ГАЛАТ-ВЛАКЛАН 5 - У Сугынь

5 ГЛАВА 1-15 Эрыкыште лийза. 16-26 Шӱлышын саскаже да кап ден чонын пашаже.

¹ Тугеже, Христосын мыланна пуымо эрыкыштыже пеҥгыдын шогыза да угычын кул пызыралтмашке шкендам кепшылташ ида пу.

² Теве мый, Павел, тыланда ойлем: те шкендам пӱчкыктеда гын, Христос тыланда нимогай пайдам ок кондо.

³ Шкенжым пӱчкыктышӧ кажне еҥлан адак шижтарем: тудо законым тӱрыснек шуктышаш.

⁴ Те, законым шуктымо дене шкендам чыныш лукташ шонышо-влак, Христос деч кораҥында, Юмын порылыкшо деч ойырленда.

⁵ А ме Шӱлыш дене ӱшанымына гоч чыныш лукмым вучена, чыныш лукмылан ӱшаннам пыштена.

⁶ Ме Христос Иисус дене ушнен шогена гын, мыланна пӱчмӧ йӱлам эртарыме але уке – садиктак, йӧратымаш гоч саскам пуышо ӱшанымаш гына кӱлешан.

⁷ Те сайын тӱҥалында. Чыным колышташ огыл манын, кӧ тендам чарен шогалтен?

⁸ Тыгай чарак тендам Ӱжшӧ деч огыл.

⁹ Шагал ру уло руашым шукта.

¹⁰ Мый тыланда ӱшанем, вет ме чылан Господь дене ушнен шогена: те вес семын шонаш огыда тӱҥал. А тендам пудыратылше, кӧ гына ынже лий, судитлыме лиеш.

¹¹ Иза-шольо-влак, пӱчмаш кӱлеш манын, мый алят увертарем гын, молан мыйым адак шыгыремдылыт? Тыгеже ырес нерген шомак еҥ-влакым шыдештарымым чарна ыле.

¹² О, тендам пудыратылше-влак кораҥдыме лийыт ыле гын!

¹³ Те, иза-шольо-влак, эрыкыш ӱжмӧ улыда. Но эрыкда кап ден чонын йодмыштлан йӧным ынже ыште, а икте-весыланда йӧратен полышкалыза.

¹⁴ Вет чумыр закон тиде ик оеш шыҥдаралтеш: «Шкендым кузе йӧратет, лишыл еҥетымат тугак йӧрате».

¹⁵ А икте-весыдам пурыда да кочкыда гын, ваш-ваш пытарыме деч шекланыза.

¹⁶ Мый тидым ойлынем: Шӱлыш вуйлатыме почеш илыза, тунам те кап ден чонын сутланымым огыда шукто.

¹⁷ Вет кап ден чон шонымаш Шӱлыш ваштареш ыштынеже, а Шӱлыш – кап ден чон шонымо ваштареш. Нуно икте-весыштлан ваштареш шогат, сандене те мом ышташ шонеда, тудым огыда ыште.

¹⁸ А тендам Шӱлыш виктарен шога гын, те закон йымалне огыдал.

¹⁹ Кап ден чонын пашаже чылалан коеш. Тиде: еҥ вате дене коштмаш, яжарланымаш, амыргымаш, аташланымаш,

²⁰ шояк юмылан кумалмаш, юлымаш, сырен илымаш, ӱчашымаш, кӧранымаш, шыдешкымаш, шкалан пайдам кычалмаш, келшыдымаш, [алгаштарымаш,] йоҥылыш туныктымаш,

²¹ кӧранен ыштымаш, пуштедылмаш, аракам йӱмаш, йӱын пайремлымаш да тулеч молат. Кузе ондак тыланда ойленам, кызытат ойлем: тыге ыштыше-влак Юмын Кугыжанышым огыт нал.

²² А Шӱлышын саскаже: йӧратымаш, куанымаш, тыныслык, кужун чытымаш, алал кумыл, порылык, ӱшанымаш,

²³ ӱҥышылык, шкем кучымаш. Закон тыгай-влак ваштареш огыл.

²⁴ Но кудышт Христосын улыт, нуно кап ден чоным да нунын сутланен йодмыштым ыресеш пудаленыт.

²⁵ Ме Шӱлыш дене илена гын, тугеже Шӱлыш вуйлатыме почеш ыштышаш улына.

²⁶ Яра чапым кычалше, икте-весым сырыктыше, икте-весылан кӧраныше лийшаш огынал.