СВЯТОЙ АПОСТОЛ ПАВЕЛЫН КОЛОССЯН-ВЛАКЛАН КОЛТЫМО СЕРЫШЫЖЕ 3 - У Сугынь

3 ГЛАВА 1-17 Тошто ден у айдеме. 18 – 4:1 Христиан еш ден кул-влак нерген.

¹ Те Христос дене пырля ылыжында гын, тугеже кӱшылсым кычалза. Тушто Юмын пурла могырыштыжо Христос шинча.

² Мланде ӱмбалсе нерген огыл, а кӱшылсӧ нерген шоныза.

³ Вет те коленда, да тендан илышда Христос дене пырля Юмо дене ушнымаште уждымын саклалтеш.

⁴ Кунам Христос, тендан илышда, толеш, тунам теат Тудын дене пырля чапланен толыда.

⁵ Сандене тендан тиде тӱня деч мо уло, тудым пытарыза: яжарланымым, шакшыланымым, сутланымым, осал кумыл шупшмым, опкынланымым. Опкынланымыже шояк юмылан кумалме дене иктак.

⁶ Тыгай верчак мут колыштдымо еҥ-влак ӱмбаке Юмын шыдыже возеш.

⁷ Ала-кунам теат тыгай койыш кид йымалне лийында, шкендам тыгак кученда.

⁸ А ынде те чылажымат ӧрдыжкӧ кораҥдыза: шыдым, ажгынымым, еҥлан осалым шонымым, еҥ ӱмбаке ойлымым, умша гыч лекше шакше мутым.

⁹ Икте-весыланда ида шойышт, вет шке ӱмбачда тошто айдемым пашаж дене пырля кудалтенда,

¹⁰ у айдемыш вӱдылалтында. Тудыжо, Пӱрышыжын тӱсан гай лияш келыштаралтын, эре уэмеш, Юмым сайынрак да сайынрак палаш тунемеш.

¹¹ Тидын шотышто эллинат, иудеят, пӱчмат, пӱчдымат, варварат, скифат, кулат, эрыканат уке, но Христос – тиде чыла да чылаштат.

¹² Тыгеже, Юмын ойырен налме, святой да йӧратыме еҥ-влак семын, шӱм чаманымаш, порылык, ӱҥышылык, тыматле улмо, шуко чытыме дене вӱдылалтса.

¹³ Икте-весыдам чытен илыза, тендан кокла гыч иктаж-кудыжын весылан ӧпкеда уло гын, титакшым кудалтыза. Кузе Христос титакдам кудалтен, теат тугак ыштыза.

¹⁴ Но эн ондак йӧратымаш дене вӱдылалтса, тудо чыла сайым уша.

¹⁵ Тек тендан шӱмыштыда Юмын тыныслыкше озалана. Тыныслыкышке тендам ик кап семын ӱжмӧ. Тауштен моштышо лийза.

¹⁶ Тек тендан чоныштыда Христос шомакын уло поянлыкше ила. Уло уш-акыл дене икте-весыдам туныктыза, икте-весылан каҥашым пуыза, псаломым, моктемурым да шӱлыш кумылаҥдыме мурым шӱмыштыда Господьлан тауштен мурыза.

¹⁷ Мом гына ойледа але ыштеда, чылажымат Господь Иисус Христос лӱм дене ыштыза, Тудын гоч Юмылан да Ачалан таум каласыза.

¹⁸ Вате-влак, марийдам колыштса, Господьлан ӱшаныше ӱдырамашлан тиде келшен толеш.

¹⁹ Марий-влак, шке ватыдам йӧратыза да нунын дене торжа ида лий.

²⁰ Йоча-влак, ача-авадам чыла шотыштат колыштса, Господьлан тиде келша.

²¹ Ача-влак, йочада-влак вуйым ынышт саке манын, нуным эре ида шылтале.

²² Кул-влак, мландӱмбалсе озада-влакым чыла шотыштат колыштса. Тидыжым айдемылан келшаш тӧчен, оза ончымо годым веле огыл, а яндар шӱм дене, Юмо деч лӱдын ыштыза.

²³ Мом те ыштеда, чылажымат айдемылан огыл, а Господьлан ыштыме семын уло кумылын ыштыза.

²⁴ Господь деч пӧлек шотеш наследствым налшашдам те паледа, вет Христос Господьлан служитледа.

²⁵ А осалым ыштыше шкенжын осалже денак налеш. Юмо чыла еҥым ик семын онча.