Ап.паш 16 - У Сугынь

16 ГЛАВА 1-5 Павел ден Сила деке Тимофей ушна. 6-10 Павеллан Македоний гыч еҥ конча. 11-15 Филиппыште Лидиян Христос деке савырнымыже. 16-40 Филиппыште Павел ден Силам кучен петырымаш.

¹ Дервий ден Листраш Павел миен шуын. А тушто Тимофей лӱман ик тунемше лийын. Тудын аваже Христослан ӱшаныше иудей улмаш, но ачаже – эллин.

² Тимофей нерген Листрасе да Иконийысе иза-шольо-влак порын гына ойленыт.

³ Тудым Павел пырля налаш шонен. Тимофейын ачаже эллин улмым чылан паленыт, сандене тиде верлаште илыше иудей-влаклан кӧра тудын дене пӱчмӧ йӱлам эртарен.

⁴ Ола гыч олашке эртымышт годым нуно Апостол ден Иерусалимысе пресвитер-влакын лукмо пунчалышт нерген ӱшаныше-влаклан каласкаленыт да тудым шуктен шогаш кӱштеныт.

⁵ Тыге черке-влак ӱшанымаште пеҥгыдемыныт, да еҥышт кече еда ешаралтыныт.

⁶ Фригий ден Галатий мландым эртен кайымекышт, Святой Шӱлыш Асий кундемыште Христос нерген шомакым ойлаш пуэн огыл.

⁷ Мисий марте миен шумеке, нуно Вифинийыш каяш шоненыт, но Шӱлыш тидым ышташ пуэн огыл.

⁸ Мисийым эртымеке, нуно Троада олашке шуыныт.

⁹ Тыште йӱдым Павел кончымашым ужын. Тудын ончылныжо македоний еҥ шоген да йодын: «Македонийышке тол, мыланна полшо».

¹⁰ Павел кончымашым ужмеке, ме тунамак Македонийыш каяш ямдылалташ тӱҥална. Тушто илыше-влаклан Поро Уверым каласкалаш Господь мемнам ӱжеш манын, ме умылышна.

¹¹ Тыге ме, корабльыш шинчын, Троада гыч кайышна, вигак Самофракийыш миен лекна, а вес кечынже – Неапольыш,

¹² тушечын Филиппыш мийышна. Тиде – Македонийын икымше ужашысе ола, Римын колонийже. Тиде олаште ме икмыняр кечым эртарышна.

¹³ Шуматкечын ола гыч эҥер деке лекна, тушто кумалмаш лиеш манын шонышна. Ме шична да тышке погынышо ӱдырамаш-влаклан ойлышна.

¹⁴ Тушто Фиатира ола гыч улшо, Израильын Юмыжлан кумалше Лидия лӱман ӱдырамаш ыле, тудо шемалге-йошкар куэмым ужален илен. Лидия Павелым колыштын, да ойлымыжым шӱмышкыжӧ пышташ Господь тудын чонжым почын.

¹⁵ Лидиян да мӧҥгысыж-влакын тынеш пурымекышт, тудо мемнам шкеж деке ӱжын: «Те мыйым Господьлан поро чон дене ӱшанышылан шотледа гын, мыйын суртышкем илаш пурыза». Мемнам тыгак ыштыктен.

¹⁶ Икана кумалме верыш кайымына годым шинчанужшо шӱлышан ик тарзе ӱдырым корнышто вашлийна, ончык ужын моштымыж дене тудо озаж-влаклан кугу парышым конден.

¹⁷ Ӱдыр Павел почеш да мемнан почеш кычкырен коштын: «Нине еҥ-влак Кӱшнысӧ Юмын тарзыже улыт, нуно мыланна утаралтме корным увертарат!»

¹⁸ Шуко кече тудо тыге ыштен. Пытартышлан Павел шыдешкен савырнен да шӱлышлан каласен: «Тудын кӧргыж гыч лекташ Иисус Христосын лӱмжӧ дене тылат кӱштем». Шӱлыш тунамак лектын.

¹⁹ Тунам ӱдырын озаже-влак, парыш лекме ӱшанышт пытымым ужмеке, Павел ден Силам руалтен кученыт да вуйлатыше-влак деке, калык погынымо верыш, конденыт.

²⁰ Оласе тӧра-влак деке кондымеке, каласеныт: «Нине еҥ-влак иудей улыт, нуно оласе калыкым пудыратылыт

²¹ да тугай йӱлам туныктат, кудым мыланна, Рим калыклан, налашат, шукташат ок лий».

²² Калыкат Павел ден Сила ваштареш кынелын, а тӧра-влак нунын ӱмбачышт вургемыштым кушкед шуаш да тоя дене кыраш кӱштеныт.

²³ Нуным чот кыреныт, казаматышке шуэныт да ороллан чот эскераш шӱденыт.

²⁴ Тыгай кӱштымым колмеке, казамат орол, йолышкышт калыпым чиктен, нуным эн кӧргӧ верышке петырен.

²⁵ Пелйӱд жапыштырак Павел ден Сила кумалыныт да Юмым моктен муреныт, а казаматышке петырыме-влак нуным колыштыныт.

²⁶ Кенета моткоч чот мланде чытырналтын, казаматын негызшат тарванен, тунамак чыла омса почылтын, чыланыштынат шинчырышт мучыштен.

²⁷ Казаматын оролжо помыжалтын, почылтшо омса-влакым ужын да петырыме-влак куржын пытеныт шонен, садлан кердыжым луктын, шкенжым шке пуштнеже улмаш.

²⁸ Но Павел виян кычкыралын: «Шкаланет осалым ит ыште! Ме чыланат тыштак улына».

²⁹ Орол тулым чӱкташ йодын, казаматыш куржын пурен да Павел ден Сила ончылан чытырен кумык возын.

³⁰ Вара нуным тӱжвак луктын да йодын: «Мыйын озам-влак! Утаралташ ынде мылам мом ыштыман?»

³¹ Нуныжо вашештеныт: «Господь Иисус Христослан ӱшане, тунам тый шкежат, мӧҥгысет-влакат утаралтыт».

³² Павел ден Сила ороллан да тудын мӧҥгыштыжӧ улшо-влаклан чылаштлан Господьын шомакшым ойленыт.

³³ Йӱдым, тудо шагатыштак, орол нуным пеленже наҥгаен, сусырыштым мушкын. Жапым шуйкалыде, шкежат, мӧҥгысыж-влакат тынеш пуреныт.

³⁴ Вара орол нуным шке пӧртышкыжӧ конден, сийлаш тӱҥалын да Юмылан ӱшанаш тӱҥалмыжлан уло мӧҥгысыж дене пырля куанен.

³⁵ Волгыжмеке, оласе тӧра-влак, нуным эрыкыш лукташ кӱлеш манын каласаш, казамат орол деке шке пашаеҥыштым колтеныт.

³⁶ Тидын нерген казамат орол Павеллан увертарен: «Оласе тӧра-влак тендам эрыкыш лукташ кӱштен колтеныт, сандене ынде лекса да тыныслык дене кайыза».

³⁷ Но Павел нунылан каласен: «Мемнам, Рим кугыжанышын гражданже-влакым, суд деч посна уло калык ончылно кырен, казаматыш шуэныт. А ынде шолып луктын колтынешт? Уке, тек нуно толыт да шкештак мемнам луктыт».

³⁸ Пашаеҥ-влак тиде ойым оласе тӧра-влаклан ойленыт. Петырыме-влакын Рим кугыжанышын гражданже улмыштым пален налмеке, оласе тӧра-шамыч моткоч лӱдыныт,

³⁹ нунын деке миен, кутырен сӧрасаш тӧченыт, нуным петырыма гыч луктыныт да ола гыч каяш йодыныт.

⁴⁰ Казамат гыч лекмеке, Павел ден Сила Лидия деке миеныт, тушто иза-шольо-влакым ужыныт да нуным кумылаҥденыт, вара тушеч каеныт.