СВЯТОЙ АПОСТОЛ ПАВЕЛЫН ЕВРЕЙ-ВЛАКЛАН КОЛТЫМО СЕРЫШЫЖЕ 1 - У Сугынь

1 ГЛАВА 1-4 Юмо Эргыж гоч ойла. 5-14 Юмын Эргыже Суксо-влак деч кӱшнӧ шога.

¹ Ожно шуко гана да тӱрлӧ семын пророк-влак гоч ача-влаклан ойлышо Юмо

² тиде пытартыш кечылаште мыланна Эргыж гоч ойлен. Эргыжым Юмо чылан наследникшылан шогалтен, Тудын гочак курым-влакым пӱрен улмаш.

³ Эрге Тудын чапшын волгалтмыже, могай улмыжын тичмаш сынже улеш да чылажымат куатан шомакше дене куча. Шкеж дене мемнам язык деч эрныктарымеке, Эрге пылпомыш кӱкшытыштӧ Чаплылыкын [престолжын] пурла могырышкыжо шинчын.

⁴ Налме лӱмжӧ Суксо-влакын лӱмышт деч кунар кӱшнӧ, Суксо деч Тудо тунарак кугу лийын.

⁵ Суксо кокла гыч кӧлан кунам Юмо каласен: «Тый Мыйын Эргым улат, Мый таче Тыйым шочыктенам». Адак каласен: «Мый Тудлан Ача лиям, а Тудо Мыланем Эрге лиеш».

⁶ Тыгак Икымше Шочшыжым тӱняшке пуртымыж годым манын: «Тек Тудлан Юмын чыла Суксыжо вуйым сава».

⁷ Суксо-влак нерген каласа: «Суксыж-влакым шӱлышым ышта, служитлышыж-влакым – тулйылмым».

⁸ А Эргыж нерген: «Юмо, Тыйын престолет курым-курымашлык, чынлыкын скипетрже – Тыйын Кугыжанышетын скипетрже.

⁹ Тый чын ыштымым йӧратенат, закондымылыкым ужмышудымо лийынат. Сандене, Юмо, Юмет Тыйым куан ӱй дене пеленет улшо-влак деч утларак шӱрен».

¹⁰ Адак ойлен: «Тый, Господь, тӱҥалтыште мландым негызленат, каваат – кидетын пашаже.

¹¹ Нуно пытат, а Тый эре улат. Чылажат вургем семын тоштемеш,

¹² чием семын нуным вӱдылат, да нуно вашталтыт. Но Тый эре тугаяк кодат, илышаш кечет огеш пыте».

¹³ Суксо кокла гыч кӧлан кунам Юмо каласен: «Тушманет-влакым йол йымакет пыштымешкем, пурла велыштем шинче».

¹⁴ Але чыла Суксо Юмылан служитлыше шӱлыш огыл? Утарымашым налшаш-влаклан нуным служитлаш колтымо огыл мо?