СВЯТОЙ АПОСТОЛ ПАВЕЛЫН КОЛОССЯН-ВЛАКЛАН КОЛТЫМО СЕРЫШЫЖЕ 4 - У Сугынь

4 ГЛАВА 2-6 Черкылан каҥаш-влак. 7-18 Чеверласымаш.

¹ Оза-влак, кулда-влак дене чын да тӧр ыштыза. Ушыштыда кучыза: пылпомышто тенданат Озада уло.

² Кумалмаштыда чытышан да тӱткӧ лийза, таум ыштыза.

³ Шке увержым шараш, Христосын тайныжым увертараш, Юмо мыланна омсам почшо манын, мемнан верчынат кумалза. Тиде тайне верчак мый кызыт петырымаште шинчем,

⁴ да мый тудым раш палдарышаш улам. Мыланем тидым кӱлеш семын ышташ манын кумалза.

⁵ Ӧрдыж-влак дене шкендам моштен кучыза, жапым пайдалын кучылтса.

⁶ Мутда эре поро, шинчал дене саемдыме лийже, кажнылан кузе вашешташ пален шогышаш улыда.

⁷ Господьлан ӱшанлын служитлыше, мемнан дене пырля ыштыше йӧратыме Тихик иза тыланда мыйын нерген чылажымат каласа.

⁸ Тудым тидланак тендан деке колтенам. Тек тудо тендан дене мо ышталтме нерген пален налеш да шӱмдам кумылаҥда.

⁹ Тудын дене пырля ӱшанле да йӧратыме Онисим изана толеш, тудо тендан кокла гыч иктыже. Тысе чыла паша нерген нуно тыланда каласкалат.

¹⁰ Мый денем пырля казаматыште шинчыше Аристарх, тыгак Варнаван Марк родыжо тыланда саламым колтат. Марк шотышто йодмым налында: тудо тендан деке мия гын, порын вашлийза.

¹¹ Тыгак Иуст манме Иисус саламым колта. Пӱчман-влак кокла гыч нуно веле Юмын Кугыжанышлан мый денем пырля пашам ыштат. Нуно мыланем кумылаҥдымаш лийыныт.

¹² Иисус Христосын тарзыже, тендан Епафрасда саламым колта. Те нимогай ситыдымаш деч посна шогыза, чыла шотыштат Юмын эрыкше почеш илыза манын, тудо кумалмаште тендан верч эреак кучедалеш.

¹³ Тудо тендан верч да Лаодикий ден Иерапольышто улшо-влак верч уло кумылын тырша манын, мый ӱшандарен кертам.

¹⁴ Йӧратыме врач Лука да Димас тыланда саламым колтат.

¹⁵ Лаодикийысе иза-шольо-влаклан, тыгак Нимфанлан да тудын пӧртеш погынышо черкылан саламым каласыза.

¹⁶ А тиде серышым тендан дене лудмеке, тудым тыгак Лаодикийысе черкыште лудыктыза, Лаодикийысе серышым теат лудса.

¹⁷ Архипплан каласыза: «Шеклане, Господь дене ушнен шогымаште налме служитлыме пашатым шукто».

¹⁸ Мый, Павел, тиде саламлымашым шке кидем дене возем. Мыйын петырымаште шинчымем шарныза. Тендан дене Юмын порылыкшо лийже. Аминь.