Еф 2 - У Сугынь

2 ГЛАВА 1-10 Колымаш гыч илышыш. 11-22 Иудей да моло калыкым Христос иктеш уша.

¹ Те ондак осал пашаланда да языкланда кӧра колышо лийында.

² Тудо жапыште те осалым ыштен иленда, тиде тӱнясе илыш-йӱла дене келшышын, южысо властьын тӧражын – мут колыштдымо-влак коклаште кызытат ыштыше шӱлышын – шонымыж семын ыштенда.

³ Нунын коклаште ондак меат чылан кап ден чоннан сутланымыже почеш, кап ден чонын да шонымашын йодмыштым шуктен иленна да пӱртӱсна дене моло семынак Юмын шыдыжым ужшаш улына ыле.

⁴ Но порылыклан поян Юмо шке кугу йӧратымашыж дене мемнам туге йӧратен,

⁵ мемнам, осал пашаланна кӧра колышо-влакым, Христос дене пырля илышым ыштен. Юмын порылыкшо дене те утарыме улыда.

⁶ Тыгак Юмо мемнам Христос Иисус дене ылыжтен да Тудын дене ушнымаште мемнам пылпомышто шынден.

⁷ Мыланна, Христос Иисус дене ушнышо-влаклан, ончыктымо порылыкшо дене Юмо Шкенжын алалжын лыҥ поянлыкшым шушаш курымлаште ончыкташ шонен.

⁸ Юмын порылыкшо дене, ӱшаныме гоч, тендам утарыме. Утарымаш тендан деч огыл, а Юмын пӧлекше,

⁹ тиде – паша деч огыл, сандене нигӧ моктанен ок керт.

¹⁰ Ме Тудын ыштымыже улына, Тудын ончылгоч ямдылыме поро пашажым шукташ Юмо мемнам Христос Иисус гоч ыштен.

¹¹ Тыгеже шарныза: ондак те, шочынжо Юмым палыдыме-влак – капым айдемын кидше дене пӱчмылан кӧра пӱчман маналтше-влак тендам пӱчдымӧ маныт –

¹² те тудо жапыште Христос деч посна ыльда да Израиль калык деч ӧрдыжтӧ лийында, сӧрымашан сугынь-влаклан йот лийында, те тӱняште ончыкылан ӱшан да Юмо деч посна иленда.

¹³ А ынде те, ондакше тораште лийше-влак, Христос Иисус дене ушнымаште Христосын Вӱржӧ гоч лишемында.

^14-15 Вет Христос – мемнан тыныслыкна, кок тӱшка гыч Тудо иктым ыштен да нуным ойырышо пырдыжым, вес семынже тушманлымашым, шке айдеме капше дене шалатен. Нине кокыт гыч Шкеж дене ик у айдемым ышташ манын, законым, тудын кӱштымыж ден пунчалже-влакым укеш луктын, тидын дене тынысым конден.

¹⁶ Тыге Христос тушманлымашым ырес гоч пытараш, тушто нине кокыт ден Юмо коклаште сӧрасымашым ышташ да нуным ик капеш ушаш шонен.

¹⁷ Тудо толын да тыланда, тораште улшо-влакланат, лишне улшо-влакланат тыныслык нерген поро уверым каласкален.

¹⁸ Тудын гоч иктыштат, весыштат ик Шӱлыш дене Ача деке шуын кертыт.

¹⁹ Тыгеже, те ынде йот да ӧрдыж еҥ огыдал, а святой-влак дене пырля ик калыкак лийында, Юмын еҥже-влак улыда.

²⁰ Те Апостол ден пророк-влакын негызешышт чоҥымо улыда, а негызын пусак кӱжӧ – Иисус Христос Шкежак.

²¹ Тушан уло оралте ушна, кушкеш да Господьын святой храмже лиеш.

²² Христос дене ушнен шогымаште теат Шӱлыш дене Юмын илемже лийыда.