Ап.паш 2 - У Сугынь

2 ГЛАВА 1-13 Святой Шӱлышын толмыжо. 14-41 Петрын ойлымыжо. 42-47 Ӱшаныше-влакын илышышт.

¹ Витлыгече пайрем толын шумеке, нуно чыланат пырля икоян лийыныт.

² Кенета пылпомыш гыч виян мардеж гай лӱшкымӧ йӱк шоктен да нунын погынымо уло пӧртым темен.

³ Нунылан йылмын-йылмын шелалтше тулора гай кончен, да кажныж ӱмбаке ик посна тулйылме волен.

⁴ Чыланат Святой Шӱлыш дене темыныт да моло йылме дене ойлаш тӱҥалыныт, мом Шӱлыш ойлаш пуэн, тудым увертареныт.

⁵ Иерусалимыште тӱнясе чыла калык кокла гыч толшо, Юмым уло чон дене пагалыше иудей-влак лийыныт.

⁶ Тиде йӱк лекмеке, калык погынен да чот ӧрын: кажныже шке йылмыж дене ойлымым колын.

⁷ Чылан ӧрыныт да икте-весыштлан ӧрмалген ойленыт: «Нине ойлышо-влакше чыланат Галилей гыч огытыл мо?

⁸ Кузе ме кажныже шкенан шочмо йылмынам колына?

⁹ Ме чылан: парфян калык, мидий калык, еламит-влак, Месопотамийыште, Иудейыште да Каппадокийыште, Понтышто да Асий кундемыште,

¹⁰ Фригийыште, Памфилийыште, Египетыште, Ливийын Кириней воктенысе ужашыштыже илыше-влак, Рим гыч толшо-влак, иудей-влак, Израильын Юмыжлан кумалше йот калык еҥ-влак,

¹¹ крит да араб калык – чылан ме Юмын кугу пашаж нерген шочмо йылмына дене ойлымыштым колына».

¹² Чылан пеш ӧрыныт, да, умылен кертде, икте-весылан ойленыт: «Мо тиде тыгай?»

¹³ А южышт игылт воштыл маныныт: «Нуно тамле йошкар аракам утыждене шуко йӱыныт».

¹⁴ А Петр моло латик Апостол дене пырля кынел шогалын, йӱкым кугемден ойлаш тӱҥалын: «Пагалыме иудей-влак, Иерусалимыште чыла илыше-влак! Мом ойлымем тӱткын колыштса, тидым пален лийза:

¹⁵ нине еҥ-влак тендан шонымыда семын йӱшӧ огытыл, вет кызыт улыжат кече тӱҥалмылан кумшо шагат веле.

¹⁶ Мом те ужыда, тудым пророк Иоиль гоч ончылгоч каласыме:

¹⁷ ”Пытартыш кечылаште, – ойла Юмо, – Мый чыла айдеме ӱмбаке Шӱлышемым опталам, тунам тендан эргыда ден ӱдырда-влак пророкла ойлаш тӱҥалыт, рвезе-влак тӱрлӧ кончышым ужыт, а шоҥго пӧръеҥ-влак – омым.

¹⁸ Тудо кечылаште Шкемын Шӱлышем Мый тарзе-влакем ӱмбаке опталам, – пӧръеҥынат, ӱдырамашынат, – чыланат пророкла ойлаш тӱҥалыт.

¹⁹ Ӧрыктарыше пашам кӱшнӧ пылпомышто, палдарыше палым ӱлнӧ, мландӱмбалне, ончыктем: вӱрым, тулым да шикш тӱргымым.

²⁰ Господьын кӱдыратле чапле кечыже толмо деч ончыч кече пычкемышалтеш, тылзе вӱрыш савырна;

²¹ а, полышым йодын, Господьын лӱмжым ӱжшӧ кеч-кӧат утарыме лиеш”.

²² Израильын пагалыме еҥже-влак, тиде ойлымем колыштса: Назорей Иисус тыланда Юмын ойырен налме Еҥже лийын. Те шкеат паледа: тидым Юмо тӱрлӧ чудым, ӧрыктарыше пашам да палдарыше палым тендан коклаштыда Тудын гоч ыштымыж дене ончыктен.

²³ Тудо тендан кидышкыда Юмын ончылгоч шонен пыштымыже да палымыже семын пуалтын, а те Тудым налында да законым палыдыме-влакын полшымышт дене ыресеш пудален пуштында.

²⁴ Но Юмо Тудым ылыжтен да колымашын орлыкшо гыч утарен – колымашын Тудым кучен кертше вийжат лийын огыл.

²⁵ Давид Тудын нерген тыге ойлен: ”Шке ончылнем Господьым эре ужам, мыланем тайнышташ огыл манын, Тудо мыйын пурла могырыштем.

²⁶ Тидлан кӧра шӱмем куана, йылмем йывырта, капемат ончыкылыкым ӱшанен вучаш тӱҥалеш:

²⁷ Тый мыйын чонемым тамыкеш от кодо, святоетлан шӱйын кияш от пу.

²⁸ Тый мыланем илыш корным ончыктет, ончылнет мыйым куан дене темет”.

²⁹ Иза-шольо-влак, мемнан Давид кугезе кочана нерген тыланда тура каласаш лиеш: тудо колен, тудым тойымо, тудын шӱгарже але тачат мемнан дене.

³⁰ Пророк лийынат, Давид пален: Христосым тудын тукымжо гыч шогалташ да тудын престолышкыжо шындаш Юмо товатлен сӧрен.

³¹ Христосын ылыж кынелшашым тудо ончылгоч ужын да, чонжо тамыкеш кодымо ок лий, капше шӱйын кияш ок тӱҥал, манын ойлен.

³² Саде Иисусым Юмо ылыжтен, тидым ме чылан таныклена.

³³ Тыгеракын, Юмо Тудым пурла кидше дене кӱзыктен шынден. Иисусшо сӧрымӧ Святой Шӱлышым Ача деч налын да опталын, те кызыт тидым ужыда да колыда.

^34-35 Давидше пылпомышко кӱзен огыл, но тыге ойлен: ”Господь мыйын Господемлан каласен: Тыйын тушманет-влакым йол йымакет пыштымешкем, пурла велыштем шинче”.

³⁶ Тыгеракын, чумыр Израиль калык пеҥгыдын палыже: Иисусым, Кӧм те ыресеш пудаленда, Юмо Господьым да Христосым ыштен».

³⁷ Тиде ой шӱмешышт чот логалын. Нуно Петр ден моло Апостоллан каласеныт: «Иза-шольо-влак, мом мыланна ышташ?»

³⁸ А Петр нунылан ойлен: «Юмо языкдам кудалтыже манын, язык деч кораҥза да Иисус Христос лӱмеш чыланат тынеш пурыза, тунам пӧлек семын Святой Шӱлышым налыда.

³⁹ Мемнан Господь Юмына кӧм гына ӱжеш, чылаштлан Святой Шӱлышым пуаш сӧрен: тыландат, шочшыландат, тораште илыше-влакланат».

⁴⁰ Тыгак шуко моло кумылаҥдыше шомак денат Петр ӱшандарен ойлен да каҥашым пуэден. Тудо каласен: «Тиде пужлышо тукым деч утаралтса».

⁴¹ Тыгеракын, тудын шомакшым порын вашлийше-влак тынеш пуреныт, да ӱшаныше-влак тиде кечын кум тӱжем наре еҥлан ешаралтыныт.

⁴² Ӱшаныше-шамыч, Апостол-влакын туныктымыштым колыштын, изак-шӱжаракла иленыт, киндым тодылын кочкаш да кумалаш погыненыт.

⁴³ Чыла еҥ лӱдын, Апостол-влак гоч Иерусалимыште ӧрыктарыше паша да палдарыше пале шуко лийын.

⁴⁴ Но ӱшаныше-влак пырля лийыныт да чылажат нунын иктеш улмаш.

⁴⁵ Нуно суртыштым да погыштым ужаленыт, оксажым кажнылан кӱлмӧ семын пайлен пуэденыт,

⁴⁶ кече еда храмыште икоян погыненыт, мӧҥгыштышт киндым пырля тодылыныт, йывыртен да тыматле шӱм дене кочкыныт.

⁴⁷ Нуно Юмым моктеныт, да уло калык нунын ӱмбаке порын ончен. Господь утарыме-влакым кече еда Черкыш ешарен шоген.