ГАЛАТ-ВЛАКЛАН 2 - У Сугынь

2 ГЛАВА 1-10 Вес Апостол-влак Павелым шке коклашкышт налыт. 11-14 Петрым Павел шылтала. 15-21 Христослан ӱшаныме веле айдемым утарен кертеш.

¹ Вара, латныл ий эртымеке, мый Варнава дене пырля уэш Иерусалимыш миенам, пеленем Титымат налынам.

² А каенамже Юмын почын ончыктымыжлан кӧра. Мыйын ончычсо да кызытсе тыршымем арам ынже лий манын, чын Юмым палыдыме-влаклан мыйын каласкалыме Поро Уверым тысе-влаклан умылтаренам, вуйлатышылан шотлалтше-влаклан посна каласкаленам.

³ Но нуно мый денем пырля мийыше эллин Титымат пӱчмӧ йӱлам эрташ ӧкымлен огытыл.

⁴ Туге гынат Христос Иисусын мыланна пуымо эрыкшым палаш шолып толшо, ӱшанышыла кояш тӧчышӧ шояк еҥ-влак, мемнам кулыш савыраш манын, коклашкына йышт пуреныт.

⁵ Тендан коклаште Поро Уверын чынже аралалтше манын, ме нунын ончылно ик шагатланат чакнен да вуйым пуэн огынал.

⁶ А кӧ вуйлатышылан шотлалтын – могай гына нуно ынышт лий, мылам нимогай ойыртем уке, Юмо чылан ӱмбак ик семын онча – нине вуйлатышылан шотлалтше-влак мыланем туныктымашке нимом ешарен огытыл.

⁷ Мӧҥгешла, нуно ужыныт: кузе Поро Уверым пӱчман-влак коклаште каласкалаш Петрлан ӱшаныме, тугак пӱчдымӧ-влаклан тудым каласкалаш мылам ӱшаныме.

⁸ Петрым пӱчман-влакын Апостолжым Ыштышак мыйымат чын Юмым палыдыме-влаклан Апостолым ыштен.

⁹ Юмо порылыкшо дене мылам могай пашам пуымым умылымекышт, пеҥгыде эҥертышлан шотлалтше Иаков, Кифа да Иоанн мылам да Варнавалан, кидым пуэн, паша кыл ыштымым палемденыт: ме чын Юмым палыдыме-влак деке кайышаш улына, нуно – пӱчман-влак деке.

¹⁰ Йорло-влакым гына шарнышаш улына, тидыжым мый ышташ тыршенам.

¹¹ А кунам Петр Антиохийыш толын, мый чылан ончылно тудын ваштареш шогалынам, вет тудо титакан лийын.

¹² Молан манаш гын еҥ-влакын Иаков деч толмышт деч ончыч тудо чын Юмым ондак палыдыме да вара ӱшанаш тӱҥалше-влак дене пырля кочкын, а нине еҥ толмеке, пӱчмӧ йӱла верч шогышо-влак деч лӱдынат, тыгай ӱшанаш тӱҥалше-влак деч кораҥ кошташ тӱҥалын.

¹³ Тудын дене пырля моло иудей-влакат шояк койышым койыныт, Варнават нунын койышышкышт ушнен.

¹⁴ Поро Уверын чын корныж гыч нунын кораҥмыштым ужмекем, мый чылан ончылно Петрлан каласенам: «Тый, иудей, шкеже иудейла огыл, а чын Юмым палыдыме-влак семын илет гын, молан чын Юмым палыдыме-влакым иудей семын илаш ӧкымлет?»

¹⁵ Ме шочынак иудей улына, а чын Юмым палыдыме языкан еҥ-влак кокла гыч огыл.

¹⁶ Туге гынат ме палена: айдеме законым шуктымо дене огыл чыныш лукталтеш, а Иисус Христослан ӱшаныме дене веле. Сандене, законым шуктымо дене огыл, а Христослан ӱшаныме дене чыныш лекташ манын, меат Христос Иисуслан ӱшаненна, вет законым шукташ тыршыме дене ик еҥат чыныш ок лукталт.

¹⁷ Но мемнанат, Христос гоч чыныш лекташ шонышо-влакын, языкан улмына рашемын гын, тугеже Христос языкын служитлышыже мо вара? Уке!

¹⁸ Мом мый шалатенам, тудым угыч чоҥем гын, мый шкемым шке закон пудыртышо семын ончыктем.

¹⁹ Юмылан илаш манын, закон гоч мый законлан коленам. Мый Христос дене пырля ыресеш пудалалтынам,

²⁰ да ынде мый огыл илем, а, мый денем ушнен, Христос ила. А кызыт капыште илымем годым мыйым йӧратыше да мыйын верч Шкенжым пуышо Юмын Эргылан ӱшанен илем.

²¹ Юмын порылыкшым ом кораҥде: айдеме закон гоч чыныш лукталтеш гын, Христос арам колен.