Ап.паш 7 - У Сугынь

7 ГЛАВА 1-53 Стефанын Синедрионышто ойлымыжо. 54 – 8:1 Стефаным пуштмаш.

¹ Тунам архиерей йодын: «Тиде титаклымаш чын мо?»

² Но Стефан ойлаш тӱҥалын: «Иза-шольо ден ача-влак, колыштса. Кунам мемнан Авраам ачана але Месопотамийыште лийын да Харраныш эше куснен огыл улмаш, тудлан чапланыше Юмо кончен

³ да каласен: ”Шке мландет гычат, шке тукымет гычат, [шке ачатын суртшо гычат] лек да Мыйын ончыктымо мландышке кай”.

⁴ Тунам Авраам Халдей мланде гыч лектын да Харраныште илаш тӱҥалын. Ачаже колымеке, тудым Юмо тушечын тендан кызыт илыме тиде мландышке кусарен.

⁵ Авраамлан йолкопа лопкыт мландымат пуэн огыл, но тиде мландым тудлан да урлыкшылан пуаш сӧрен. Тунам Авраамын йочаже але лийын огыл.

⁶ Юмо каласен: ”Тыйын тукымет йот мландыште ӧрдыж еҥ семын илаш тӱҥалеш, тудым кулыш савырат, ныл шӱдӧ ий шыгыремдылыт.

⁷ Но Мый, – манын Юмо, – тудым кул семын кучышо калыкым судитлем, тылеч вара тукымет тушеч кая да тиде верыште Мыланем служитлаш тӱҥалеш”.

⁸ Вара Юмо Авраамлан пӱчмӧ йӱлам шуктымо сугыньым пуэн. Тылеч вара Авраам деч Исаак шочын, да кандашымше кечын тудо Исаак дене пӱчмӧ йӱлам эртарен. Исаакат Иаков дене тыгак ыштен, а Иаков мемнан латкок тӱҥ кугезыланна тидымак ыштен.

⁹ Тӱҥ кугезе-влак кӧранымышт дене Иосифым Египетыш ужаленыт, но Юмо тудын пелен лийын

¹⁰ да Иосифым чыла орлык деч утарен, кугу ушым пуэн да фараонын, Египет кугыжан, кумылжым тудын деке савырен. Фараонжо Иосифым Египетым да шкенжын чыла озанлыкшым вуйлаташ шогалтен.

¹¹ Шужымаш да кугу орлык уло Египет ден Ханаан мланде мучко шарленытат, ачана-влак кочкышым муын кертын огытыл.

¹² Египетыште кинде улмо нерген колмеке, тушко Иаков ачана-влакым икымше гана колтен.

¹³ А кокымшо ганалан Иосиф изаж-влаклан кӧ улмыж нерген каласен, да фараон Иосифын родо-тукымжо нерген пален налын.

¹⁴ Иосиф шкеж деке Иаков ачажымат, уло тукымжымат, чылаже шымле вич еҥым, ӱжаш колтен.

¹⁵ Иаков Египетыш куснен, тушан шкежат колен, мемнан ачана-влакат коленыт.

¹⁶ Нуным Сихемыш наҥгаеныт да Сихем Емморын эргыж-влак деч Авраамын ший дене тӱлен налме шӱгарыш пыштеныт.

¹⁷ Авраамлан Юмын товатлен сӧрымыжӧ шукталтшаш жап лишемме семын Израиль калык Египетыште кушкын да шукемын.

¹⁸ А вара вес кугыжа шогалын, тудо Иосифым пален огыл.

¹⁹ Тудо мемнан тукым ваштареш чояланен, азашт илыше ынышт код манын, нуным шуэн кодаш ӧкымлен, ачана-влакым шыгыремдылын.

²⁰ Тиде жапыште Моисей шочын, тудо Юмылан келшыше лийын. Тудым кум тылзе ачажын пӧртыштыжӧ ашненыт.

²¹ А вара, шуэн кодымеке, тудым фараонын ӱдыржӧ налын, шке эргыж семын ончен-куштен.

²² Египет калыкын уло шинчымашыжым Моисейлан туныктеныт. Тудо мутыштат, пашаштат уста лийын.

²³ А кунам Моисейлан нылле ий темын, шке тукымжым, Израиль эрге-влакым, миен ончалаш шонен пыштен.

²⁴ Израиль тукым кокла гыч иктыжлан осалым ыштымым ужмеке, тудым пыдал налын, орландарыме еҥ верч ӱчым шуктен, египет пӧръеҥым пуштын.

²⁵ Нуным Юмо тудын кидше дене утара манын умылат шонен, но нуно умылен огытыл.

²⁶ Вес кечынже, нунын кокла гыч кок еҥ кредалме годым, Моисей миен да сӧрасаш ӱжын: ”Те родо-тукым улыда, молан икте-весылан осалым ыштеда?”

²⁷ Но лишылжылан осалым ыштыше еҥ Моисейым шӱкалын да каласен: ”Кӧ тыйым мемнан вуйлатышылан да судьялан шогалтен?

²⁸ Теҥгече египет пӧръеҥым пуштмет семын ала тый мыйымат пушташ шонет?”

²⁹ Тыгай шомакым колмеке, Моисей тушечын куржын да Мадиам мландыште ӧрдыж еҥ семын илаш кодын, тушто тудын кок эргыже шочын.

³⁰ Нылле ий эртымеке, Синай курык воктенысе ир мландыште, йӱлышӧ иман вондерын тулыштыжо, тудлан Господьын Суксыжо кончен.

³¹ Тыгай кончымашым ужын, Моисей пеш ӧрын, а кунам ончалаш лишемын, Господьын йӱкшым колын:

³² ”Мый тыйын ача-кочат-влакын Юмышт, Авраамын Юмыжо, Исаакын Юмыжо, Иаковын Юмыжо улам”. Моисей лӱдмыж дене чытыраш тӱҥалынат, ончаш тоштын огыл.

³³ А Господь тудлан каласен: ”Тыйын шогымо верет – святой мланде, йолчиеметым кудаш.

³⁴ Мый калыкемым Египетыште шыгыремдылмым ужынам, тудын шортмыжым колынам да тудым утараш воленам. А ынде тол, Мый тыйым Египетыш колтем”.

³⁵ ”Кӧ тыйым вуйлатышылан да судьялан шогалтен?” манын, нуно Моисейым кораҥденыт. Но иман вондерыште кончышо Суксын полшымыж дене Юмо тудымак нуным вуйлаташ да эрыкыш лукташ колтен.

³⁶ Египет мландыште, Йошкар теҥызыште да нылле ий ир мландыште ӧрыктарыше паша ден палдарыше палым ыштен, Моисей нуным тушеч луктын.

³⁷ Тиде Моисеяк Израиль эрге-влаклан каласен: ”Юмо тыланда мыйын гай пророкым шкендан кокла гыч шогалта. Тудым колыштса.”

³⁸ Ир мландеш погынышо калык дене пырля Моисей лийын; Синай курыкышто тудлан ойлышо Суксо дене да мемнан ачана-влак дене тудо ир мландыште улмаш да, мемнан деке шукташ манын, илыше шомакым налын.

³⁹ Мемнан ачана-влак тудын мутшым ынешт колышт улмаш, тудым кораҥденыт да шӱмыштышт Египетыш пӧртылаш шонымашым кученыт.

⁴⁰ Нуно Ааронлан каласеныт: ”Мемнам вӱден кайыше юмо-влакым ыште. Мемнам Египет мланде гыч лукшо саде Моисей дене мо лийын, огына пале”.

⁴¹ Тунам самырык ӱшкыжла койшо шояк юмым ыштеныт да тудлан надырым пуэныт, шке кидышт дене ыштыме ӱзгар лӱмеш куан пайремым эртареныт.

⁴² А Юмо нунын деч савырнен да кавасе шӱдыр-влаклан кумалаш коден. Пророк-влакын книгаштышт тыге возымо: ”Израиль тукым, але те нылле ий ир мландыште лийме годым шӱшкылмӧ вольыкым да моло надырым Мыланем конденда?

⁴³ Молохын скинийжым да Ремфан юмыдан шӱдыржым те нумалында – кумалаш шкендан ыштыме сӱретдам пеленда наҥгаенда, сандене Мый тендам Вавилон вес могырыш кусарем”.

⁴⁴ Таныклымын скинийже ир мландыште мемнан ачана-влак пелен лийын. Тудыжо Моисейлан Ойлышын кӱштымыж почеш, Моисейын ужмо сын дене келшышын ыштыме улмаш.

⁴⁵ Тудым мемнан ачана-влак налыныт да, Юмын поктен колтымо калык-влак деч Навин Иисусын вуйлатымыж почеш тиде мландым сеҥен налмеке, скинийым тышке нумал конденыт. Давид годсо жап марте тыге лийын.

⁴⁶ Юмо Давид деке порын савырнен, да Иаков тукымын Юмыжлан илыме верым ямдылаш манын, Давид сӧрвален йодын.

⁴⁷ А Юмылан пӧртым Соломон ыштен.

⁴⁸ Но кид дене ыштыме пӧртлаште Кӱшнысӧ Юмо ок иле, пророк тыге ойлен:

⁴⁹ ”Пылпомыш – Мыйын престолем, мланде – Мыйын йол шындыме верем. Мыланем могай пӧртым чоҥеда, але могай верыште Мый канаш тӱҥалам? – ойла Господь. –

⁵⁰ Мыйын кидем огыл мо чыла тидым ыштен?”

⁵¹ Ойым колыштдымо-влак! Тендан дене пӱчмӧ йӱлам эртарыме, но шӱмда да пылышда Юмым палыдыме еҥ-влакын гаяк. Ачада-влак семынак теат Святой Шӱлышлан эре торешланеда.

⁵² Пророк-влак кокла гыч кӧм гына тендан ачада-влак поктылын огытыл? Нуно Чын Ыштышын толшашыж нерген ончылгоч увертарыше-влакым пуштыныт, а ынде те Тудым ужалыше да пуштшо лийында.

⁵³ Тыланда Суксо-влак гоч законым пуымо, а те тудым шуктен огыдал».

⁵⁴ Тидым колыштын, Синедрионышто шинчыше-влак ажгыненыт да пӱйыштым пурыныт.

⁵⁵ А Святой Шӱлыш дене тич темше Стефан пылпомышко ончалын, Юмын чапшым да Юмын пурла могырыштыжо шогышо Иисусым ужын

⁵⁶ да ойлен: «Теве мый почылтшо пылпомышым да Айдеме Эргым ужам, Тудо Юмын пурла могырыштыжо шога».

⁵⁷ Тунам нуно чот кычкыраш тӱҥалыныт, пылышыштым петыреныт да Стефан ӱмбаке ик еҥ семын керылтыныт.

⁵⁸ Нуно тудым ола деч ӧрдыжкӧ шӱдырен луктыныт да, пушташ манын, ӱмбакыже кӱм кышкаш тӱҥалыныт. А таныклыше-влак ӱмбал вургемыштым Савл лӱман самырык пӧръеҥын йол воктекыже кудаш пыштеныт.

⁵⁹ Стефан ӱмбаке кӱм кышкеныт, а тудыжо кумалын: «Господь Иисус, мыйын чонем нал».

⁶⁰ Вара пулвуйыш сукалтен, виян йӱк дене кычкыралын: «Господь! Тиде языкыштлан нуным ит титакле». Тыге каласымеке, тудо колен.