Ап.паш 10 - У Сугынь

10 ГЛАВА 1-8 Петрым Корнилий шкеж деке ӱжеш. 9-33 Петрлан кончымаш. 34-43 Корнилийын пӧртыштыжӧ Петрын ойлымыжо. 44-48 Корнилий да моло йот тукым ӱмбаке Святой Шӱлыш вола.

¹ Кесарийыште Корнилий лӱман ик пӧръеҥ лийын, тудо италий манме полкысо шӱдывуй улмаш.

² Тудо чыла мӧҥгысыж дене пырля Юмылан лӱдын кумалше да Тудым уло чон дене пагалыше лийын, калык кокласе йорло-влаклан эре полшен шоген да чарныде Юмылан кумалын.

³ Икана Корнилий индешымше шагат годым кончымаште Юмын Суксыжым раш ужын. Суксо тудын деке пурен да каласен: «Корнилий!»

⁴ Суксо ӱмбаке ончен, Корнилий лӱдын каласен: «Мо, Господь?» Суксо тудлан вашештен: «Юмо тыйын кумалметым да йорло-влаклан поро пашам ыштыметым шотыш налын.

⁵ А ынде Симон лӱман айдемым ӱжын кондаш Иоппий олашке еҥ-влакым колто. Тудым Петр манынат лӱмдат.

⁶ Тудо коваштым ийлыше Симон дене уна лийын ила, пӧртшӧ теҥыз воктене шинча. Тыйым да чыла мӧҥгысетым утарыше шомакым Петр тыланет ойла».

⁷ Суксо тудлан тыге каласен кайымеке, Корнилий кок тарзыжым да пеленже улшо кокла гыч Юмым уло чон дене пагалыше ик сарзыжым ӱжын.

⁸ Мо лиймым каласкалымеке, нуным Иоппийышке колтен.

⁹ Вес кечын, колтымо еҥ-влак корнышто лийме да ола деке лишемме годым, Петр куд шагатыштырак пӧрт леведыш ӱмбаке кумалаш кӱзен.

¹⁰ Вара тудо шужымым шижын, кочмыжо шуын. Кочкаш ямдылыме годым тудым кугу ӧрмаш авалтен,

¹¹ тудо почылтшо пылпомышым да шкеж деке кӱшыч волышо лопка вынер гайым ужын, тудыжым кылдыме ныл лукшо дене мланде ӱмбаке волтеныт.

¹² Тушто мландӱмбалсе ныл йолан тӱрлӧ янлык ден вольык, нушкын коштшо, кавасе кайык-влак лийыныт.

¹³ Вара йӱк тудлан каласен: «Кынел, Петр, шӱшкыл да коч».

¹⁴ Но Петр вашештен: «Уке, Господь, мый нигунам нимогай шакшым але ару огылым кочкын омыл».

¹⁵ Тунам тудлан йӱк кокымшо гана каласен: «Мом Юмо эрыктен, тудым ару огыллан ит шотло».

¹⁶ Тыге кум гана лийын, вара лопка вынер вигак пылпомышко налалтын.

¹⁷ Тиде кончымаш мом ончыкта манын, Петрын ӧрын шогымыж годым Корнилийын колтымо еҥже-влак, Симонын пӧртшӧ кушто улмо нерген йодыштын, пален налмеке, капка воктек толын шогалыныт

¹⁸ да йӱкым кугемден йодыныт: «Петр манме Симон тыште уна лийын ила мо?»

¹⁹ Петр эше кончымаш нерген шонкален, а Шӱлыш тудлан каласен: «Теве кум еҥ тыйым кычалеш.

²⁰ Нуным Мый колтенам, сандене кынел, воло да изишат ит кокытелане, нунын дене пырля кай».

²¹ Шкеж деке Корнилий деч колтымо пӧръеҥ-влак деке Петр волен да каласен: «Мый кычалме еҥда улам. Те могай амал дене толында?»

²² Нунышт ойленыт: «Мемнам шӱдывуй Корнилий колтен. Тудо чын ыштыше, Юмылан лӱдын кумалше айдеме, чыла иудей калыкат тудын нерген порын ойла. Тыйым шке пӧртышкыжӧ ӱжын кондаш да ойлыметым колышташ Корнилийлан святой Суксо кӱштен».

²³ Вара Петр нуным ӱжын пуртен да унам ыштен. А вес кечын нунын дене пырля каен, пеленже Иоппийысе иза-шольо-влак кокла гыч южышт каеныт.

²⁴ Вес кечын нуно Кесарийыш толын шуыныт. Корнилий родо-тукымжым да лишыл йолташыж-влакым ӱжын улмаш, нуным вучен.

²⁵ Петрын пурымыж годым Корнилий тудым вашлийын да, йолжо деке кумык возын, вуйым савен.

²⁶ А Петр тудым кынелтен да каласен: «Кынел, мый шкежат айдеме веле улам».

²⁷ Вара, тудын дене мутланен, пӧртыш пурен, шуко погынышым ужын

²⁸ да нунылан каласен: «Иудейлан йот тукым еҥ дене кылым кучаш але тудын деке пураш чарыме нерген те паледа, но ик еҥымат шакшылан але ару огыллан шотлаш ок лий манын, Юмо мылам ончыктен.

²⁹ Сандене, мыйым ӱжмеке, торешланыде толынам, тыгеже йодам: могай амал дене те мыйым ӱжында?»

³⁰ Корнилий каласен: «Кум кече ончыч тиде шагат марте мый пӱтым кученам да индешымше шагатыште шке мӧҥгыштем кумалынам. Кенета мыйын ончылнем йолгыжшо вургеман айдеме кончен

³¹ да каласен: ”Корнилий, тыйын кумалметым колмо, да йорло-влаклан поро пашам ыштыметым Юмо ушышкыжо пыштен.

³² Тугеже Иоппийыш шке еҥет-влакым колто да Петр манме Симоным ӱжын кондо, тудо коваште ийлыше Симонын пӧртыштыжӧ теҥыз воктене уна лийын ила, Петр тый декет толеш да чыла ойла”.

³³ Мый тунамак тый декет еҥем-влакым колтенам, толметше пешак сай. Тылат Юмо мом каласаш кӱштымым колышташ ме ынде чылан Юмо ончылно улына».

³⁴ Тунам Петр ойлаш тӱҥалын: «Юмын чыла еҥым ик семын ончымыжым кызыт чынак умылышым.

³⁵ Тудлан лӱдын кумалше да чын почеш ыштыше еҥ, кеч-могай калык гыч лийже, Юмылан келша.

³⁶ Израиль эрге-влаклан Тудо шке шомакшым колтен, Иисус Христос гоч тыныслык нерген Поро Уверым пуэн. Иисус Христосшо – чыла айдемын Господьшо.

³⁷ Иоаннын увертарен ойлымо тынеш пуртымаш деч вара, Галилей гыч тӱҥалын, уло Иудей мучко мо лиймым те паледа:

³⁸ Юмо Назарет Иисусым Святой Шӱлыш да вий-куат дене шӱрен палемден. Иисус пелен Юмо лийын, сандене Тудо порым ыштен да диаволын кид йымалныже лийше-влакым чыланыштымат паремден коштын.

³⁹ Иудей-влакын элыштышт да Иерусалимыште Иисус мом ыштен, чылажланат ме танык улына. Тудым пу меҥгеш пудален пуштыныт,

⁴⁰ а кумшо кечын Юмо Тудым ылыжтен да Тудлан кончаш йӧным ыштен.

⁴¹ Но Иисус уло калыкланна огыл, а мыланна, Юмын ончылгоч ойырен налме танык-влаклан гына, кончен. Колымаш гыч ылыж кынелмекыже, ме Тудын дене пырля кочкын да йӱын улына.

⁴² Колышымат, илышымат судитлаш Юмо Тудым шогалтен манын, калыклан увертараш да таныклаш Иисус мыланна кӱштен.

⁴³ Чыла пророк-влак таныклат: Иисуслан ӱшаныше кажне еҥын языкшым Тудын лӱм дене Юмо кудалта».

⁴⁴ Петрын тидым каласкалымыж годым тудым колыштшо-влакын чыланыштын ӱмбакышт Святой Шӱлыш волен.

^45-46 Нунын палыдыме тӱрлӧ йылме дене ойлымыштым да Юмым чапландарымыштым колын, Святой Шӱлышын пӧлекшым чын Юмым палыдыме калык гыч улшо еҥ-влак ӱмбакат волтымылан Петр дене пырля толшо, Христослан ӱшаныше пӱчман-влак чылан ӧрыныт. Тунам Петр каласен:

⁴⁷ «Мемнан семынак Святой Шӱлышым налше нине еҥ-влакым вӱд дене тынеш пурташ иктаж-кӧ чарен кертеш мо?»

⁴⁸ Вара нунылан Иисус Христос лӱмеш тынеш пураш кӱштен. А нунышт Петрым икмыняр кече шкешт дене лияш йодыныт.