Ап.паш 9 - У Сугынь

9 ГЛАВА 1-19 Савлын вашталтмыже. 20-25 Савл Дамаскыште Поро Уверым каласкала. 26-31 Савл Иерусалимыште. 32-35 Энейын пареммыже. 36-43 Тавифам ылыжтымаш.

¹ А Савлын шӱмжӧ Господьын тунемшыж-влакым эше лӱдыкташ да пушташ шонен йӱлен. Тудо архиерей деке миен да,

² Господьын корныж дене кайыше-влакым кӧм муэш – пӧръеҥымат, ӱдырамашымат – Иерусалимыш пидын кондаш манын, Дамаскысе синагог-влаклан тудын деч серышым йодын налын.

³ Дамаск ола деке миен шушашыж годым корнышто Савл йыр кенета пылпомыш гыч волгыдо йолгалтын.

⁴ Тудо мланде ӱмбаке йӧрлын да йӱкын ойлымым колын: «Савл, Савл! Молан тый Мыйым поктылат?»

⁵ Савл йодын: «Господь, Тый кӧ улат?» Тудыжо вашештен: «Мый тыйын поктылмо Иисус улам. Куат ваштареш тылат каяш неле».

⁶ Савл лӱдмыж дене чытырен каласен: «Господь, мыйым мом ыштыктынет?» Господь ойлен: «Кынел да олашке кае, тылат мом ышташ кӱлеш – каласалтеш».

⁷ Савл дене пырля кайыше еҥ-влак тӱҥгылген шогеныт. Нуно йӱкым колыныт, а нигӧмат ужын огытыл.

⁸ Савл мланде ӱмбачын кынелын, но шинчажым почмеке, нигӧм ужын огыл. Тудым Дамаск олашке кид гыч вӱден намиеныт.

⁹ Кум кече тудо ужын огыл, кочкынат, йӱынат огыл.

¹⁰ Дамаскыште Ананий лӱман ик тунемше лийын. Господь тудлан кончымаш гоч каласен: «Ананий!» Тудо вашештен: «Теве мый, Господь!»

¹¹ А Господь тудлан ойлен: «Тарване, Вияш лӱман изуремыш кай да Иудан пӧртыштыжӧ Тарс гыч Савлым йод. Тудо кызыт кумалеш.

¹² Савл кончымашым ужын, тушто тудын деке Ананий лӱман пӧръеҥ пурен, ужаш тӱҥалже манын, тудын ӱмбаке кидым пыштен».

¹³ Ананий вашештен: «Господь, тиде айдеме нерген мый шуко еҥ деч колынам. Тыйын святой-влакетлан Иерусалимыште тудо шуко осалым ыштен,

¹⁴ Тыйын лӱметлан кумалше-влакым тыштат эрык деч посна кодаш архиерей-влак тудлан властьым пуэныт».

¹⁵ Но Господь тудлан каласен: «Кае, тиде айдеме – Мыйын ойырен налме ате. Тудо лӱмемым калык-влак, кугыжа-влак да Израиль эрге-влак ончылно увертарен шогаш тӱҥалеш.

¹⁶ Мыйын лӱмем верч Савл кунар шуко орланышаш, Мый тудлан чыла ончыктем».

¹⁷ Ананий каен, пӧртыш пурен, Савл ӱмбаке кидшым пыштен да каласен: «Савл изай, Господь – толмо корныштет тылат кончышо Иисус – мыйым колтен. Тыйын шинчат почылтшо да тый Святой Шӱлыш дене темалт манын, мый толынам».

¹⁸ Тунамак Савлын шинча ӱмбачше колшӱм волен кайыме гай лийын, шинчаже почылтын. Тудо кынелын, тынеш пурен,

¹⁹ кочкын да вийже пӧртылын. Савл тунемше-влак дене икмыняр кече Дамаскыште лийын

²⁰ да, Иисусым Юмын Эрге манын, синагоглаште тунамак каласкалаш тӱҥалын.

²¹ Колыштшо-влак чылан ӧрыныт да ойленыт: «Иисусын лӱмжылан кумалше-влакым Иерусалимыште тиде еҥ поктылын огыл мо? Тышкат тудо тыгай еҥ-влакым, пидын, архиерей-влак ончык наҥгаяш толын огыл мо?»

²² А Савлын ойлымыжо утларак да утларак вийым налын, Иисус – Христос улеш манын ончыктымыжо Дамаск олаште илыше иудей-влакым моткоч ӧрыктарен.

²³ Икмыняр жап гыч иудей-влак Савлым пушташ кутырен келшеныт.

²⁴ Но Савл шолып шонымыштым пален налын. Нуно, тудым пушташ манын, йӱдшӧ-кечыже олан чыла капкаж воктене ороленыт.

²⁵ А тунемше-влак, Савлым кугу комдеш шынден, йӱдым ола пырдыж гыч волтеныт.

²⁶ Савл Иерусалимышке толын да тысе тунемше-влак деке ушнаш тыршен. Туге гынат чыланат тудын деч лӱдыныт, тунемше манын ӱшанен огытыл.

²⁷ Но Варнава тудым пеленже налын, Апостол-влак деке намиен. Савлын корнышто Господьым ужмыжо, Господьын тудлан ойлымыжо да Савлын Дамаск олаште Иисус лӱм дене лӱдде ойлымыжо нерген каласкален.

²⁸ Савл нунын дене кодын да Иерусалимыште эрыкан коштын, Господь Иисусын лӱмжӧ дене лӱдде ойлен.

²⁹ Тыгак грек йылме дене ойлышо иудей-влак дене мутланен да ӱчашен, а нунышт тудым пушташ тӧченыт.

³⁰ Тидым пален налмеке, иза-шольо-влак тудым Кесарийыш ужатеныт да Тарсыш колтеныт.

³¹ А Иудей, Галилей да Самарий мучко черке-влак тынысан лийыныт, Господь деч лӱдын иленыт, кушкыныт да вияҥыныт, да Святой Шӱлыш кумылаҥдыме дене шукемыныт.

³² Теве, чыла вере коштын савырнышыла, Петр Лиддаште илыше святой-влак декат толын.

³³ Тушто тудо Эней лӱман ик еҥым вашлийын, тудыжо ынде кандаш ий вакшышыште йыжыҥдыме киен.

³⁴ Петр тудлан каласен: «Эней, тыйым Иисус Христос паремда, кынел да вакшышетым тӧрлате». Эней тунамак кынелын.

³⁵ Лиддаште да Саронышто илыше-влак чылан тудым ужыныт, Господь велке савырненыт.

³⁶ Иоппийыште Тавифа лӱман ӱдырамаш тунемше лийын, лӱмжӧ серна манмым ончыкта. Тудо порым ыштен шоген, йорло-влаклан эреак полшен.

³⁷ Тиде кечылаште Тавифа черланен да колен, тудым мушкыныт да кӱшыл пачашысе пӧлемыш пыштеныт.

³⁸ Лиддаже Иоппий деч мӱндырнак огыл улмаш. Петрын Лиддаште улмыж нерген колмеке, «Жапым шуйкалыде мемнан деке тол» манын йодаш, тунемше-влак тудын деке кок пӧръеҥым колтеныт.

³⁹ Петр тунамак нунын дене пырля толын. Толын шумекыже, тудым кӱшыл пачашысе пӧлемыш пуртеныт. Петр деке шортшо тулык ӱдырамаш-влак лишемыныт, илымыж годым Тавифан ыштыме тувыр-влакым да ӱмбал вургемым ончыктеныт.

⁴⁰ Петр чыланыштымат луктын колтен. Вара сукалтен шинчын, кумалын да кийыше кап велке савырнен каласен: «Тавифа, кынел!» Тавифа шинчажым почын, вара Петрым ужын да кынел шинчын.

⁴¹ Кидым шуялтен, Петр тудлан кынелаш полшен, вара святой ден тулык вате-влакым ӱжын, нунын ончыко илыше Тавифам шогалтен.

⁴² Тидын нерген уло Иоппий мучко увер шарлен, шукышт Господьлан ӱшанаш тӱҥалыныт.

⁴³ Петр эше икмыняр жап Иоппийыште коваштым ийлыше Симон лӱман еҥ дене илен.