Ап.паш 8 - У Сугынь

8 ГЛАВА 2-3 Христослан ӱшаныше-влакым Савл шыгыремдылеш. 4-25 Самарийыште Поро Уверым каласкалымаш. 26-40 Филипп ден Эфиопий гыч толшо тӧра.

¹ А Савл Стефаным пуштмым сайлан шотлен. Тудо кечын Иерусалимысе черкым пеш чот шыгыремдылаш тӱҥалыныт, да Апостол-влак деч молышт чылан Иудейысе да Самарийысе тӱрлӧ верлашке шаланен каеныт.

² Юмым пагалыше пӧръеҥ-влак Стефаным тоеныт да тудын верч чот ойгырен шортыныт.

³ А Савл черкым индырен, пӧрт гыч пӧртыш коштын, пӧръеҥ ден ӱдырамаш-влакым шӱдырен наҥгаен да казаматыш петырыктен.

⁴ Тыгеракын, шаланен кайыше-влак Поро Уверым каласкален коштыныт.

⁵ Филипп Самарийысе олаш толын да тысе-влаклан Христос нерген увертарен.

⁶ Филиппын ойлымыжым колын да палдарыше палым ыштымыжым ужын, чылан тудым ик еҥ семын тӱткын колыштыныт.

⁷ Вет осал шӱлыш кучыман-влак кокла гыч шукыштын кӧргышт гыч, чот варгыжын, осал шӱлыш-влак лектыныт, а йыжыҥдыме да окшак-влак шукышт паремыныт.

⁸ Тудо олаште моткоч куаненыт.

⁹ Тыште Симон лӱман ик пӧръеҥ кужу жап юзыланен, кугу еҥ улам манын ӱшандарен да Самарийысе калыкым ӧрыктарен.

¹⁰ Изижат-кугужат тудым кумылын колыштыныт да «Тиде айдеме – Юмын кугу куатше» манын ойленыт.

¹¹ Тудо шуко жап нуным юзыланымыж дене ӧрыктарен, садлан нуно тудым колыштыныт.

¹² Но Юмын Кугыжаныш да Иисус Христосын лӱмжӧ нерген Поро Уверым каласкалыше Филиппын ойлымыжлан ӱшанаш тӱҥалмеке, пӧръеҥат, ӱдырамашат тынеш пуреныт.

¹³ Симон шкежат ӱшанен да, тынеш пурымеке, Филипп деч кораҥын огыл, палдарыше кугу пале ден чудым ужынат, чот ӧрын.

¹⁴ Юмын шомакым самарий калыкын шӱмыш пыштен вашлиймыштым колмеке, Иерусалимыште улшо Апостол-влак нунын дек Петр ден Иоанным колтеныт.

¹⁵ Ӱшаныше-влак Святой Шӱлышым налышт манын, Петр ден Иоанн, толмекышт, нунын верч кумалыныт,

¹⁶ вет Святой Шӱлыш нунын кокла гыч нигӧн ӱмбакат але волен огыл улмаш, нуно Господь Иисус лӱм дене тынеш пуртымо гына лийыныт.

¹⁷ Вара ӱмбакышт Петр ден Иоанн кидым пыштеныт, да нуно Святой Шӱлышым налыныт.

¹⁸ Апостол-влакын кидым пыштымышт гоч Святой Шӱлыш пуымым ужынат, Симон нунылан оксам конден

¹⁹ да ойлен: «Мыламат тыгай властьым пуыза: мыят кӧн ӱмбаке кидым пыштем, тудо Святой Шӱлышым налже».

²⁰ Но Петр тудлан каласен: «Тек тыйын оксат тый денет пырля пыта: тый Юмын пӧлекшым оксала налаш шоненат!

²¹ Тиде пашаште нимогай ужашетат уке. Юмын ончылно тыйын шӱмет чын огыл.

²² Тыгеже, тыгай осалет деч кораҥ да Юмым сӧрвале, ала Тудо шӱм шонымо титакетым кудалта.

²³ Тыйым кочо шекш дене темалтшым да чын огылын кепшылже дене пидмым ужам».

²⁴ Симонжо вашештен: «Тендан каласыме гыч нимоат мылам ынже логал манын, те мыйын верч Господьым сӧрвалыза».

²⁵ Господь нерген таныклымеке да Тудын шомакшым ойлымеке, Апостол-влак мӧҥгеш Иерусалимыш каеныт да корнышто Самарийысе шуко илемлаште Поро Уверым каласкаленыт.

²⁶ Икана Господьын Суксыжо Филипплан каласен: «Кынел да кечывалвелыш, Иерусалим гыч Газашке кайыме тымык корнышко, лек».

²⁷ Тудыжо каяш тарванен. Тиде жапыште корно дене Эфиопийысе ик евнух каен. Тудо Кандакиян – Эфиопийысе ӱдырамаш кугыжан – полатыштыже кугу еҥ лийын, ӱдырамаш кугыжан чыла погыжлан вуйын шоген. Иерусалимыш кумалаш толын улмаш,

²⁸ а кызыт мӧҥгеш каен, орваште шинчен да пророк Исаиян книгажым лудын.

²⁹ Филипплан Шӱлыш каласен: «Тиде орва деке лишем да воктеныже кай».

³⁰ Филипп куржын миен да орваште шинчыше еҥын пророк Исаиян книгажым лудмо йӱкым колын. Филипп йодын: «Лудметым умылет мо?»

³¹ Тудо вашештен: «Иктаж-кӧ мылам ок умылтаре гын, кузе умылен кертам?» Вара тудо Филиппым пеленже орвашке шинчаш йодын.

³² А Возымашым лудмо шомакше тиде улмаш: «Тудым шорык семын шӱшкылаш наҥгаеныт, межым тӱредше-влак ончылно кузе пача йӱкым ок лук, Тудат тугак шке умшажым почын огыл.

³³ Тудым ӱлыкӧ шындымаште Тудын чын судшо налалтын. Тукымжо нерген кӧ каласа? Вет илышыже мланде ӱмбач налалтеш».

³⁴ Филипплан евнух ойлен: «Поро лий, мыланем каласе: кӧн нерген пророк тыге ойла? Шкеж нерген але иктаж-кӧ весе нерген?»

³⁵ Возымашын тиде шомакше гыч тӱҥалын, Филипп тудлан Иисус нерген Поро Уверым ойлен.

³⁶ Корно дене эртымышт годым нуно вӱд воктеке миен шуыныт. Евнух ойлен: «Теве вӱд. Мыйым тынеш пурташ чарак уло мо?»

³⁷ А Филипп тудлан вашештен: «Уло шӱмет дене ӱшанет гын, тынеш пурташ лиеш». Евнух каласен: «Иисус Христос – Юмын Эрге манын ӱшанем».

³⁸ Вара орвам чараш кӱштен. Филиппат, евнухат орва гыч воленыт, коктынат вӱдыш пуреныт, да Филипп тудым тынеш пуртен.

³⁹ Вӱд гыч лекмекышт, Святой Шӱлыш евнух ӱмбаке волен, а Господьын Суксыжо Филиппым тушеч наҥгаен. Евнух тудым ынде ужын огыл, куанен, шке корныж дене каен.

⁴⁰ А Филипп Азотышто улмыжым ужын да, Кесарийыш миен шумешкыже, эртышыжла, чыла олалаште Поро Уверым каласкален.