметын озажлан шогалтенат,

⁸ тудын йол йымакыже чыла пыштенат». Айдемын кидышкыже чыла пуымыж годым тудын кид йымакыже пуыде нимом коден огыл. А тудын кид йымакыже чыла пуымым ме кызыт але огына уж.

⁹ Но Суксо-влак деч изиш ӱлыкрак Волтымым, Иисусым, ме ынде колымашым чытымыжлан кӧра чап да пагалымаш дене леведмым ужына, вет Юмын порылыкшо дене Тудо чыла еҥ верч колышаш улмаш.

¹⁰ Шуко эргым чапыш кондаш манын, Юмылан – чылажат Тудлан да Тудын гоч – нуным утарымашке Наҥгайшым орланымаш гоч тичмашлыкыш шукташ кӱлын.

¹¹ Вет Святитлышат, святитлыме-влакат – чыланат Икте дечын улыт. Сандене Святитлыше нуным иза-шольо манаш ок вожыл

¹² да ойла: «Тыйын лӱметым иза-шольым-влаклан увертарем, черке покшелне Тыйым моктен мурем».

¹³ Да адак: «Мый Тудлан ӱшанен илаш тӱҥалам». Эше: «Теве Мый да Юмын Мыланем пуымо икшывем-влак».

¹⁴ Кузе икшыве-влак капан да вӱран улыт, тугак Тудат капан да вӱран лийын, вет Тудо колымаш вий кучышым, вес семынже диаволым, шке колымыж дене сеҥышаш

¹⁵ да колымаш деч лӱдмӧ дене ӱмыр мучко кул лийше-влакым чыланыштым эрыкыш лукшаш улмаш.

¹⁶ Вет Тудо, чынжымак, Суксо-влакым огыл, а Авраамын урлыкшым арален налеш.

¹⁷ Сандене, Юмылан ыштымаште чаманыше да ӱшанле Архиерей лияш да калыкым языкше деч эрыкташ манын, Тудо чыла шотыштат иза-шольыж-влак гай лийшаш улмаш.

¹⁸ Тудо Шкежат орлыкым да алгаштарен тергымым чытен, сандене алгаштарымашке логалше-влаклан полшен кертеш.