2 Тим 4 - У Сугынь

4 ГЛАВА 9-18 Каҥаш ден йодмаш-влак. 19-22 Чеверласымаш.

¹ Кунам Христос шке чапше дене толеш да кугыжаланаш тӱҥалеш, Тудо илыше ден колышо-влакым судитла. Тидым ушышто кучен, Юмо да Господьна Иисус Христос ончылно тыланет пеҥгыдын кӱштем:

² Юмын шомакым увертаре, келшыше жапыштат, келшыдыме жапыштат тудын верч пеҥгыдын шого, титакым чараш лук, йоҥылыш лийшым шылтале, чылам кумылаҥде. Чыла тидым кужун чытен да туныктен ыште.

³ Вет тугай жап толеш, кунам еҥ-влак яндар туныктымашым огыт чыте, а шке кумылыштлан келшыше, колышташ оҥай туныктышо-влакым шкаланышт ойырен налаш тӱҥалыт,

⁴ чыным колышташ огыл манын, пылышыштым петырат да шонен лукмо ойлыштмаш деке савырнат.

⁵ Но тый чыла шотыштат айык шонымашан лий, нелылыкым чыте, Поро Уверым шарыме пашам ыште, служитлыме пашатым шукто.

⁶ Вет мыйым надырлан пуаш жап шуын, кайышаш шагатем лишемын.

⁷ Таҥасымаште мый чот тыршенам, кайышаш корнем мучашыш шуктенам, ӱшанымашым арален коденам.

⁸ А ынде чын ыштыме верч пуалтшаш вуйшӱдыш мыйым вуча, тудым мыланем Господь, чын Судья, тудо кечын пуа, да мыланем веле огыл, Тудын чап дене толмыжым йӧратен вучышылан чылалан пуа.

⁹ Мый декем вашкерак толаш тырше.

¹⁰ Кызытсе курымым йӧратымыжлан кӧра Димас мыйым коден да Фессалоникыш каен. Крискент Галатийыш миен, Тит – Далматийыш. Лука гына мый денем кодын.

¹¹ Маркым нал да шке денет пырля кондо, тудын полышыжо мыланем пешак кӱлеш.

¹² А Тихикым мый Ефесыш колтенам.

¹³ Кунам толат, ӱмбал вургемым кондо, тудым мый Троадаште Карп дене коденам. Тыгак книга-влакым, поснак коваштеш возымо-влакым, кондо.

¹⁴ Апшат Александр мыланем шуко осалым ыштен. Господь тудлан пашаже семын тӱлыжӧ.

¹⁵ Тудын деч тыят шеклане, тудо мемнан ойлымына ваштареш чот шогалын.

¹⁶ Икымше гана шкемым арален ойлымем годым мыланем полшаш нигӧ толын огыл, чылан мыйым коденыт. Тек нунылан тиде титаклан ок шотлалт.

¹⁷ А Господь мыйым коден огыл, полшен. Мыйын гоч Юмын увержым шарыме шукталтше да чын Юмым палыдыме-влак тудым чылан колышт манын, Тудо мыйым пеҥгыдемден. Тыгеракын, мый левын умшаж гычын утаралтынам.

¹⁸ Господь мыйым чыла осал паша деч арала да Пылпомышсо Кугыжанышыжлан утара. Тудлан курым-курымешлан чап лийже! Аминь.

¹⁹ Прискилла ден Акилалан, Онисифорлан да мӧҥгысыж-влаклан саламым каласе.

²⁰ Ераст Коринфеш кодын, а Трофимым черле улмыжлан кӧра Милитеш коденам.

²¹ Теле марте толаш тырше. Еввул, Пуд, Лин, Клавдия да чыла иза-шольо тылат саламым колтат.

²² Тыйын шӱм-чон шӱлышет дене Господь Иисус Христос лийже. Тендан дене Юмын порылыкшо лийже. Аминь.