ГАЛАТ-ВЛАКЛАН 1 - У Сугынь

1 ГЛАВА 1-5 Саламлымаш. 6-10 Вес Поро Увер уке. 11-24 Кузе Павел Апостол лийын.

¹ Павел деч – еҥ-влакынат, айдеме гочат огыл, а Иисус Христосын да Тудым колымаш гыч ылыжтыше Ача Юмын колтымо Апостолжо деч –

² да пеленем улшо чыла иза-шольо деч Галатийысе черке-влаклан.

^3-4 Юмо Ачана деч да Тудын эрыкше почеш мемнам кызытсе осал саман деч утараш Шкенжым языкна верч пуышо Господьна Иисус Христос деч тыланда порылык да тыныслык лийже.

⁵ Юмылан курым-курымеш чап лийже. Аминь.

⁶ Тендам Христосын порылыкшо дене Ӱжшӧ деч тыге писын кораҥмыланда да вес поро увер деке савырнымыланда ӧрам.

⁷ Туге гынат тидыже вес увер огыл, а тендам пудыратыше да Христосын Поро Увержым локтыл весемдаш шонышо еҥ-влак гына улыт.

⁸ Но мемнан каласкалыме Поро Уверна деч молым тыланда ме шкежат ойлена але пылпомыш гыч Суксо каласкала гынат, тек тыгай уверым шарышыже каргыме лиеш.

⁹ Кузе ме ондак ойленна, кызытат тыгак каласем: шӱмышкыда пыштыме Поро Увер деч молым тыланда иктаж-кӧ каласкала гын, тудо каргыме лийже.

¹⁰ Кызыт мый еҥ-влакын мо кумылыштым шке велкем савырынем але Юмыным? Еҥ-влаклан мо келшаш тыршем? Мый кызыт мартеат еҥ-влаклан келшаш тӧчем ыле гын, Христосын тарзыже ом лий ыле.

¹¹ Иза-шольо-влак, пален лийза: мыйын каласкалыме Поро Увер айдемын огыл.

¹² Тудым мый айдеме деч налын омыл, тудлан мыйым туныктен огытыл, тудым мый Иисус Христосын почмыж гоч налынам.

¹³ Иудей йӱла почеш ондак кузе илымем нерген те колында, тунам мый Юмын Черкым чот поктылынам да тудым пытараш тыршенам.

¹⁴ Иудей йӱлам шуктымаште мый шке калыкысе ятыр иктаҥашем-влак деч утларак сеҥымашке шуынам, ачана-влакын йӱлашт верч моткоч пеҥгыдын шогенам.

^15-16 Но эше авамын кӧргыштыжӧ улмем годымак мыйым ойырен налше да порылыкшо дене ӱжшӧ Юмо шке Эргыжым мыйын гоч палдараш сайлан шотлен. Тудын нерген Поро Уверым чын Юмым палыдыме-влак коклаште каласкалышаш улам. Мый тунамак айдеме деч каҥашым йодын омыл,

¹⁷ да мый дечем ончыч Апостол лийше-влак деке Иерусалимыш миен омыл, а Аравийыш каенам да угыч Дамаскыш пӧртылынам.

¹⁸ Вара, кум ий эртымеке, Петр дене вашлийын мутланаш Иерусалимыш миенам да тудын дене латвич кече лийынам,

¹⁹ но Господьын изаже Иаков деч моло вес Апостолым ужын омыл.

²⁰ Тиде мыйын возымем шоя огыл манын, тендам Юмын ончылно ӱшандарем.

²¹ Тылеч вара мый Сирий да Киликий кундемлашке каенам.

²² Иудейысе христиан черкылаште мыйым чурий дене пален огытыл.

²³ Нуно колыныт веле: «Ондак мемнам поктылшо саде еҥ ӱшанымашнам тылеч ончыч пытараш тӧчен, но кызыт тудым шке увертара».

²⁴ Сандене мыйын верч Юмым моктеныт.