Ап.паш 3 - У Сугынь

3 ГЛАВА 1-10 Окшак еҥым паремдымаш. 11-26 Храмыште Петрын ойлымыжо.

¹ Петр ден Иоанн индешымше шагатыште кумалме жаплан храмыш каеныт.

² Тушто шочынак окшак еҥ лийын. Тудым кече еда храмын Сӧрал манме капка воктеке нумал конденыт да пурышо-влак деч кӱчаш шынденыт.

³ Окшак еҥ храм деке лишемше Петр ден Иоанным ужын да нунын деч кӱчен йодын.

⁴ Нуно тудым тӱсленрак ончалыныт, вара Петр каласен: «Мемнан ӱмбаке ончал».

⁵ Иктаж-мом пуат манын шонен, окшак еҥ нуным тӱткын ончен,

⁶ но Петр каласен: «Шием да шӧртнем уке, а мо мыйын уло, тылат тудым пуэм: Назорей Иисус Христос лӱмеш кынел да ошкыл».

⁷ Вара тудым пурла кид гычше кучен кынелтен, тунамак окшакын йолкопаже да йолшаклякаже вийым налыныт.

⁸ Тудо тӧрштен кынелын, йол ӱмбалныже шоген да кошташ тӱҥалын. А вара ошкылын, тӧрштылын да Юмым моктен, Апостол-влак дене пырля храмыш пурен.

⁹ Чыла калык коштмыжым да Юмым моктымыжым ужын.

¹⁰ Тиде еҥ храмын Сӧрал капкаже воктене ондакше кӱчен шинчыше улмым палымеке, тудын дене тыге лиймылан чот лӱдыныт да ӧрыныт.

¹¹ Паремдыме окшак еҥ Петр ден Иоанн деч кораҥын огыл, садлан калык ӧрмыж дене нунын деке Соломонын леведышан кудывечыже манме верыш писын чумырген.

¹² Тидым ужмеке, Петр калыклан ойлаш тӱҥалын: «Израильын пагалыме еҥже-влак! Молан те тидлан ӧрыда? Молан мемнан ӱмбаке ончеда, пуйто ме тудын кошташ тӱҥалмыжым шке вийна але порылыкна дене ыштенна?

¹³ Авраамын, Исаакын, Иаковын Юмышт, ачана-влакын Юмышт, Иисусын, шке Шочшыжын, чапшым нӧлтен. Те Тудым пушташ пуэнда, эрыкыш лукташ пунчалше Пилат ончылно Тудын деке тупынь савырнен улыда.

¹⁴ Тудо Святой да Чын Ыштыше улмаш, но те Тудын деч кораҥында да еҥым пуштшым эрыкыш колташ йодында,

¹⁵ те илышым Пуышым пуштында, но Юмо Тудым колымаш гыч ылыжтен, тидлан ме танык улына.

¹⁶ Иисусын лӱмжылан ӱшанымылан кӧра тендан ужмо да палыме еҥ паремын, Иисусын пуымо ӱшанымаш тудым тендан ончылан тӱрыс тазам ыштен.

¹⁷ Туге гынат, иза-шольо-влак, палем: те да вуйлатышыда-влак мом ыштымыдам палыде ыштенда.

¹⁸ Тыге Юмо, Шкенжын чыла пророкшо-влак гоч мом увертарен, тудым шуктен: Христос орланен колышаш улмаш.

¹⁹ Тугеже, языкда ӱштылалтше манын, языкдам касарыктыза да Юмо деке савырныза.

²⁰ Тек Господь деч тыланда кӧргӧ вийым ылыжтыше жап толеш, тек Тудо тыланда ончылгоч палемдыме Иисус Христосым колта.

²¹ Чыла тӧрлымӧ жап марте Тудо пылпомышто кодшаш. Тиде жап нерген чыла святой пророкшо гоч Юмо шукертсек ойла.

²² Ачана-влаклан Моисей каласен: ”Господь Юмына мыйын гай Пророкым шкендан кокла гыч тыланда шогалта, мом гына Тудо тыланда ойла, чыла шотыштат Тудым колыштса.

²³ Тудо Пророкын мутшым колыштдымо кеч-могай еҥ калык кокла гыч пытарыме лиеш”.

²⁴ Самуил деч тӱҥалын, пророк-влак чыланат, кӧ гына ойлен, нине кызытсе кече-влак нерген ончылгоч увертареныт.

²⁵ Те пророк-влакын да ачада-влаклан Юмын пуымо сугыньжын эргышт улыда. Сугыньым пуымо годым Юмо Авраамлан ойлен: ”Тыйын урлыкет гоч мландӱмбалсе чыла тукым суапландаралтеш”.

²⁶ Шкенжын Иисус Шочшыжым ылыжтымеке, Юмо кажныдам осал пашада деч кораҥдаш да благословитлаш Тудым эн ондак тендан деке колтен».