Ап.паш 17 - У Сугынь

17 ГЛАВА 1-9 Павел ден Сила Фессалоникыште. 10-15 Павел ден Сила Верийыште. 16-34 Павел Афиныште.

¹ Амфиполь ден Аполлонийым эртымеке, нуно Фессалоникыш толын лектыныт, тушто иудей-влакын синагогышт лийын.

² Павел молгунамсе семынак тушко пурен да нунын дене, Возымашын шомакше-влакым кучылтын, кум шуматкече мутланен,

³ нунылан Возымашым умылтарен. Христос кугу орлыкым ужшаш да колымаш гыч ылыж кынелшаш улмаш манын ончыктен. Тудо ойлен: «Мыйын тыланда увертарыме Иисус – Христос улеш».

⁴ Колыштшо-влак кокла гыч южышт ӱшанаш тӱҥалыныт да Павел ден Сила деке ушненыт, тыгак Израильын Юмыжлан кумалше шуко эллин да пагалыме ятыр ӱдырамаш ушнен.

⁵ Но ӱшаныдыме иудей-влакым кӧранымаш авалтен, нуно оласе перныл коштшо икмыняр йӧрдымӧ еҥым почешышт наҥгаеныт, шуко калыкым погеныт, олаште тумам нӧлталыныт. Иасонын пӧртшӧ деке лишемыныт, Павел ден Силам калык ончык лукташ тыршеныт.

⁶ Но нуным муын огытылат, Иасоным да икмыняр иза-шольым оласе вуйлатыше-влак деке кучен конденыт да кычкыреныт: «Тӱням пудыратылше нине еҥ-влак ынде тышкат толыныт,

⁷ а Иасон нуным шкеж деке пуртен! Весым, Иисусым, кугыжалан шотлен, нуно чылан кесарьын кӱштымыж-влак ваштареш ыштат».

⁸ Тидым колын, калык да оласе вуйлатыше-влак пудыранаш тӱҥалыныт.

⁹ Нунышт Иасон да молышт деч ситыше оксам налыныт да колтеныт.

¹⁰ А Павел ден Силам иза-шольо-влак тунамак, йӱдым, Верийыш колтеныт. Тушко мийымеке, нунышт иудей-влакын синагогышкышт каеныт.

¹¹ Тысе-влак Фессалоникысе деч порырак лийыныт: нуно Христос нерген шомакым кугу кумыл дене колыштыныт да, тиде чынак тыге мо манын, Возымашым кече еда шымленыт.

¹² Шукынжо Иисуслан ӱшанаш тӱҥалыныт, тыгак эллин-влак кокла гыч кӱкшын аклыме ӱдырамаш-влакат, шуко пӧръеҥат ӱшаненыт.

¹³ Но Павел Верийыштат Юмын шомакым каласкала манын пален налмекышт, Фессалоникысе иудей-влак тушкат толыныт, калыкым тараташ да пудыраташ тӱҥалыныт.

¹⁴ Иза-шольо-влак Павелым тунамак теҥыз деке колтеныт, а Сила ден Тимофей кодыныт.

¹⁵ Иза-шольо-влак Павелым Афиныш шумеш ужатеныт. Вашкерак толышт манын, Сила ден Тимофейлан каласаш Павел ужатыше-влакым йодын, вара нунышт каеныт.

¹⁶ Афиныште нуным вучымыж годым Павел ужын: ола шояк юмо статуй дене тич темын, садлан чонжо моткоч пудыранен.

¹⁷ Синагогышто иудей-влак денат, Израильын Юмыжлан кумалше моло денат кутырен, уремыште вашлийме еҥ-влак денат кече еда мутланен.

¹⁸ Эпикурей ден стоик икмыняр философат тудын дене ӱчашаш тӱҥалын, да иктышт ойленыт: «Тиде арам ойлыштшо мом каласынеже?» Иисус да ылыжмаш нерген Поро Уверым Павелын каласкалымыжлан южышт ойленыт: «Тудо йот юмо-влак нерген увертарышыла коеш».

¹⁹ Павелым пырля налыныт, Ареопагыш конденыт да йодыныт: «Могай тиде тыйын каласкалыме у туныктымаш, ме тудын нерген колыштнена ыле.

²⁰ Ала-могай ондак колдымым тый пылышышкына пыштет, сандене ме палынена ыле, мо тиде тыгай?»

²¹ Афиныште илыше-влаклан, тыгак вес вер гыч тушко толшо-влаклан иктаж-мо нерген мутланен да иктаж-мом уым колыштын жапым эртараш пешак келшен.

²² А Павел Ареопаг покшелан шогалын да ойлен: «Афинысе калык! Тендан юмо-влакым чот жаплымыдам чыла гочат ужам.

²³ Ола мучко эртышемла да тендан кумалме вердам ончен коштшемла, ик жертвенникыште мый тыге возымым ужым: ”Палыдыме Юмылан”. Мый тыланда палыде аклыме Юмыда нергенак увертарем.

²⁴ Уло тӱням, тушто мо улшым пӱрышӧ Юмо, пылпомышын да мландын Господьшо, айдеме кид дене ыштыме храмлаште ок иле.

²⁵ Айдеме кид дене служитлымым Тудо ок йод, вет Тудлан нимоат огеш кӱл. Тудо Шкеак чылалан илышым, шӱлышым да молымат пуа

²⁶ да, чумыр мланде мучко илышт манын, ик вӱр гыч уло айдеме тукымым ыштен, чыла калыклан палемдыме жапыштым пӱрен да илыме верыштлан чекым ыштен.

²⁷ Юмым кычалын, лийме семын Тудын деке шижын лишемышт да муын кертышт. Вет Юмо мемнан кокла гыч икте дечат тораште огыл.

²⁸ Тудын дене ме илена, коштына, улына. Сылнымутым южо возышыда каласыме семын, ”ме Тудын тукымжо улына”.

²⁹ Тыгеракын, Юмын тукымжо улына гын, ме Тудым айдемын шонен лукмо да мастарлыкше дене ыштыме шӧртньӧ, ший але кӱ тӱс семын ужшаш огынал.

³⁰ Палыдымаш пагыт верч Юмо еҥ-влаклан мутым кучыктен огыл, а кызыт чыла вере чыла еҥлан, языкыштым касарыктен, Юмо деке савырнаш кӱшта:

³¹ Тудо кечым палемден, тиде кечынже тӱням чын дене, ончылгоч палемдыме Айдеме гоч судитлаш тӱҥалеш, тидым чылалан тиде Айдемым колымаш гыч ылыжтымыж дене ончыктен».

³² Колымаш гыч ылыжме нерген колмеке, иктышт игылт воштылыныт, а весышт ойленыт: «Тидын нерген тыйым вес ганат колыштына».

³³ Тыгеракын, Павел нунын кокла гыч лектын каен.

³⁴ А икмынярышт Павел деке ушненыт да ӱшанаш тӱҥалыныт. Нунын коклаште Ареопагысе каҥашыште ыштыше Дионисий, Дамарь лӱман ӱдырамаш да молат лийыныт.