СВЯТОЙ АПОСТОЛ ПАВЕЛЫН КОЛОССЯН-ВЛАКЛАН КОЛТЫМО СЕРЫШЫЖЕ 2 - У Сугынь

2 ГЛАВА 6-15 Христос дене у илыш. 16-23 Кӱлдымӧ чарымаш деч эрык.

¹ Тендан верч, Лаодикийыште да Иерапольышто илыше-влак верч да кӧ мыйын чурием ужынжат огыл, чылашт верч кузе чот мылам кучедалаш логалеш, те палыза шонем.

² Чыланыштын шӱмышт кумылаҥже да чыланат йӧратымаш дене ушнышт, умылымашын уло поянлыкышкыже да тичмашлыкышкыже, Ача Юмын да Христосын тайныштым палымашке шуышт манын тыршем.

³ Уш-акылын да шинчымашын чыла поянлыкше Христос дене уждымын саклалтеш.

⁴ Тендам нигӧат ласка мут дене ынже ондале манын, мый тидым ойлем.

⁵ Вет капем дене тендан пелен омыл гынат, чонем дене тендан пеленак улам да, шот дене илымыдам да Христослан пеҥгыдын ӱшанымыдам ужын, куанем.

⁶ Тыгеже Христос Иисусым, Господьым, шӱмышкыда пуртенда гын, Тудын дене ушнен илыза.

⁷ Тендам туныктымо семын Христосеш вожаҥза, Тудын дене ушнен, шке илышдам чоҥыза, ӱшанымаш дене пеҥгыдемза. Тек тендан тауштымыда лыҥ лиеш.

⁸ [Иза-шольо-влак,] Христосеш огыл, а айдеме туныктымашеш да сандалыкысе тӱрлӧ пӱртӱс виеш негызлалтше, ушанла койшо туныктымаш да кӱлдымӧ ондалымаш дене нигӧ тендам ынже авалте манын шекланыза.

⁹ Христосын айдеме капыштыже Юмын уло тичмашлыкше ила.

¹⁰ Христос дене ушнен, теат тичмашлыкыш шуында, Тудыжо – уло вуйлатымашын да властьын вуйжо.

¹¹ Тудын дене ушнымаште те пӱчмашым эртенда, но тиде айдеме кид дене ыштыме пӱчмаш огыл, а пуйто айдемын языкан кап ден чон кумылжым кудаш налмаш. Тыгай пӱчмашым Христос ышта.

¹² Тынеш пуртымо гоч Тудын дене пырля тойымо лийында, тынеш пуртымо гочак Тудым колымаш гыч ылыжтыше Юмын куатшылан ӱшанымылан кӧра Тудын дене пырляк ылыж кынелында.

¹³ Тендам, ондакшым сулыкланда да пӱчдымӧ улмыланда колышо-влакым, Христос дене пырля Юмо илышым ыштен. Тудо мемнан чыла сулыкнам касарен,

¹⁴ мемнан ваштареш возымо кагазым туныктымаш дене ӱштыл шуэн, ыресеш пудален кораҥден.

¹⁵ Тидын дене вуйлатымашын да властьын вийыштым поген налын, нуным чылан ончылно намысыш пуртен да ырес дене нуным чапланен сеҥен.

¹⁶ Тыгеже мом кочмылан але йӱмылан, але иктаж-могай пайремым, у тылзым але шуматкечым палемдымылан тендам тек нигӧ ок титакле.

¹⁷ Тиде – мо лийшашын ӱмылжӧ веле, а кап – Христосын.

¹⁸ Кӧ еҥ ончылно ӱҥышыла кояш тӧча, Суксылан кумалмым йӧрата да уждымо кончымашыж дене кугешнылеш, тыгай-влак кокла гыч тендам нигӧ ынже ондале. Айдеме ушышт дене нуно арам моктанат,

¹⁹ вуй дене – Христос дене – кылышт уке, а Христосшо уло капым йыжыҥ да шӧн-влак дене уша, Юмын шонымыж почеш кушта.

^20-21 Тыгеракын, те Христос дене пырля колен улыда да тӱнясе тӱрлӧ пӱртӱс вий деч утленда гын, тугеже, молан тиде тӱнясе семын «Ит тӱкнӧ», «Ит коч», «Ит тӱкале» манын кӱштымым шуктеда?

²² Мо нерген тыге ойлат, чыла тиде кучылтмо дене пыта. Тыгай чарымаш – айдемын кӱштымыжӧ да туныктымыжо веле.

²³ Шке семын служитлымаш, шояк ӱҥышылык да капым индырымаш – чылажат ушанла коймаш гына, кап ден чонын йодмыштым шотыш налдымаш гына.