Ап.паш 4 - У Сугынь

4 ГЛАВА 1-22 Петр ден Иоанн Синедрион ончылно. 23-31 Христослан ӱшаныше-влакын кумалмышт. 32-37 Нунын чылажат иктеш лийын.

¹ Петр ден Иоаннын калыклан ойлымышт годым иерей да саддукей-влак, храм орол вуйлатыше нунын деке лишемыныт.

² Нуно сырыше лийыныт, вет Петр ден Иоанн калыкым туныктеныт, Иисусын ылыжмыж нерген каласкалыме дене колымаш гыч ылыжмым увертареныт.

³ Петр ден Иоанным руалтен кученыт, кас лийынат, эр марте казаматыш петыреныт.

⁴ А колыштшо-влак кокла гыч шукынжо нунын ойлымыштлан ӱшаненыт, ӱшаныше пӧръеҥже вич тӱжем нарыш шуын.

⁵ Вес кечынже Иерусалимыште иудей-влакын вуйлатышышт, калык кугурак-влак да закон туныктышо-влак погыненыт.

⁶ Тыштак архиерей Анна, тыгак Каиафа, Иоанн, Александр да архиерей тукым гыч молат лийыныт.

⁷ Петр ден Иоанным покшеке луктын шогалтеныт да йодыштыныт: «Могай куат дене але кӧн лӱм дене те тидым ыштенда?»

⁸ Тунам Петр, Святой Шӱлыш дене темалтын, нунылан ойлен: «Калык вуйлатыше да Израильысе кугурак-влак!

⁹ Таче мемнан деч черле еҥлан поро пашам ыштыме да тудын кузе пареммыж нерген вашмутым йодыт гын,

¹⁰ теат палыза, уло Израиль калыкат палыже: ыресеш тендан пудалыме, колымаш гыч Юмын ылыжтыме Назорей Иисус Христосын лӱмжӧ дене тиде айдеме ончылныда таза шога.

¹¹ Тендан, чоҥышо-влакын, йӧрдымыш лукмо, но пусак негызлан пыштыме кӱ – Тудо. Нигӧ весе утарен огеш керт,

¹² мемнам утарен кертше вес лӱмым тӱняште еҥ-влаклан пуымо огыл».

¹³ Петр ден Иоаннын лӱддымылыкыштым ужмеке, нунын тунемдыме да тыглай еҥ улмыштым умылымеке, йодыштшо-влак ӧрыныт, тыгодымак Иисус дене пырля лиймыштымат пален налыныт.

¹⁴ А воктенышт шогышо паремдыме еҥым ужын, ваштареш нимом каласен кертын огытыл.

¹⁵ Нунылан Синедрион гыч лекташ кӱштеныт да шке коклаштышт тыге мутланеныт:

¹⁶ «Нине еҥ-влак дене мыланна мом ыштыман? Нунын гоч чудо лийын, тиде раш, тудын нерген Иерусалимыште илыше-влак чыланат ынде палат, а ме тыгай чудо лийын огыл манын огына керт.

¹⁷ Тиде Иисусын лӱмжӧ нерген нигӧлан ойлаш огыл манын, нуным лӱдыктен чарена, тунам калык коклаште тидын нерген увер утларак ок шарле».

¹⁸ Апостол-влакым мӧҥгеш ӱжмеке, Иисусын лӱмжӧ нерген нигунам ойлашат, туныкташат ок лий манын, нунылан пеҥгыдын кӱштеныт.

¹⁹ Но Петр ден Иоанн нунылан тыге вашештеныт: «Те шке шоналтыза: Юмо деч утларак тендам колыштына гын, Юмын ончылно тиде чын мо?

²⁰ Мом ужмына да мом колмына нерген ме ойлыде огына керт».

²¹ Каҥашаш погынышо-влак Петр ден Иоанным, тӱрлын лӱдыктен, эрыкыш колтеныт. Нуным орландараш йӧным муын огытыл, вет уло калык окшакын тӧрланымыжлан Юмым моктен,

²² вет кӧлан тиде паремдыме чудо лийын, тудлан нылле ий утла лийын.

²³ Эрыкыш лекмеке, Петр ден Иоанн шкеныштын-влак деке толыныт да архиерей ден калык кугурак-влакын мом ойлымыштым каласкаленыт.

²⁴ А колыштмеке, чыланат Юмо деке мутыштым ик ой дене савыреныт: «Пылпомышым, мландым, теҥызым да, мо тушто уло, чылажымат пӱрышӧ Господь Юмо!

²⁵ Тый мемнан Давид ачанам, шке тарзетым, Святой Шӱлыш дене тыге ойлыктенат: ”Чын Юмым палыдыме-влак молан толашат, молан тукым-влак кӱлдымӧ ойым пидыт?

²⁶ Тӱнясе кугыжа-влак кынелыныт, Господь да Тудын Христосшо ваштареш вуйлатыше-влак пырля погыненыт”.

²⁷ Чынжымак, Ирод ден Понтий Пилат, чын Юмым палыдыме-влак да Израильысе тукым-влак дене пырля тиде олаште Тыйын шӱрен палемдыме Святой Иисус Шочшет ваштареш погыненыт.

²⁸ Мом шке кидет да шонымет дене Тый ончылгоч палемденат, нуно тудым шуктеныт.

²⁹ А кызыт, Господь, нунын лӱдыктылмыштым ончал да тарзет-влаклан Тыйын шомакетым лӱдде ойлаш вийым пу.

³⁰ Кидетым шуялте, тек черле-влак паремыт, тек Тыйын Святой Иисус Шочшетын лӱмжӧ дене палдарыше пале да ӧрыктарыше паша-влак ышталтыт».

³¹ Кунам нуно кумалмым чарненыт, погынымо верышт чытырналтын, чылан Святой Шӱлыш дене темалтыныт да Юмын шомакым лӱдде ойлаш тӱҥалыныт.

³² Ӱшаныше-влак ик шӱм-чонан лийыныт, шкеныштын погышт гыч нигӧ нимом мыйын манын огытыл, а чыла нунын иктеш улмаш.

³³ Апостол-влак Господь Иисус Христосын ылыж кынелмыж нерген кугу куат дене таныкленыт, да чыланышт пелен Юмын кугу порылыкшо улмаш.

³⁴ Нунын коклаште иктат укеан лийын огыл, вет кӧн мландыже але пӧртшӧ лийын, ужаленыт, ужалыме оксажым

³⁵ Апостол-влакын йол воктекышт пыштеныт, да нуныжо, кӧлан мо кӱлын, кажнылан пуэденыт.

³⁶ Теве Кипреш шочшо Иосий лӱман Левий тукым еҥ улмаш, тудым Апостол-влак Варнава манын лӱмденыт, вес семынже «лыпландарымашын эргыже» лиеш.

³⁷ Тудын пасужо улмаш. Иосий пасужым ужален, оксажым конден да Апостол-влакын йол воктекышт пыштен.