Еф 4 - У Сугынь

4 ГЛАВА 1-16 Христосын Черкыжын иктылыкше. 17-24 Ончычсо илыш да у илыш. 25 – 5:5 У илышлан каҥаш-влак.

¹ Тыгеракын мый, Господь верч кучен петырыме еҥ, налме ӱжмашда дене келшен илаш сӧрвалем.

² Эре ӱҥышӧ, тыматле да чытыше лийза, икте-весыдам йӧратен чытыза.

³ Шӱлышын кондымо иктылыкшым тендам ушышо тыныслык дене аралаш тыршыза.

⁴ Ик кап да ик Шӱлыш уло, ӱшанен вучымашат тыгак икте, те тушко ӱжмӧ улыда.

⁵ Ик Господь, ик ӱшанымаш, ик тынеш пуртымаш,

⁶ ик Юмо да чылан Ачаже. Тудо чыла ӱмбалне шога, чыла гоч ышта да чыланнан чонышто ила.

⁷ А мемнан кокла гыч кажнылан Христосын висен пуымыж дене келшышын посна пӧлек пуалтын.

⁸ Сандене Возымаш ойла: «Тудо кӱкшытыш кӱзен, пленыш налме-влакшым наҥгаен да айдеме-влаклан пӧлекым пуэден».

⁹ Тудын кӱзымыжӧ мом ончыкта? Тудын ондакше мланде пундашке волымыжым ончыкта.

¹⁰ Тиде Волышыжак, уло сандалыкым темаш манын, чыла пылпомыш деч кӱшкӧ кӱзен.

¹¹ Тудо иктыштым Апостоллан, весыштым пророклан, иктыштым Поро Уверым каласкалышылан, весыштым пастырьлан але туныктышылан шогалтен.

¹² Служитлыме пашалан, Христосын Капшым чоҥымылан святой-влакым ямдылаш манын, Тудо тыге ыштен.

¹³ Тыгеракын, пытартышлан ме чылан ӱшанымаште да Юмын Эргыжым палымаште иктылыкыш шуына, кушкын шушо, Христосын тичмашлыкше дене келшыше кӱкшытыш шушо лийына.

¹⁴ Тунам ме толкын кышкылтме, чыла туныктымашын мардежше пуэн наҥгайме, алгаштараш уста чоя еҥ-влакын ондалыме изи йоча гай огына лий,

¹⁵ а чыным кучен, йӧратен илен, Тудын деке ушнымашке чыла шотыштат кушкын толына, Тудыжо вуй, Христос улеш.

¹⁶ Тудын деч уло кап, пырля кучышо кажне йыжыҥ полшымо дене иктеш ушнен шоген, кажне посна ужашын шке ыштышашыжым ыштымыж семын кушкеш да йӧратымаште шкенжым чоҥен пеҥгыдемда.

¹⁷ Тыгеже мый Господьын лӱмжӧ дене тидым ойлем да сӧрвалем: моло калык семын кӱлдымӧ шонымаш дене умбакыже ида ыште.

¹⁸ Нунын ушыштым пычкемыш авалтен, палыдымыштлан да шӱмышт кӱэмалтмылан кӧра Юмын илыш деч ӧрдыжтӧ улыт.

¹⁹ Нуно чыла шижмашым йомдареныт, шала койышлан шкеныштым пуэныт, тӱрлӧ йырныкым опкынланен ыштат.

²⁰ Но те тыге огыл Христос нерген тунемында.

²¹ Иисус нерген те колында да, Тудын тунемшыже лийын, Тудын дене улшо чынлан туныктымо лийында гын,

²² тугеже ондалчыкан сутланымаш дене эркын-эркын пытаралтше тошто айдемыдан ончычсо койышыж деч кораҥшаш улыда.

²³ Тендан шӱм-чон шӱлышда да ушда уэмшаш улыт,

²⁴ Юмо гай лияш ыштыме, чынын йодмыж дене чын да святойла илыше у айдемыш вӱдылалтшаш улыда.

²⁵ Сандене, шоям ӧрдыжеш коден, чылан шке лишылда-влаклан чыным ойлыза, вет ме икте-весын ужашыже улына.

²⁶ Сыреда гынат, языкым ида ыште: кече шичмешке, шыдешкымыдам кудалтыза,

²⁷ да диаволлан верым ида пу.

²⁸ Кӧ шолыштын, тек ынде ок шолышт, йорло еҥлан кушеч ойырен пуаш лийже манын, тек шке кидше дене пайдале пашам тыршен ышта.

²⁹ Тендан умшада гыч нимогай йӧрдымӧ мут ынже лек, а колыштшо-влаклан порым кондышо, ӱшанымаште пеҥгыдемдыше поро шомакым веле ойлыза.

³⁰ Юмын Святой Шӱлышыжым ида ойгаҥдаре, вет те эрыкыш лукмо кечын Шӱлыш дене палемдыме улыда.

³¹ Чыла чон кочым, ажгынымым, шыдым, кычкырымым, мыскылымым чыла осаллык дене пырля кудалтыза.

³² Икте-весе деке поро да пушкыдо кумылан лийза. Кузе Юмо тендан титакдам Христос гоч кудалтен, теат тугак икте-весын титакыштым кудалтыза.