Ап.паш 28 - У Сугынь

28 ГЛАВА 1-10 Мальтыште. 11-16 Павел Римыш толеш. 17-31 Павел Римыште Иисус нерген ойла.

¹ Утлен кодмеке, островын Мальта лӱман улмыжым ме, [Павел дене пырля лийше-влак,] пален нална.

² Островышто илыше-влак мыланна кугу порылыкым ончыктеныт. Йӱр тӱҥалмылан да йӱштылан кӧра нуно тулым олтеныт да мемнам тушко ӱжыныт.

³ Павел укш оргажым поген, тулыш оптымыж годым, аяр кишке, шокшым шижын, тушеч лектын да тудын кидешыже кечалтын.

⁴ Островышто илыше-влак, Павелын кидыштыже кишке кечымым ужмеке, икте-весыштлан ойленыт: «Тиде айдеме, очыни, еҥым пуштшо. Теҥыз гыч тудо утлен гынат, Судитлыше тудлан илаш пӱрен огыл».

⁵ Но Павел кишкым тулыш рӱзалтен шуэн, кишке деч тудлан нимогай эҥгек лийын огыл.

⁶ Павел пуалаш тӱҥалеш але кенета колышо йӧрлеш манын, еҥ-влак шоненыт, кужу жап тидым вученыт, да тудын дене нимогай эҥгек лийдымым ужмеке, шонымыштым вашталтеныт да тудым юмо маныныт.

⁷ Тиде вер деч тораште огыл остров вуйлатыше Публийын суртпечыже да пасужо-влак лийыныт. Тудо мемнам шкеж деке пуртен да кум кече поро кумылын унам ыштен.

⁸ Публийын ачаже шокшымужо да дизентерий дене черле киен. Павел тудын деке пурен, Юмылан кумалын да ӱмбакыже кидшым пыштен паремден.

⁹ Тыге лийме деч вара островышто илыше моло черле-влакат Павел деке толыныт да паремдыме лийыныт.

¹⁰ Нуно мыланна кугу пагалымашым ончыктеныт. Кунам каяш тарваненна, мыланна мо кӱлеш, чыла пуэныт.

¹¹ Кум тылзе гыч ме тышеч островышто телым эртарыше Диоскур манме александрийысе корабль дене теҥызыш лекна.

¹² Сиракузыш миен шумеке, тушто кум кече лийна.

¹³ Тушечын Ригийыш миен лекна, ик кече гыч кечывалвел мардеж пуаш тӱҥалынат, кокымшо кечын Путеолыш толна.

¹⁴ Тушто иза-шольо-влакым вашлийна, нуно мемнам шым кечылан шкенышт дене кодаш йодыныт. Тыге Римыш корнынам шуенна.

¹⁵ Тусо иза-шольо-влак, мемнан толмо нерген колмеке, Аппий форум ден Кум таверне дек шумеш вашлияш лектыныт. Павел, нуным ужмеке, Юмылан таум ыштен, да кумылжо нӧлталтын.

¹⁶ Римышке миен шумекына, шӱдывуй кучен петырыме-влакым воеводылан пуэн коден, а Павеллан тудым оролышо сарзе дене посна илаш эрыкым пуэныт.

¹⁷ Кум кече гыч Павел кугурак иудей-влакым ӱжын, погынымекышт, нунылан ойлен: «Иза-шольо-влак, шке калыкна ваштареш але ачана-влакын йӱлашт ваштареш нимом ыштен омыл гынат, мыйым Иерусалимыште руалтен кученыт да римлян-влакын кидышкышт пуэныт.

¹⁸ Нуно мыйым йодыштыныт, да пушташ йӧрышӧ нимогай титакем укеат, мыйым колтынешт ыле.

¹⁹ А иудей-влак тидын ваштареш лийыныт, сандене мылам кесарь ончылно судитлымым йодаш логалын. Туге гынат шке калыкем ӱмбаке нимогай титаклымашем уке.

²⁰ Чыла тидлан кӧра мый тендам ӱжынам да, тендам ужын, мутланынем ыле. Израиль калыкын ӱшанен вучымыжлан кӧра мыйым тиде кепшыл дене шинчырлыме».

²¹ Нуно тудлан ойленыт: «Иудей гыч ме тыйын нерген нимогай серышым налын огынал, тушеч ик иза-шольынат тыйын нерген нимом удам увертараш але ойлаш толын огыл.

²² Но кузе шонымет нерген шке дечет колышташ кӱлешлан шотлена. Чыла вере еҥ-влак тендан туныктымашда ваштареш ойлат манын, ме палена».

²³ Нуно Павел дене вашлийме кече нерген мутланен келшеныт да палемдыме кечын эшеат шукын тудын илыме верыш толыныт. Павел, эрдене эрак тӱҥалын, кас марте нунылан Юмын Кугыжаныш нерген умылтарен да таныклен, Моисейын законешыже да пророк-влакын возымашешышт эҥертен, Иисус нерген нуным ӱшандараш тыршен.

²⁴ Иктышт тудын ойлымыжым чынлан шотленыт, весышт ӱшанен огытыл.

²⁵ Коклаштышт келшыдымаш лектынат, нуно каяш тарваненыт, тунам Павел тиде шомакым гына ойлен: «Пророк Исаия гоч мемнан ачана-влаклан Святой Шӱлыш чыным каласен:

²⁶ ”Тиде калык деке кай да каласе: пылыш дене колыштыда, но огыда умыло, шинча дене ончеда, но огыда уж.

²⁷ Тиде калыкын шӱмжӧ пешкыдемын, пылышышт пыкше колеш, шинчаштым куменыт. Сандене шинчашт дене огыт уж, пылышышт дене огыт кол, шӱмышт дене огыт умыло, Мыланем нуным паремдаш манын, Мый декем огыт савырне”.

²⁸ Тыгеракын, пален лийза: Юмын утарымашыжым чын Юмым палыдыме-влаклан колтымо, нуно тудын нерген колышташ тӱҥалыт!»

²⁹ Павелын тидым ойлымекыже, шке коклаштышт чот ӱчашен, иудей-влак каеныт.

³⁰ Тыге Павел кок ий шке кӱшешыже илен да шкеж деке толшо-влакым чыланыштым пагален вашлийын,

³¹ Юмын Кугыжаныш нерген уверым шарен да Господь Иисус Христос нерген лӱдде да чарак деч посна туныктен.