Ап.паш 24 - У Сугынь

24 ГЛАВА 1-9 Павелым Феликс ончылно титаклымаш. 10-23 Павел шкенжым Феликс ончылно арален ойла. 24-27 Павел петырымаште.

¹ Вич кече гыч калыкын икмыняр кугуракше да Тертулл лӱман оратор дене пырля архиерей Ананий толын, нуно вуйлатышылан Павел ӱмбаке вуйым шийыныт.

^2-3 Павелым ӱжын кондымеке, Тертулл тудым титаклаш тӱҥалын да ойлен: «Пагалыме Феликс, ме тылат кӧра кужу жап шуйнышо тыныслыкым налынна, да тыйын тыршымет дене тиде калыкын илышыже пешак саемын. Ме тидым эре да чыла вере кугу таум ыштен вашлийына.

⁴ Тыйым шуко жап ынем кучо, поро лий, мемнам кӱчыкын да поро кумылын колышт.

⁵ Ме ужынна: тиде еҥ – пижедылше чер гай. Тудо уло тӱня мучко илыше иудей-влак коклаште пуламырым тарватыл коштеш да Назорей тӱшкам вуйлата,

⁶ храмымат шакшылаш тӧчен, сандене тудым кученна, шкенан законна почеш судитлынена ыле.

⁷ Но полк вуйлатыше Лисий толын да тудым мемнан кид гыч кугу вий дене шупшын налын,

⁸ тудым титаклыше-влаклан тый декет толаш кӱштен. Тудым йодыштын, мо шотышто титаклымынам тый шке чыла пален налын кертат».

⁹ Чыла тиде чын манын пеҥгыдемден, титаклымашке иудей-влакат ушненыт.

¹⁰ Вуйлатыше Феликс мут пуымым ончыктен, да Павел ойлаш тӱҥалын: «Шуко ий тиде калыкым чын судитлыметым пален, мый шкемын пашам кызыт эрыкан кумыл дене аралем.

¹¹ Иерусалимыш кумалаш толмемлан латкок кече деч шуко эртен огыл, тидым тый шкеат пален налын кертат.

¹² Мыйым храмыштат, синагогыштат, олаштат иктаж-кӧ дене ӱчашышым але калык пудыранымашым тарватышым ужын огытыл.

¹³ Мо шотышто нуно кызыт мыйым титаклат, тудым нимо денат пеҥгыдемден огыт керт,

¹⁴ но тыланет чоным почын ойлем: мыйын коштмо Корным нуно шояк туныктымаш маныт. Тудын дене коштын, мый ача-влакын Юмылан служитлем; законышто да пророк-влакын книгаштышт возымылан чылажланат ӱшанем.

¹⁵ Чын ыштыше-влакат, осалым ыштыше-влакат колымаш гыч ылыжыт манын, Юмылан ӱшанем уло. Нине титаклыше-влакат тидымак вучат.

¹⁶ Санденак Юмо да еҥ-влак ончылно яндар чонан лияш мый шкеат вийым пыштем.

¹⁷ Шуко ий эртымеке, мый шке калыкемлан окса полышым пуаш, тыгак пӧлекым кондаш толынам.

¹⁸ Тидым кондымо годым храмыште мыйым эрныме йӱлам эртышым ужыныт. Тушто погынышо еҥ тӱшкат, пудыранымашат лийын огыл.

¹⁹ Мыйым Асий кундем гыч толшо икмыняр иудей ужын, нунылан тыйын ончылно тыште шке лияш да, мыйын ваштареш иктаж-мошт уло гын, титаклаш кӱлеш ыле.

²⁰ Але тышке толшо-влак тек каласат: Синедрион ончылно шогымем годым мыйым мо шотышто титаканым муыныт?

²¹ Нунын коклаште шогымем годым йӱкым кугемден ойлымо нине шомакемым ала титакемлан шотлат: колышо-влакын ылыжмыштлан таче те мыйым титакледа».

²² Господьын корныж нерген сайын паленат, тидым колыштмеке, ончымо пашам Феликс вес жапыш кусарен да каласен: «Полк вуйлатыше Лисий толмеке, тендан пашадам ончен лектам».

²³ А шӱдывуйлан кӱштен: Павелым оролымаште кучаш, но икмыняр эрыкым пуаш да тудлан полшаш але тудын деке мияш лишылже-влак кокла гыч иктыланат чаракым ышташ огыл.

²⁴ Икмыняр кече гыч Феликс шочынак иудей улшо Друзилла ватыж дене пырля миен, Павелым кондаш еҥым колтен да Христос Иисуслан ӱшаныме нерген каласкалымым колыштын.

²⁵ Чын ыштыме, шкем кучен моштымо да ончыкылык судитлымаш нерген Павелын ойлымыж годым Феликс лӱдын колтен да каласен: «Ынде кай, а кунам жапем лиеш, тыйым угыч ӱжам».

²⁶ Тыгодымак, эрыкым тӱлен налаш Павел оксам пуа манын, ӱшанен вучен. Садлан тудым кондаш чӱчкыдын колтен да тудын дене мутланен.

²⁷ Но кок ий эртымеке, Феликсым Порций-Фест алмаштен. А Феликс, иудей-влаклан йӧраш шонен, Павелым петырымашешак коден.