Ап.паш 27 - У Сугынь

27 ГЛАВА 1-12 Павел Римыш кая. 13-38 Тӱтан. 39-44 Корабль шаланымаш.

¹ Мыланна Италийыш теҥыз корно дене каяш пунчалым лукмеке, Павелым да кучен петырыме моло икмыняр еҥым Август кесарьын полкысо Юлий лӱман шӱдывуйлан эскераш пуэныт.

² Ме адрамитысе корабльыш шична, корабль Асийын сер воктенысе верлам эртышаш ыле, да ме теҥызыш лекна. Мемнан дене пырля Фессалоника гыч македон Аристарх лийын.

³ Вес кечын Сидоныш толна. Павел деке Юлий поро кумылан лийын, тудлан йолташыж-влак деке каяш да нунын полшымышт дене пайдаланаш эрыкым пуэн.

⁴ Тушечын теҥызыш лекмекына, ваштареш пуышо мардеж деч аралалташ манын, Кипр велке кайышна,

⁵ Киликий ден Памфилий тураште теҥызым эртышна да Ликийысе Мирыш толын лекна.

⁶ Шӱдывуй тушто Италийыш кайыше александрийысе корабльым муын да тушко мемнам шынден.

⁷ Шуко кече эркын ийын, Книд марте пыкше миен шуна. Чараклыше мардежлан кӧра, Салмоным эртен, мардеж деч аралыше Крит деке мийышна.

⁸ Сер воктечын пеш нелын ончык каен, Ласей ола воктене верланыше Сай Пристань манме верыш толна.

⁹ Корнышто жап шуко эртенат, корабль дене ийын каяш лӱдыкшӧ лийын, пӱтым кучымо пагытат ынде эртен. Сандене Павел шижтарен:

¹⁰ «Йолташ-шамыч, мый ужам: мемнан корнына корабль ден сату-влаклан веле огыл, но мемнан илышланат эҥгекым да лӱдыкшым конден кертеш».

¹¹ Но шӱдывуйжо корабль виктарыше ден корабль озалан Павелын ойлымыж деч утларак ӱшанен.

¹² Тиде порт телым эртараш келшыше лийын огыл, сандене нунын кокла гыч шукышт умбаке каяш, Финикыш миен шуаш тӧчаш да телым тушто эртараш кӱлеш шоненыт. Финик – кас-кечывалвелыш да кас-йӱдвелыш почылтшо Критысе порт лийын.

¹³ Кечывалвел лыжга мардеж пуаш тӱҥалынат, шонымына шуэш манын ӱшаненыт, парусым нӧлталыныт да Крит воктене ийын каеныт.

¹⁴ Но икмыняр жап гыч остров вес могырым «Эвроклидон» манме тӱтан мардеж тарванен.

¹⁵ Мардеж корабльым пуэн наҥгаен, мардеж ваштареш тудо ийын кертын огыл, ме виктараш тӧчымым чарненна, да мемнам мардеж лупшен коштыктен.

¹⁶ Ме Клавда манме изи островын ӱшык могырышкыжо логалынна да пушым пыкше веле утарен кертынна.

¹⁷ Пушым корабльыш кӱзыктеныт. Корабль ынже шалане манын, тудым вӱраҥ кандыра дене пеҥгыдемденыт. Сирт ошманерышке логалме деч лӱдын, парусым волтеныт, да тугак ийын коштынна.

¹⁸ Мемнам тӱтан мардеж чот кышкылтынат, эрлашым сатум вӱдыш кышкаш тӱҥалын улыт.

¹⁹ А кумшо кечын шке кидна денак корабльысе ӱзгар-влакым кышкен пытаренна.

²⁰ Ятыр кече шӱдырат, кечат койын огыл, пеш тале тӱтан мардеж шучкыланен, сандене пытартышлан мемнан утаралт кодмылан чыла ӱшан йомын.

²¹ Иктат шукертсек кочкын огыл. Тунам Павел нунын покшеке лектын шогалын да каласен: «Пӧръеҥ-влак! Мыйым колышташ кӱлеш ыле да Крит гыч кайыме ок кӱл ыле, тунам тыгай нелылыкыш да эҥгекыш огына шу ыле.

²² А ынде тендам чулым лияш ӱжам, тендан кокла гыч иктат чонжым ок йомдаре, корабль гына шалана.

²³ Эртыше йӱдым мый декем Юмын Суксыжо толын. Мый Суксым колтышо Юмын еҥже да служитлышыже улам.

²⁴ Суксо ойлен: ”Павел, ит лӱд! Тый кесарь ончылно шогышаш улат, да тый денет пырля корабльыште лийше-влакым чылаштымат Юмо тылат пӧлеклен”.

²⁵ Садлан, пӧръеҥ-влак, чулым лийза. Кузе мыланем каласыме, тугак лиеш манын, мый Юмылан ӱшанем.

²⁶ Мемнам иктаж-могай островыш мардеж луктын кудалтышаш».

²⁷ А латнылымше йӱдым, мемнам Адриатик теҥыз мучко тӱтан мардеж коштыктымо годым, пелйӱд жапыште, ала-могай мланде деке лишеммым корабльыште ыштыше-влак шижыныт.

²⁸ А келгытым висымеке, коло важык улмым пален налыныт, вара изи кумдыкым эртымеке, угыч висеныт да латвич важык улмым паленыт.

²⁹ Кӱан верыш логалме деч лӱдынытат, вӱдыш корабльын шеҥгел ужашыж гыч ныл якырым кудалтеныт да, чот тургыжланен, волгыжмым вученыт.

³⁰ Нуно корабль гыч куржнешт улмаш да, пуйто корабль нер гыч якырым колташ манын, теҥызыш пушым волтеныт.

³¹ Павел сарзе-влаклан да шӱдывуйлан каласен: «Нине еҥ-влак кораблеш огыт код гын, те утлен огыда керт».

³² Тунам сарзе-влак пушым кылдыме кандырам руэныт да пушым теҥызыш колтеныт.

³³ Волгыжмо деч ончыч Павел чылаштым кочкаш ӱжын ойлен: «Таче латнылымше кече те чот тургыжланен вучеда да нимом огыда коч.

³⁴ Сандене кочса манын йодам, тидыже тыланда илышдам арален кодашлан кӱлеш. Тендан вуйда гыч ик ӱп пырчат ок камвоч».

³⁵ Тидым каласымеке, киндым налын, чылан ончылно Юмылан таум ыштен, тодылын да кочкаш тӱҥалын.

³⁶ Тунам чылан кумылаҥыныт да шкештат кочкыныт.

³⁷ Ме корабльыште чылаже кок шӱдӧ шымле куд еҥ лийынна.

³⁸ Кочмеке, корабльым куштылемдаш манын, шыдаҥым теҥызыш кышкеныт.

³⁹ У кече тӱҥалмеке, мландым пален кертын огытыл, а тайылан иксам ужыныт да лиеш гын, корабльым тушко лишемдаш шоненыт.

⁴⁰ Якырым нӧлталмеке, нуно теҥызыш лектыныт, кӱсмен кандырам мучыштареныт, ончыл парусым мардеж почеш нӧлталыныт да сер велке ийыныт.

⁴¹ Ошманерыш логалыныт, да корабль таляка вереш шинчын, нерже пижын да тарванен кертын огыл, а шеҥгелжым виян толкын шалаташ тӱҥалын.

⁴² Кучен петырыме кокла гыч, ийын лектын, нигӧ ынже курж манын, сарзе-влак чыланыштым пуштнешт улмаш.

⁴³ Но Павелым шӱдывуй утарен кодынеже улмаш, сандене шонымыштым ышташ чарен, а ийын моштышо-влаклан эн ондак вӱдыш тӧршташ да серыш лекташ кӱштен,

⁴⁴ молышт оҥа да корабль деч кодшо ужашла дене сер марте лекшаш улыт улмаш. Тыге чылан серыш утаралт лектыныт.