Еф 5 - У Сугынь

5 ГЛАВА 6-20 Волгыдын икшывыже семын илыза. 21-33 Марий ден вате.

¹ Те Юмын йӧратыме икшывыже улыда гын, тугеже Тудын семын ыштыза.

² Кузе Христос мемнам йӧратен да Шкенжым мемнан верч жертве семын, тамле пушан пӧлек семын Юмылан пуэн, туге йӧратен илыза.

³ Но яжарланыме, тӱрлӧ ару огыл койыш але опкынланыме нерген тендан коклаште мутымат лукман огыл, святой-влаклан тиде келшен ок тол.

⁴ Тыгак шакшын мутланымаш, кӱлеш-оккӱлым ойлыштмаш, игылт воштылмаш тыланда йӧрдымӧ, тыгай олмеш те Юмылан таум ыштышаш улыда.

⁵ Пален лийза: ик яжарланышынат, але ару огылынат, але опкынланышынат – опкынланымыже шояк юмылан кумалме дене иктак – тыгайым ыштыше ик айдемынат Христосын да Юмын Кугыжанышыште нимогай наследствыже уке.

⁶ Тек тендам яра ойлыштмо дене нигӧ ынже ондале, вет тидын верчак мут колыштдымо еҥ-влак ӱмбаке Юмын шыдыже возеш.

⁷ Тыгай еҥ-влак деке ида ушно.

⁸ Ондак те пычкемыш лийында, а ынде, Господь дене ушнен, волгыдо улыда. Волгыдын йочашт семын илыза,

⁹ вет Шӱлышын саскаже – тӱрлӧ порылык, чын ыштымаш да чын.

¹⁰ Юмылан мо келшымым эре терген шогыза.

¹¹ Пычкемышын саскадыме пашаж деке ида ушно, а тыгайым тӱжвак лукса.

¹² Еҥ-влакын шолып ыштыме пашашт нерген ойлашат намыс.

¹³ Но волгыдо дене тӱжвак лукмо годым чыла раш коеш. Тӱжвак лукмо чылажат волгыдо лиеш,

¹⁴ сандене каласыме: «Малыше, кынел да колымаш гыч ылыж, тыйым Христос волгалтараш тӱҥалеш».

¹⁵ Тугеже, кузе илымыдам тӱткын ончыза. Ушдымо семын огыл, а уш-акылан семын илыза,

¹⁶ жапым пайдалын кучылтса, вет нине кече ондалчыкан улыт.

¹⁷ Сандене шонен моштыдымо ида лий, а Юмын эрыкшым умылаш тыршыза.

¹⁸ Руштмешке ида йӱ, тиде яжарланымашке конда, а Святой Шӱлыш дене темалтса.

¹⁹ Икте-весыдам псалом да шӱлыш кумылаҥдыме моктен мурымаш дене пеҥгыдемдыза, шӱмыштыда Господьлан мурыза да семым шоктыза.

²⁰ Мемнан Господьна Иисус Христос лӱм дене эре да чыла верч Юмылан, Ачалан, таум ыштыза.

²¹ Юмо деч лӱдын, икте-весыдам колыштын илыза.

²² Вате-влак тек шке марийыштым Господьым колыштмо семынак колыштыт,

²³ вет кузе Христос Черкылан вуй улеш, да Тудак капын Утарышыже, тугак марият ватылан вуй улеш.

²⁴ Кузе Черке Христосым колыштеш, тугак вате-влакат шке марийыштым чыла шотыштат колыштшаш улыт.

^25-26 Марий-влак, Христосын Черкым йӧратымыж семын шке ватыдам йӧратыза. Черкым святитлаш манын, Христос Шкенжым пуэн, тудым вӱд дене да шомак дене мушкын эрыктен.

²⁷ Христос Шке ончыланже Черкым чап дене, лавыран тамга але иктаж-могай экшык деч посна шогалтынеже, Черкыже святой да нимогай ситыдымаш деч посна лийшаш.

²⁸ Тыгак марият ватыжым шке капшым йӧратыме семын йӧратышаш. Ватыжым йӧратыше шкенжым шке йӧрата.

²⁹ Нигӧ нигунам шке капшым ужмышудымо ок лий, а тудым пукша да ырыкта. Тыгак Черке верч Господь тырша,

³⁰ вет ме Тудын капшын ужашыже улына, Тудын капше ден лужо деч улына.

³¹ «Сандене пӧръеҥ ачаж ден аважым кода, шке ватыж дене ушна, да нуно коктын ик кап ден чон лийыт.»

³² Тиде кугу тайне, а ойлемже Христос да Черке нерген.

³³ Но тендан коклаштат тугак лийже: кажныже шкенжым йӧратыме семын тек ватыжым йӧрата, а вате тек марийже деч лӱдеш.