Ап.паш 11 - У Сугынь

11 ГЛАВА 1-18 Иерусалимыште Петрын умылтарымыже. 19-30 Антиохийысе черке.

¹ Чын Юмым палыдыме-влакат Юмын шомакым шӱмышкышт пыштеныт манын, Апостол-влак да Иудейысе иза-шольо-влак колыныт.

² Петрын Иерусалимыш толмекыже, пӱчман-влак тудым титаклаш тӱҥалыныт:

³ «Тый пӱчдыман еҥ-влак деке пуренат да нунын дене кочкынат», – маныныт.

⁴ А Петр нунылан радам дене каласкалаш тӱҥалын:

⁵ «Мый Иоппий олаште лийынам да кумалынам, тунам мыйым кугу ӧрмаш авалтен да кончымашым ужынам: кӱшыч волышо лопка вынер гайым ныл лукшо дене пылпомыш гыч мый декем волтеныт.

⁶ Мый тудым тӱткын онченам да нылйола коштшо мландӱмбалсе чонан-влакым, янлыкым, нушкын коштшо да кавасе кайык-влакым ужынам.

⁷ Тыгак мылам ойлышо йӱкымат колынам: ”Кынел, Петр, шӱшкыл да коч”.

⁸ А мый манынам: ”Уке, Господь, нимогай шакше але ару огыл мыйын умшашкем нигунамат пурен огыл”.

⁹ Пылпомыш гыч йӱк кокымшо гана мылам ойлен: ”Мом Юмо эрыктен, тудым тый ару огыллан ит шотло”.

¹⁰ Чыла тиде кум гана лийын, вара чылажат угыч пылпомышко налалтын.

¹¹ Тунамак мыйын илыме пӧрт ончылан кум еҥ шогалын. Нуным мый декем Кесарий гыч колтеныт улмаш.

¹² Изишат кокытеланыде нунын дене каяш Шӱлыш мылам каласен. Нине куд иза-шольо мый денем пырля каен, да ме ӱжшӧ еҥын пӧртышкыжӧ пуренна.

¹³ Тудо мыланна шке пӧртыштыжӧ Суксым ужмыж нерген каласкален. Суксо тудлан ойлен: ”Иоппийыш Петр манме Симоным ӱжын кондаш еҥ-влакым колто.

¹⁴ Тудо тыйымат, мӧҥгысет-влакымат утарыше шомакым тыланет ойла”.

¹⁵ А ойлаш тӱҥалмекем, тӱҥалтыште мемнан ӱмбаке волымо семынак, нунын ӱмбакат Святой Шӱлыш волен.

¹⁶ Тунам мый Господьын кузе ойлымыжым шарналтышым: ”Иоанн вӱд дене тынеш пуртен, а те Святой Шӱлыш дене тынеш пуртымо лийыда”.

¹⁷ Тугеже, Господь Иисус Христослан ӱшанаш тӱҥалмекына, Юмо мыланна мом пуэн, нуныланат тугайымак пуэн гын, Юмылан чаракым ышташ кӧ мый улам?»

¹⁸ Тидым колыштмеке, чылан лыпланеныт да Юмым моктен ойленыт: «Тугеже, Шкенжым палыдыме-влакланат Юмо языкыштым касарыкташ да илышым налаш йӧным пуэн».

¹⁹ Стефаным пуштмо деч вара тӱҥалше поктылмашлан кӧра шаланен кайыше-влак Финикий, Кипр, Антиохий марте шуыныт. Нуно Христос нерген шомакым иудей-влак деч молылан нигӧлан каласкален огытыл.

²⁰ Туге гынат нунын коклаште икмыняр еҥ Кипр да Кириней гыч лийын, нунышт, Антиохийыш толмеке, Господь Иисус нерген Поро Уверым эллин-влакланат каласкаленыт.

²¹ Господьын кидше нунын дене лийын, пешак шукын Господьлан ӱшанаш тӱҥалыныт да Тудын велке савырненыт.

²² Тидын нерген уверым Иерусалимысе черке колын, да Варнавам Антиохийыш колтеныт.

²³ Тудо, толмекыже, Юмын порылыкшым ужынат, моткоч куанен да чылаштымат Господь дене уло шӱм-чон дене ушнен шогаш ӱжын.

²⁴ Тудо Святой Шӱлыш да ӱшанымаш дене тич темше поро пӧръеҥ лийын. Господь деке еҥ-влак шукырак ушненыт.

²⁵ Вара Варнава Тарсыш Савлым кычалаш каен, тудым муын да Антиохийыш конден.

²⁶ Нуно тушто идалык мучко черкым погеныт да шуко еҥым туныктеныт. Антиохийыште тунемше-влакым эн ондак христиан манаш тӱҥалыныт.

²⁷ Тудо кечылаште Иерусалим гыч Антиохийыш пророк-влак толыныт.

²⁸ Нунын кокла гыч иктыже, Агав лӱманже, кынел шогалынат, уло тӱня мучко кугу шужымаш лийшаш нерген Шӱлыш кумылаҥдыме дене ончылгоч палдарен. Шужымашыже Клавдий кесарь годым лийын.

²⁹ Тунам тунемше-влак, кажныже кертмыж семын, Иудейысе иза-шольо-влаклан полышым колташ пунчалыныт.

³⁰ Нуно тыгак ыштеныт, погымыштым Варнава ден Савл дене пырля пресвитер-влаклан колтеныт.