ГАЛАТ-ВЛАКЛАН 6 - У Сугынь

6 ГЛАВА 1-10 Неле годым икте-весылан полшыза. 11-18 Чеверласыме шомак.

¹ Иза-шольо-влак, айдеме иктаж-могай сулыкыш пура гын, те, Шӱлыш почеш илыше-влак, тыгай еҥым тыматлын тӧрлатыза, но шкеат алгаштаралташ огыл манын шекланыза.

² Икте-весыдан нелылыкым нумалза, тыге те Христосын законжым шуктеда.

³ Кӧ, нимо огыл гынат, шкенжым ала-кӧлан шотла, тудо шкенжым шке ондала.

⁴ Тек кажне шке пашажым терга, тунам моктымашыже весын пашажлан огыл, а шкенжынлан гына лиеш.

⁵ Кажне шке нумалтышыжым наҥгайышаш.

⁶ Кӧм Юмын шомаклан туныктымо, тудо шкенжын мо сай улыж гыч ужашыжым туныктышыжлан пуышаш.

⁷ Йоҥылыш ида лий: Юмо вурсалтмашке ок лек. Айдеме мом ӱда, тудымак тӱредеш.

⁸ Шкенжын кап ден чонышкыжо ӱдышӧ – кап ден чон дечак пытымашым тӱредеш, а Шӱлышыш ӱдышӧ – Шӱлыш деч курымашлык илышым тӱредеш.

⁹ Порым ышташ мыланна нойыман огыл, огына лушко гын, шке жапыштыже лектышыжым тӱредына.

¹⁰ Тугеже, але жапна улмо годым чылалан, поснак ӱшанымаш гоч мыланна иза-шольо ден ака-шӱжар лийше-влаклан, порым ыштышаш улына.

¹¹ Ончалза, мыняр шуко мый тыланда шке кидем дене возем.

¹² Кап дене моктанаш шонышо-влак тендам пӱчмӧ йӱлам шукташ ӧкымлат. Христосын ыресшылан верч шыгыремдыме лияш огыл манын, нуно тидым ыштат.

¹³ Пӱчмӧ йӱлам кучышо-шамыч шкештат законым огыт шукто, но нуно, тыланда мом ыштыме дене моктанаш манын, те пӱчмашым эртыза шонат.

¹⁴ А мый мемнан Господьна Иисус Христосын ыресше деч моло дене нимо денат ынем моктане, тудын дене мылам уло тӱням пудалыме, а мый тӱнялан пудалыме улам.

¹⁵ Христос Иисус дене ушнен шогымаште пӱчмашат, пӱчдымашат нимом ок шого, а тиде веле: Юмын уэмдыме айдеме.

¹⁶ Кӧмыт тиде ойым шукташ тӱҥалыт, нунылан да Юмын Израильжылан тыныслык да порылык лийже!

¹⁷ Ончыкыжым тек мыланем нигӧ нелым ок ыште, вет мый Господь Иисусын сусыржым шке капыштем нумалам.

¹⁸ Иза-шольо-влак, мемнан Господьна Иисус Христосын порылыкшо тек тендан шӱм-чон шӱлышда дене лиеш. Аминь.