СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ 12 - У Сугынь

12 ГЛАВА 1-13 Пеҥгыдын шогаш ӱжмаш. 14-29 Юмын ваштареш шогымо деч шижтарымаш.

¹ Садлан меат, тынар кугу таныклыше тӱшка мемнам пылла авыра гын, чыла нелым да мемнам куштылгын шӱртньыктарыше языкым кудалтышаш да ончылнына улшо корным чытен эртышаш улына,

² ӱшанымынам шочыктышо да тичмашлыкыш шуктышо Иисус ӱмбаке ончышаш улына. Намысым шотлыде, Тудым вучышо куан олмеш ыресым чытен лектын да Юмын престолжын пурла велышкыже шинчын.

³ Ида нойо да чонда вийым ынже йомдаре манын, языкан-влак деч тыгай ваштареш шогымым Чытыше нерген шоналтыза.

⁴ Язык ваштареш кредалмаште тыланда але вӱрдам йоктараш логалын огыл.

⁵ Тыланда эргылан ойлымо семын каласыме лыпландарымашым монденда: «Эргым! Господьын тӧрлатымыжым кӱлдымылан ит шотло, кунам Тудо тыйым шылтала, вуетым ит саке.

⁶ Вет Господь кӧм йӧрата, тудым наказатла, кӧм эрге семын налеш, чыланыштым кыра».

⁷ Наказатлымым чытеда гын, Юмо тендан дене эрге-влак дене ыштыме семын ышта. А уло мо тугай эрге, кудым ача мут кучаш ок шогалте?

⁸ Чыла эргылан логалшаш наказатлымаш деч посна кодыда гын, тугеже те чын эрге огыл, закондымо улыда.

⁹ Адакшым, кап шот дене чыланнан наказатлыше ачана лийын, да ме тудым пагаленна, тугеже, илаш манын, шӱлыш-влакын Ачаштын мутшым утларак колыштшаш огынал мо?

¹⁰ Кап ачана-влак шке умылымышт семын мемнам кӱчык жаплан наказатленыт, а Юмо мыланна чынжымак сай лийже манын наказатла, Тудын наказатлымыжлан кӧра ме Тудын святой улмыжо гай святой лияш йӧным налына.

¹¹ Кеч-могай наказатлымаш шке жапыштыже куанла огыл, а ойгыла чучеш, но вара тудын гоч туныктымо-влаклан чын ыштымашын тыныслык саскажым конда.

¹² Тугеже ӱнардыме киддам да вийым йомдарыше пулвуйдам вияҥдыза.

¹³ Окшаклышын йолжо ынже йычкешт, а лучо паремже манын, йолланда вияш йолгорным ыштыза.

¹⁴ Чылан денат тынысын илаш тӧчыза, святой илыш дене илаш тыршыза, тудын деч посна Господьым нигӧ ок уж.

¹⁵ Юмын порылыкшо деч нигӧ ынже кораҥ манын эскерыза. Тек нимогай кочо вож ынже лек да эҥгекым ынже ыште, шукым ынже амырте.

¹⁶ Тендан коклаште иктаж-могай яжарланыше але Исав семын Господьым пагалыдыме еҥат ынже лий манын эскерыза, Исавше икана кочшашлан кугерге улмыжым ужален.

¹⁷ Те паледа: кунам Исав тидын деч вара благословитлымым налаш шонен, кораҥдыме лийын. Шинчавӱд йӧре ачаж деч йодын гынат, тудын шонымыжым вашталтен кертын огыл.

^18-19 Те шижаш лийме да тул дене йӱлышӧ курык деке огыл, пич пычкемыш да тӱтан мардеж деке огыл, пуч йоҥгалтме да мутым лукшо йӱк деке огыл лишемында. Мыланна тылеч вара нимом каласыме ынже лий манын, тиде йӱкым колшо-влак йодыныт,

²⁰ вет «Курык деке янлык але вольык тӱкна гынат, кӱм кышкен але пикш дене пуштмо лийже» манын кӱштымым чытен кертын огытыл.

²¹ Тиде ужмышт тунар шучко лийын, Моисеят каласен: «Мый чот лӱдам да чытырем».

²² Но те Сион курык да илыше Юмын олаже, пылпомышсо Иерусалим деке, шотлен пытараш лийдыме Суксо-влак деке толында,

²³ ончыч шочшо-влакын пайремлымашышт да черке погынымашышт деке – нунын лӱмыштым пылпомышто возымо – , чылаштын судьяшт, Юмо, деке миенда, тичмашлыкыш шушо чын ыштыше-влакын чонышт деке,

²⁴ у сугыньын Ходатайже Иисус деке да Авельын вӱржӧ деч сайракын ойлышо шыжыктыме Вӱр деке лишемында.

²⁵ Шекланыза, ойлышо деч ида кораҥ. Нине моло, мландӱмбалне нуным шижтарыше деч кораҥмеке, утлен огытыл гын, тугеже ме пылпомыш гыч Шижтарыше деч савырнена гын, мутат уке, утлен огына керт.

²⁶ Тунам Тудын йӱкшӧ мландым чытырыктен, да Тудо кызыт тыгай сӧрымашым пуэн: «Эше икана мландым веле огыл, а кавамат чытырыктем».

²⁷ «Эше икана» манмыже чытырыкташ лиймым, вес семынже Юмын пӱрымӧ тӱням, кораҥдымыжым ончыкта. Тыгеже, чытырыкташ лийдымыже кодеш.

²⁸ Ме чытырыктен кертдыме Кугыжанышым налына, сандене Юмын порылыкшым кучышаш да, таум ыштен, Юмылан служитлышаш улына, но тидым Тудлан келшышын, кугун пагален да лӱдын ыштышаш улына,

²⁹ вет мемнан Юмына чыла пытарыше тул улеш.