ГАЛАТ-ВЛАКЛАН 4 - У Сугынь

4 ГЛАВА 8-20 Галат-влак верч Павелын тургыжланымыже. 21-31 Агарь ден Сарра.

¹ Эше каласынем: наследник чылалан оза гынат, йочаж годым тудо кул деч нимо денат ок ойыртемалт.

² Ачажын палемдыме жап марте тудо ончышын да сурт-печым вуйлатышын кид йымалнышт лиеш.

³ Тыгак меат: йоча улмына годым тӱрлӧ пӱртӱс вийын кулжо лийынна,

^4-5 но жап шке тичмашышкыже шумеке, Юмо [Ик Шкет] Эргыжым колтен. Закон йымалсе-влакым тӱлен налаш да мыланна Юмын икшыве лияш манын, Эргыже закон кид йымалне ӱдырамаш деч шочын.

⁶ А те Тудын икшывыже улыда, сандене Юмо Эргыжын «Авва, Ача!» манын ӱжшӧ Шӱлышыжым шӱмышкыда колтен.

⁷ Тыгеже тый ынде кул отыл, но эрге, а эрге улат гын, Иисус Христос гоч Юмын наследникше улат.

⁸ Но ондак, кунам те Юмым пален огыдал, тугай-влакын кулышт лийында, могайышт чынжым юмо огытыл.

⁹ А ынде Юмым паледа але, чынрак каласаш гын, Юмо тендам пала. Молан угычын тӱрлӧ лунчырго да чӱдӧ пӱртӱс вий деке пӧртылыда, шкендам адакат тудын кулышкыжо савырынеда?

¹⁰ Те кече, тылзе, идалык жап да ий-влакым посна палемдеда.

¹¹ Тендан верч лӱдам. Арам мо мый тендан верч тынар пашам ыштенам?

¹² Иза-шольо-влак, тендам сӧрвален йодам, мый гаемак лийза, вет мыят тендан гаяк лийынам. Те мыланем нимо удам ыштен огыдал.

¹³ Те паледа: икымше гана тыланда Поро Уверым начар лиймем годым каласкаленам.

¹⁴ Кап дене орланенам гынат, те йыгыжген огыдал да шкендан деч ышда шӱкал, а Юмын Суксыжым але Христос Иисусым вашлийме семын мыйым вашлийында.

¹⁵ Могай те поро пиалан лийында! Тендан нерген таныклем: лиеш ыле гын, те шке шинчадам луктыда да мыланем пуэда ыле.

¹⁶ Тыгеже тыланда чыным ойлымо дене але мый тушманышкыда савырненам?

¹⁷ Тендан верч саде еҥ-влак тыршат, но порым огыт шоно, а шкенышт верч тыршыза манын, мемнан деч тендам ойырынешт.

¹⁸ Порылан тыршымаш эре сай, тендан дене лиймем годым гына огыл.

¹⁹ Икшывем-влак, Христосын сынже тендан гоч кояш тӱҥалмешке, тыланда верч мылам азам ыштыме годсо гай орланымым угыч чыташ логалеш.

²⁰ Кузе тендан дене ынде лийнем да йӱкем вашталтынем ыле! Мом тендан дене ышташ, мый ом пале.

²¹ Те, закон йымалне лияш шонышо-влак, мыланем каласыза: але те законым огыда колышт?

²² Вет возымо: Авраамын кок эргыже лийын, иктыже кул ӱдырамаш деч, а весыже – эрыкан деч.

²³ Кул ӱдырамаш деч шочшо эрге пӱртӱс пуымо почеш шочын, а эрыкан ӱдырамаш деч шочшо – Юмын сӧрымӧ почеш.

²⁴ Тыште туштен каласымаш уло. Нине кок ӱдырамаш – кок сугынь. Иктыже Синай курык деч, тудо кул лияш шочыкта. Тиде – Агарь.

²⁵ Вет Агарьже Аравийысе Синай курыкым ончыкта, а Синай курыкшо кызытсе Иерусалимлан келшен толеш. Тудыжо шке икшывыж-влак дене кулышто улеш.

²⁶ А пылпомышсо Иерусалим эрыкан, тудо мемнан чыланнан авана.

²⁷ Вет возымо: «Йочам ыштен кертдыме, азам ыштыдыме – куане, азам ыштен орланыдыме – йывыртен кычкырал, вет шкет ӱдырамашын йочаже шуко, мариян ӱдырамашын дечат утларак».

²⁸ Ме, иза-шольо-влак, Исаак семын Юмын сӧрымашын шочшыжо улына.

²⁹ Кузе пӱртӱс пуымо почеш шочшо эрге Шӱлыш пуымо почеш шочшым тунам поктылын, кызытат тугак.

³⁰ А Возымаш мом ойла? «Кул ӱдырамашым да эргыжым поктен колто. Кулын эргыже эрыканын эргыж дене пырля наследник огеш лий».

³¹ Тыгеракын, иза-шольо-влак, ме кул ӱдырамашын огыл, а эрыканын икшывыж-влак улына.