Ап.паш 20 - У Сугынь

20 ГЛАВА 1-6 Павелын Македоний ден Грецийыш миен коштмыжо. 7-12 Колышо Евтихым ылыжтымаш. 13-16 Троада гыч Милитыш миен коштмаш. 17-38 Апостол Павел Ефес оласе пресвитер-влак дене чеверласа.

¹ Калык пудыранымаш пытымеке, Павел тунемше-влакым ӱжыктен, кумылаҥден ойлен, вара чеверласен да Македонийыш каен.

² Тусо верлам эртыме годым ӱшаныше-влаклан кумылаҥдыше мутым шуко ойлен, вара Грецийыш миен.

³ Тушто кум тылзе лийын, а кунам тудо Сирийыш кайынеже улмаш, шкенжын ваштареш иудей-влакын шолып кутырен келшымыштым пален налын да Македоний гоч пӧртылаш шонен пыштен.

⁴ Асий марте тудым Верий гыч Пиррын Сосипатр эргыже, Фессалоника гыч Аристарх ден Секунд, Дервий гыч Гаий, тыгак Тимофей, Асий гыч Тихик ден Трофим ужатеныт.

⁵ Нуно, ончык кайымеке, мемнам Троадаште вученыт.

⁶ А ме Шергинде кече пайрем деч вара Филипп гыч корабль дене каенна, вич кече гыч нунын деке Троадаш толынна, тушто шым кече лийынна.

⁷ Шуматкече эрлашын, тунемше-влакын киндым тодыл кочкаш погынымекышт, Павел погынышо-влак дене мутланен. Вес кечынже тудо тышеч каяш шонен, сандене пелйӱд марте ойлен.

⁸ Мемнан погынымо кӱшыл пӧлемыште шуко лампе лийын.

⁹ Окнаште Евтих лӱман самырык пӧръеҥ шинчен. Павел кужу жап ойлен, сандене Евтих чот мален колтен, омо авалтенат, кумшо пачаш гыч камвозын. Кунам тудым нӧлталыныт, колышо улмаш.

¹⁰ Павел тудын деке волен, ӱмбакше возын, тудым ӧндалын да каласен: «Ида тургыжлане, чонжо лектын огыл».

¹¹ Павел пӧлемыш пӧртылын, киндым тодыл кочкын, пешак кужун, волгыжаш тӱҥалмешке, мутланен, а вара лектын каен.

¹² А Евтихым илышым вӱден конденыт, тидыже чылам чот куандарен.

¹³ Ме ончыко тарванышна, корабльыш шична да Ассыш кайышна, тушто ме Павелым пырля налшаш улына ыле. Шкеже йолын каяш шоненат, мыланна тыге кӱштен каласен ыле.

¹⁴ Ме тудын дене Ассыште вашлийна, вара корабльыш шындышна да Митилиныш толна.

¹⁵ Тушечын кайышна да вес кечынже Хиос воктеке миен лекна, а эрлашынже Самосыш шуна, Трогиллийыште лиймеке, вес кечынже Милитыш мийышна.

¹⁶ Асийыште жапым йомдараш огыл манын, Павел Ефесым эртен каяш шонен пыштен. Йӧн лиеш гын, Павел Витлыгече пайремлан Иерусалимыш миен шуаш вашкен.

¹⁷ Ефесысе пресвитер-влакым ӱжаш манын, Павел Милит гыч еҥ-влакым колтен

¹⁸ да, кунам пресвитер-влак толыныт, каласен: «Асий кундемыш толмекем, тендан коклаштыда лиймем годым мый икымше кече гычак кузе иленам, те паледа.

¹⁹ Иудей-влак шолып кутырен келшымышт дене мыйым шуко нелылыкыш пуртеныт, но мый Господьын ӱҥышын илыше, шинчавӱд йӧре пашам ыштыше тарзыже лийынам.

²⁰ Тыланда мо гына пайдале лийын, тудын нерген ойлымо деч кораҥын омыл, а тендам чыла калык ончылнат, пӧртыштыдат туныктенам.

²¹ Иудей-влакымат, эллин-влакымат мый, языкыштым касарыктен, Юмо деке савырнаш да мемнан Господьна Иисус Христослан ӱшанаш тыршен ӱжынам.

²² А кызыт Шӱлыш мыйым кепшылтен, да Иерусалимыш каем. Мый денем тушто мо лиеш – ом пале.

²³ Но мыйым эрыкым йомдарымаш да нелылык вуча манын, Святой Шӱлыш чыла олаште палдара.

²⁴ Туге гынат мый шке илышем шкаланем шергаканлан ом шотло. Эн ондак шке пашам – Господь Иисусын мылам ӱшанен пуымо служитлыме пашам – куанен вораҥдарынем: Юмын порылыкшо нерген Поро Уверым каласкалымым шуктынем.

²⁵ Мый тендан дене лийынам да Юмын Кугыжаныш нерген каласкаленам, а тендан кокла гыч мыйым тылеч вара иктат угыч ок уж манын, мый кызыт палем.

²⁶ Сандене мый тыланда таче увертарем: тендан кокла гыч иктаж-кӧжӧ йомын пыта гын, мый титакан омыл,

²⁷ мый тендам Юмын уло эрыкше дене палдарыме деч чакнен омыл.

²⁸ Шкендан верч тыршыза, Шӱлышын тыланда вуйлаташ пуымо кӱтӱ верчат тыршыза, Господь Юмын шке Вӱржӧ дене налме Черкыжым кӱтыза.

²⁹ Мый палем: кайымекем тендан коклашке кӱтӱм чаманыдыме осал пире-влак пурат.

³⁰ Тунемше-влакым почешышт наҥгаяш манын, шкендан кокла гычат чыным пужен ойлышо-влак лектыт.

³¹ Сандене шекланен шогыза, шарныза: кум ий йӱдшӧ-кечыже шинчавӱд йӧре мый чарныде тендан кокла гыч кажныдам туныктенам.

³² Иза-шольо-влак, ынде мый тендам Юмылан да Тудын порылык шомакшылан ӱшанен пуэм. Тендам пеҥгыдемдаш Тудын куатше уло да святитлыме чыла еҥже-влак коклаште наследствым тыландат пуэн кертеш.

³³ Мый нигӧн шийжымат, шӧртньыжымат, вургемжымат ынем нал ыле.

³⁴ Шкеат паледа, мыланем да пеленем лийше-влаклан мо кӱлын гын, теве тиде кидем дене пашам ыштен налынам.

³⁵ Тыге пашам ыштен, черле-влаклан полшаш да Господь Иисусын ”Пуымыж годым айдеме налмыж годсо деч пиаланрак” манме шомакшым шарнаш кӱлмым мый чыла годымат тыланда ончыктенам».

³⁶ Тыге каласымеке, Павел сукен шинчын да нунын дене пырля кумалын.

³⁷ Тунам чыланат чот шортыныт, Павелым ӧндалыныт да шупшалыныт.

³⁸ Тудым кызыт пытартыш гана ужыт манын каласымыжлан эн чот ойгыреныт. Вара корабль марте ужатеныт.