СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ 10 - У Сугынь

10 ГЛАВА 19-39 Сӧрвалымаш да шижтарымаш.

¹ Законышто шушаш суапын ӱмылжӧ гына уло, а тудын чын сынже огыл. Сандене закон Юмын ончыко толшо-влакым ий еда кондымо икгаяк надыр дене нигунам тичмашлыкыш шуктен огеш керт.

² Уке гын тудым кондымым чарнат ыле, вет служитлыше-влак ик гана эрналтыныт гын, языкыштын нелытшым ынде огыт шиж ыле.

³ Но надыр ий еда язык нерген шарныкта.

⁴ Вет ӱшкыжын да каза таган вӱрышт языкым пытарен огыт керт.

⁵ Сандене Христос тӱняш толмыж годым ойлен: «Надыр ден пӧлекым Тый ынет нал улмаш, но капым Мыланем ямдыленат.

⁶ Йӱлалтыме кумалтыш вольык да язык верч пуымо надыр Тыланет келшен огытыл.

⁷ Тунам Мый ойленам: теве, Юмо, книгаште Мыйын нерген возымо семын Тыйын эрыкетым шукташ мием».

⁸ Ондак ойлен: «Надырым, пӧлекым, йӱлалтыме кумалтыш вольыкым, язык верч пуымо надырым Тый ынет нал улмаш, да нуно Тыланет келшен огытыл». А нуным закон почеш кондыман.

⁹ Вара каласен: «Теве, Юмо, Тыйын эрыкетым шукташ мием». Кокымшыжым ышташ манын, икымшыжым укешке луктеш.

¹⁰ Юмын тиде эрыкше почеш ме Иисус Христосын капшым ик гана жертвылан пуымо дене святитлыме улына.

¹¹ Кеч-могай иерей кече еда служитлен шога да шуко гана икгай надырым пуа, а тыгай надыр нигунам языкым кораҥден огеш керт.

¹² А Христос язык верч ик жертвым пуэн да Юмын пурла могырышкыжо эрелан шинчын.

¹³ Тиде жап гыч тушманже-влакым йол йымакыже пыштымым вуча.

¹⁴ Вет Тудо святитлыме-влакым ик жертве дене эрелан тичмашлыкыш шуктен.

¹⁵ Тидын нерген мыланна Святой Шӱлыш таныкла, вет ондакше тыге каласыме:

¹⁶ «Теве сугынь, могайым нине кече-влак деч вара нунылан пуэм, каласа Господь: Шкемын законем нунын шӱмышкышт пыштем да тудым ушешышт возем,

¹⁷ языкыштым да закондымылыкыштым ынде ом шарналте».

¹⁸ А кушто Юмо айдемын языкшым кудалтен, тушто язык верч надырым пуымо ок кӱл.

^19-20 Иза-шольо-влак, святой дечат святой верыш Иисусын Вӱржылан кӧра пурен кертмылан ме ӱшанена: пӱрдыш гоч, вес семынже шке Капше гоч, Тудо мыланна илыше да у корным почын.

²¹ Юмын пӧртым кучышо кугу Иерейна мемнан уло.

²² Тугеже, вияш шӱм да тичмаш ӱшанымаш дене, титакан совесть деч шыжыктен эрныктыме шӱм да яндар вӱдеш мушмо кап дене Юмо деке мийышаш улына.

²³ Ме почын ойлымо ӱшанен вучымашнам пеҥгыдын кучышаш улына, вет сӧрымашым Пуышо – ӱшанле.

²⁴ Йӧратымаш да поро пашалан икте-весынам кузе кумылаҥдаш манын, икте-весына верч тыршышаш улына.

²⁵ Южыштын семын шкенан черке погынымашкына коштмым чарнышаш огынал, а икте-весым кумылаҥдышаш, жап эртыме семын тидым эшеат утларак ыштышаш улына, вет тиде кече лишеммым те ужыда.

²⁶ Чыным пален налмекат, ме языкым лӱмын ыштылына гын, тугеже языкна верч надыр ынде ок код,

²⁷ судым лӱдын вучымаш да ваштареш шогышо-влакым нелаш ямде орышо тул веле кодеш.

²⁸ Моисейын законжо деч кораҥше еҥым кок-кум еҥын таныклымыже почеш колымашлан чаманыде судитлат.

²⁹ Юмын Эргым шотлыдымо, шкенжымат святитлыше сугынь Вӱрым святойлан шотлыдымо да порылык Шӱлышым мыскылыше еҥ кунар нелынрак мут кучышашым шога манын шоналтыза!

³⁰ «Мый ӱчым шуктем, Мый пӧртылтем, ойла Господь». Тидым Кӧ каласен, ме Тудым палена. Тыгак каласыме: «Господь шке калыкшым судитлаш тӱҥалеш».

³¹ Илыше Юмын кидышкыже логалаш шучко.

³² Ончычсо кечыда-влакым шарналтыза, тунам те, волгыдыш лукталтмеке, кугу орланымаш ден неле кучедалмашым чытен лектында.

³³ Южгунам тендам чылан ончылно мыскыленыт, орландареныт, южгунам тыгайым чытыше воктеке шогалында.

³⁴ Те петырымаште лиймем годым мый денем пырля орланенда да, пылпомышто сайрак да пытыдыме погыда улмым пален, погыдам агымым куанен чытенда.

³⁵ Тыгеже шкендан лӱддымылыкдам ида кудалте, тудо тыланда кугу суапым конда.

³⁶ Сӧрымым Юмын эрыкшым шуктымо дене налаш манын, тыланда чытымаш кӱлеш.

³⁷ Вет каласыме: «Эше изиш, моткоч изиш лиймеке, Толшашлык толеш да ок юватыл.

³⁸ Чын ыштыше айдеме ӱшанымашыж дене илаш тӱҥалеш, а чакна гын, поро шонымашем тудын велне ок лий».

³⁹ Ме пытымашке чакнен кайыше огынал, а утарымашке ӱшанен каена.