Ап.паш 26 - У Сугынь

26 ГЛАВА 1-32 Павел Агриппа ончылно ойла

¹ Павеллан Агриппа каласен: «Тый кызыт шкендым арален ойлен кертат». Тунам Павел кидым нӧлталын да шкенжым арален ойлаш тӱҥалын:

² «Агриппа кугыжа! Иудей-влакын чыла титаклымышт ваштареш таче тыйын ончылнет аралалт кертмемлан шкемым пиаланлан шотлем,

³ вет тый иудей-влакын илыш-йӱлаштым, ӱчашыме йодышыштым сайын палет. Сандене мыйым чытен колышт манын йодам.

⁴ Шке калыкем коклаште да Иерусалимыште рвезем годсекак мыйын кузе илымем чыла иудей-влак тӱҥалтыш гычак палат.

⁵ Мый фарисей лийынам да мемнан ӱшанымашнан эн пеҥгыде туныктымыж почеш иленам. Мыйым шукертсек палат; шонат гын, нуно тидым таныклен кертыт.

⁶ Ачана-влаклан Юмын сӧрымыжлан мый ӱшанем, сандене кызыт суд ончылно шогем.

⁷ Тиде сӧрымашын шукталтмыжлан ӱшаным пыштен, мемнан калыкын латкок тукымжо йӱдшӧ-кечыже Юмылан тыршен служитлат. Тиде ӱшанлан, Агриппа кугыжа, иудей-влак мыйым титаклат.

⁸ А мо? Колышым Юмын ылыжтымыжым те ӱшанаш лийдымылан шотледа мо?

⁹ Назорей Иисусын лӱмжӧ ваштареш шуко ыштышаш улам манын, мыят шоненам.

¹⁰ Тидымак мый Иерусалимыште ыштенам: архиерей-влак деч тидлан эрыкым налмеке, шуко святой еҥым казаматыш шынденам, а кунам нуным пуштеденыт, мый тидлан йӱкем пуэнам.

¹¹ Чыла синагогышто мый нуным чӱчкыдын мут кучаш шогалтенам да святойым ӧкымеш мыскылыкташ тӧченам, пеш кугу шыдем дене вес кундемласе олалаштат поктылынам.

¹² Тидланак, архиерей-влак деч властьым да правам налын, Дамаскыш каенам.

¹³ Агриппа кугыжа, кечывал тура мый пылпомыш гыч йолгышо волгыдым корнышто ужынам. Волгыдыжо кече дечат чот йолген, тудо мыйын да пеленем кайыше-влак йыр волгалтарен.

¹⁴ Ме чылан мланде ӱмбаке йӧрлынна, вара еврей йылме дене ойлымо йӱкым колынам, тудо мылам манын: ”Савл, Савл, молан тый Мыйым поктылат? Куат ваштареш тылат каяш неле”.

¹⁵ Мый йодынам: ”Господь, кӧ Тый улат?” Тудыжо каласен: ”Мый тыйын поктылмо Иисус улам.

¹⁶ Кынел, йол ӱмбак шогал, тый Мыйын служитлышем лият, ужметым да тыланет ончыктышашемым таныклаш тӱҥалат. Тиде пашашке шогалташ Мый тыланет конченам.

¹⁷ Мый тыйым шке калыкетын кидше деч утарем, а кызыт, кунам тыйым чын Юмым палыдыме-влак деке колтем, нунын дечат утарем.

¹⁸ Тый нунын шинчаштым почат, нуным пычкемыш гыч волгыдо деке, сатанан озаланымыж деч Юмо деке савырет. Тунам Мылам ӱшанымышт дене нунын языкыштым Юмо кудалта да святитлыме еҥ-влак коклаште нуно верыштым налыт”.

¹⁹ Сандене, Агриппа кугыжа, мый пылпомышсо кончымылан ваштареш лийын омыл.

²⁰ Ондак Дамаскыште да Иерусалимыште илыше-влаклан, вара уло Иудей мланде мучко да чын Юмым палыдыме-влак коклаште, чыланат языкыштым касарыктышт да Юмо деке савырнышт манын, увертарен туныктенам да языкыштым касарыктымылан келшен толшо пашам ышташ ӱжынам.

²¹ Тидлан мыйым иудей-влак храмыште руалтен кученыт да пуштнешт ыле.

²² Но Юмо полшымо дене таче мартеат изиланат, кугуланат таныклен шогем, пророк-влакат, Моисеят мо нерген ончык ужын ойленыт, тудын нергенак мыят ойлем, а нимо весе нерген огыл:

²³ Христос орланен колышаш, колымаш гыч ылыжше кокла гыч икымше лийшаш да мемнан калыкланат, чын Юмым палыдыме-влакланат волгыдым увертарышаш ыле».

²⁴ Павелын тыге аралалт ойлымыж годым Фест йӱкым кугемден каласен: «Павел, тый ушым йомдаренат! Кугун тунеммет тыйым ушдымо лиймашке шукта».

²⁵ «Уке, моткоч пагалыме Фест, – манын тудо, – мыйын ушем каен огыл, чын мут ден ушан ойым ойлем.

²⁶ Кугыжа нине паша нерген пала, санденак мый тудлан вик ойлем. Нине паша гыч иктаж-мо тудлан палыдыме кодын манын, мый ом ӱшане. Тиде ӧрдыжтӧ лийын огыл.

²⁷ Агриппа кугыжа, тый пророк-влаклан ӱшанет? Мый палем, ӱшанет».

²⁸ Агриппа Павеллан каласен: «Христиан лияш тый мыйым изиш веле от ӱшандаре».

²⁹ Павел ойлен: «Изиш але шуко, но Юмым сӧрвалем: тый веле огыл, а таче мыйым колыштшо-влак чыланат – тиде шинчыр деч посна гына – мыйын гаемак лийышт».

³⁰ Павел тидым ойлымеке, кугыжа, вуйлатыше, Вереника да нунын дене пырля шинчыше-влак кынел шогалыныт

³¹ да, кайышыла, шке коклаштышт ойленыт: «Тиде еҥ пуштмым але казаматыште кучымым чыныш лукшо нимогай титакым ыштен огыл».

³² А Агриппа Фестлан каласен: «Кесарь ончылан судитлалташ ок йод гын, тиде еҥым эрыкыш колташ лиеш ыле». Тыге Павелым кесарь деке колташ вуйлатыше шонен пыштен.