Ап.паш 21 - У Сугынь

21 ГЛАВА 1-16 Иерусалимыш миен коштмаш. 17-26 Павелын Иаков дене вашлиймыже. 27-36 Павелым руалтен кучымаш. 37 – 22:21 Павел калык ончылно шкенжым арален ойла.

¹ Нунын деч ойырлен кайымеке, теҥызыш лекна да вик Косыш мийышна, вес кечынже – Родосыш, тушечын Патараш кайышна.

² Тушто Финикийыш кайыше корабльым муна, тушко шична да кайышна.

³ Кипр кояш тӱҥалмеке, тудым шола могырым коден, ме Сирийыш ийна да Тирыш шуна. Тушто корабль сатум ястарышаш улмаш.

⁴ Ме тысе тунемше-влакым кычал муна, тушто шым кече лийна. Иерусалимыш кайыме ок кӱл манын, Шӱлышын палдарымыж почеш нуно Павеллан ойленыт.

⁵ Но, тушто нине кечым эртарымеке, ме лекна да кайышна. Чылан, ола гыч лектын, мемнам ватышт да йочашт дене пырля ужатен тольыч. Сер воктене сукен шинчын кумална.

⁶ Ме икте-весе дене чеверласышна да корабльыш шична, а нуно мӧҥгышкышт пӧртылыныт.

⁷ А ме Тир гыч Птолемаидаш корабль дене толна. Тыге мемнан теҥыз дене коштмо корнына мучашке шуо. Иза-шольо-влакым саламлымеке, нунын дене ик кече лийна.

⁸ Вес кечынже Павел да ме, тудын дене пырля лийше-влак, кайышна да Кесарийыш миен лекна, Поро Уверым каласкалыше Филиппын пӧртышкыжӧ пурышна да тудын дене кодна. Шым диакон гыч тудо иктыже улмаш.

⁹ Тудын марлан лекдыме да пророкла ойлышо ныл ӱдыржӧ лийын.

¹⁰ Тушто ятыр кечым эртарымына годым Иудей гыч Агав лӱман пророк толын.

¹¹ Тудо мемнан деке миен, Павелын ӱштыжым налын да шкенжын кид-йолжым пидын, вара каласен: «Святой Шӱлыш тыге ойла: иудей-влак Иерусалимыште тиде ӱштын озажым тыге пидыт да чын Юмым палыдыме-влакын кидышкыже пуат».

¹² Кунам тидым колна, тунам ме да тусо ӱшаныше-влак, Иерусалимыш ынже кай манын, Павелым сӧрвалышна.

¹³ Но тудо вашештен: «Мом те ыштеда? Молан шортыда да шӱмем шӱлыкаҥдеда? Мый Иерусалимыште Господь Иисусын лӱмжӧ верч пидме лияш веле огыл, а колашат ямде улам».

¹⁴ Тудо мемнан мутым колыштын огылат, сӧрвалымым чарнышна да ойлышна: «Тек Господьын эрыкше почеш лиеш».

¹⁵ Нине кече деч вара ме корныш ямдылалтна да Иерусалимыш кайышна.

¹⁶ Мемнан дене пырля Кесарий гыч икмыняр тунемше миен, нуно мемнам Кипр гыч толшо Мнасон деке уна лийын илаш намиеныт. Мнасон тунемше-влак кокла гыч ик эн ончычсо лийын.

¹⁷ Иерусалимышке толмекына, иза-шольо-влак мемнам куанен вашлийыныт.

¹⁸ Вес кечын Павел мемнан дене пырля Иаков деке каен. Тушко пресвитер-влак чылан миеныт.

¹⁹ Павел нуным саламлен да тудын служитлыме пашаж гоч Юмын мом ыштымыжым чын Юмым палыдыме-влак коклаште радамлен каласкален.

²⁰ Тудын ойлымыжым колыштмеке, нуно Юмым моктеныт да Павеллан ойленыт: «Ужат, иза, иудей коклаште ӱшанаш тӱҥалше-влак тӱжем дене улыт, нуно чыланат иудей закон верч тыршен шогат.

²¹ А тыйын нерген нуно шуко колыныт, пуйто чын Юмым палыдыме-влак коклаште илыше чыла иудейым Моисейын законжо деч кораҥаш туныктет, йочаштлан пӱчмӧ йӱлам эртараш да йӱла почеш илаш чарет.

²² Тыгеже мом ыштыман? Еҥ-влак тыйын толмет нерген пален налыт, векат, шукын погынат.

²³ Кузе ме тыланет каласена, туге ыште: мемнан коклаште Юмылан мутым пуышо ныл пӧръеҥ уло.

²⁴ Нуным пеленет нал да эрныме йӱлам нунын дене пырля эрте, ӱпыштым тӱредыктен кертышт манын, нунын олмеш тӱлӧ. Тыйын нерген ойлыштмаш чын огыл, тый шкежат закон почеш илет манын, тунам чылан пален налыт.

²⁵ А чын Юмым ондак палыдыме, вара ӱшанаш тӱҥалше еҥ-влакын пашашт шотышто ме ондакак пунчалынна. Тек нуно нимом тыгайым огыт шукто. Шояк юмылан пуымо надыр деч, вӱр деч, пич каен колышо вольык ден янлык деч да яжарланыме деч шкеныштым кучышт манын, нунылан серыш дене увертаренна».

²⁶ Тунам Павел нине ныл еҥым налын да вес кечынже нунын дене пырля эрныме йӱлам эртен, а вара храмыш пурен, эрналтме кече-влак кунам пытыме да кажне верч надырым кунам пуаш кӱлмӧ нерген увертарен.

²⁷ Нине шым кече мучашыш шумо годым Асийысе иудей-влак, Павелым храмыште ужын, уло калыкым пудыратеныт, ӱмбакыже кид дене шуыныт

²⁸ да кычкыреныт: «Израильысе еҥ-влак, полшыза! Тиде еҥак мемнан калык, мемнан закон да тиде вер ваштареш чыла вере туныкта, адакшым тышке эллин-влакымат пуртен да тиде святой верым амыртен!»

²⁹ Нуно Ефес гыч толшо Трофимым тудын дене пырля олаште тылеч ончыч ужыныт да, Павел тудым храмыш пуртен манын, шоненыт.

³⁰ Уло ола пудыранен, да чыла могырым калык куржын толын, Павелым руалтен кученыт, храм гыч тӱгӧ шупшын луктыныт да капка-влакым тунамак тӱкыленыт.

³¹ Нуно Павелым пуштнешт улмаш, но уло Иерусалим пудыранен манме увер полк вуйлатыше деке шуын.

³² Тудо тунамак, шӱдывуй ден сарзе-влакым налын, калык деке писын каен. Вуйлатыше ден сарзе-влакым ужмеке, Павелым кырымым чарненыт.

³³ Тунам полк вуйлатыше лишемын, Павелым кучен да кок шинчыр дене шинчырлаш кӱштен, вара йодын: «Кӧ тудо да мом ыштен?»

³⁴ Калык тӱшкаште икте иктым кычкырен, весе – весым, а вуйлатыше йӱк-йӱанлан кӧра нимом раш пален кертын огылат, Павелым крепостьыш наҥгаяш кӱштен.

³⁵ А кунам Павел тошкалтыш деке миен шуын, калык шыгыремдымылан кӧра сарзе-влаклан тудым нумал наҥгаяш логалын.

³⁶ Шуко еҥ почешышт каен да кычкырен: «Тудлан колымаш!»

³⁷ Крепостьыш пуртымо годым Павел полк вуйлатыше деч йодын: «Мылам иктаж-мом тылат каласаш лиеш мо?» А тудыжо манын: «Тый греклат моштет?

³⁸ Тугеже шукерте огыл пудыранымашым нӧлталше да ныл тӱжем саркуралан еҥым ир мландыш наҥгайыше саде египет еҥ отыл?»

³⁹ Павел вашештен: «Мый иудей улам, Киликийысе кумдан палыме Тарс олан гражданже. Тый дечет йодам: калыклан ойлаш мыланем эрыкым пу».

⁴⁰ Полк вуйлатыше келшен, да Павел тошкалтышке шогалын, калык ончылно кидшым нӧлталын, а кунам чылан шып лийыныт, нунылан еврейла ойлаш тӱҥалын: