ГАЛАТ-ВЛАКЛАН 3 - У Сугынь

3 ГЛАВА 1-14 Закон да Христослан ӱшанымаш. 15-18 Сӧрымаш ден закон. 19 – 4:7 Закон молан кӱлеш?

¹ О, умылыдымо галат-влак, кӧ тендам чын деч кораҥаш ондален таратен? Шинча ончылныда Иисус Христос тендан дене пудален сакыме [гаяк] сӱретлалтын.

² Тендан деч тидым гына пален налнем: законым шуктымо дене те Юмын Шӱлышым налында мо але колмо уверлан ӱшаныме дене?

³ Тунарак те умылыдымо улыда мо? Шӱлыш дене тӱҥалында, а ынде кап да чон дене мучашледа?

⁴ Арамак мо те тынар шуко чытенда? Уке, арам огыл, шонем.

⁵ Юмо тыланда Шӱлышым пуа да тендан коклаште чудым ышта. Тидым Тудо законым шуктымыланда кӧра мо ышта – але колмо уверланда ӱшанымылан кӧра?

⁶ Авраам денат тыгак лийын: «Тудо Юмылан ӱшанен, сандене Юмо тудым чын ыштышылан шотлен».

⁷ Тугеже палыза: ӱшанымашлан эҥертыше-влак Авраамын шочшышт улыт.

⁸ Чын Юмым ондак палыдыме-влакым Юмо ӱшанымыштлан кӧра чыныш луктеш. Тидым Возымаш ончык ужын да Авраамлан «Тыйын гоч калык-влак чылан суапландарыме лийыт» манын, поро уверым ончылгоч увертарен.

⁹ Тыгеракын, ӱшанымашлан эҥертыше-влак ӱшаныше Авраам дене пырля суапландарыме лийыт,

¹⁰ а законым шуктымылан эҥертыше-влак ӱмбалне – каргымаш. Вет возымо: «Закон книгаш возымым кӧ чылажымат шуктен ок шого, кеч-кӧат каргыме лиеш».

¹¹ А закон гоч нигӧ Юмын ончылно чыныш ок лек, тиде раш, вет «чын ыштыше айдеме ӱшанымашыж дене илаш тӱҥалеш».

¹² Закон ӱшанымашлан ок эҥерте, а «кӧ законын йодмыжым шукта, тудым шуктымо дене ила».

¹³ Христос мемнам законын каргымыж деч тӱлен налын. Тудо мемнан верч Шке каргыме лийын, возымо вет: «Пу меҥгеш сакыме кеч-кӧат каргыме».

¹⁴ Сандене Авраамлан пуымо суапландарымаш чын Юмым палыдыме-влак дек Христос Иисус гоч шуын кертеш, да ме сӧрымӧ Шӱлышым ӱшаныме дене налын кертына.

¹⁵ Иза-шольо-влак, еҥ-влакын шонкалымышт семын ойлем: айдемын пеҥгыдемдыме сугыньымат нигӧ шӧренат да тушко нимом ешаренат ок керт.

¹⁶ А сӧрымашым Авраамлан да тудын урлыкшылан пуымо. Возымаште, «урлык-влаклан» манын, шуко нерген огыл, а икте нерген «тыйын урлыкетлан» манын каласыме, тиде – Христос.

¹⁷ Мый тидым ойлынем: ныл шӱдӧ кумло ий эртымеке лекше закон Христос нерген Юмын ондак пеҥгыдемдыме сугыньым шӧрен да Юмын сӧрымыжын вийжым пытарен ок керт.

¹⁸ Вет наследствым налмаш законеш негызлалтеш гын, тыгеже тудо сӧрымашеш ок негызлалт. Но Юмо сӧрымыж дене Авраамлан наследствым пӧлеклен.

¹⁹ А молан законжо кӱлеш? Тудым, сӧрымашым налше урлык толмешке, титакыш пурымылан кӧра варарак лукмо да ушен шогышын кидше дене Суксо-влак гоч пуымо.

²⁰ Но икте годым ушен шогышо огеш лий, а Юмо икте.

²¹ Тугеже закон Юмын сӧрымыж ваштареш шога? Уке! Вет илышым ыштен кертше закон пуалтеш ыле гын, чыныш лекмаш чынжымак закон деч лиеш ыле.

²² Но мом сӧрымӧ, тудо ӱшаныше-влаклан Иисус Христослан ӱшаныме дене пуалтше манын, Возымаш чылам языкеш кепшылтен.

²³ Ӱшанымаш толмо деч ончыч, шушаш ӱшанымаш почылтмешке, закон мемнам петырен кучен да оролен.

²⁴ Тыгеже, ӱшаныме дене мыланна чыныш лекташ манын, закон мемнам Христос деке виктарыше лийын.

²⁵ Но ӱшанымаш толмеке, ме ынде виктарышын кид йымалныже огынал.

²⁶ Вет Христос Иисуслан ӱшанымылан кӧра те чылан Юмын шочшыжо улыда.

²⁷ Те чылан, Христос дене ушнаш манын тынеш пурышо-влак, Христос дене вӱдылалтында.

²⁸ Иудей але эллин, кул але эрыкан, пӧръеҥ але ӱдырамаш ынде уке, вет те чыланат, Христос Иисус дене ушнен, икте улыда.

²⁹ А Христосын улыда гын, тугеже те Авраамын урлыкшо да сӧрымӧ почеш наследник улыда.