2 Тим 3 - У Сугынь

3 ГЛАВА 1-9 Пытартыш жапысе еҥ-влак. 10 – 4:8 Тимофейлан Павелын сугыньжо.

¹ Пытартыш кечылаште неле жап толеш манын, палышаш улат.

² Еҥ-влак шкеныштым да оксам йӧратыше, моктаныше, кугешныше, мыскылыше, ача-авам колыштдымо, таум ыштыдыме, Юмым пагалыдыме, йӧратыдыме,

³ келшыде илыше, еҥ ӱмбаке ойлышо, шкем кучен моштыдымо, торжа, порым ужмышудымо,

⁴ предатель, вожылдымо, чот кугешныше, Юмым йӧратыме олмеш шке шерыштым темаш йӧратыше лийыт.

⁵ Тӱжвач ончымаште Юмым пагалышыла койыт, но ӱшанымашын вийже деч кораҥыт. Тыгай еҥ-влак деч торло.

⁶ Нунын кокла гыч южышт еҥ пӧртыш чояланен пурат да тӱрлӧ язык дене варналтше, тӱрлӧ сутланымын вӱдымӧ ӱдырамаш-влакым кид йымакышт налыт.

⁷ Нине ӱдырамаш эре тунемаш тыршат гынат, чыным палымашке нигунам шуын огыт керт.

⁸ Кузе Ианний ден Иамврий Моисей ваштареш шогалыныт, тыгак нине еҥ-влакат чынлан торешланат. Нунын шонымашышт пужлен да ӱшанымашышт лушкыдо.

⁹ Но нуно шукыжак ыштен огыт керт, вет нунын ушдымылыкышт чылан ончылно чараш лектеш. Тыгеак Ианний ден Иамврий дене лийын.

¹⁰ А тый мыйын туныктымем, илыш-шотем, ышташ шонымем, Христослан ӱшанымем, туркымем, йӧратымем, чытымем эре ужынат да тыгак ыштенат,

¹¹ Антиохийыште, Иконийыште, Листраште мый денем лийше поктылмым, орланымым тый палет. Могай поктылмым мый чытенам! А чылаж дечат мыйым Господь утарен.

¹² Христос Иисус дене ушнен, Юмым пагален илаш шонышо-влак чылан поктылмо лийыт.

¹³ А осал еҥ да ондалыше-влак, весе-влакым йоҥылышыш пуртен да шкештат ондалалтын, осалым ыштымаште кӱкшытыш шуыт.

¹⁴ А молан тый тунемынат да мом тылат ӱшаныме, тудым пеҥгыдын кучо, вет тый шке туныктышетым палет.

¹⁵ Адакшым тый Святой Возымашым йоча годсек шинчет. Тудо Христос Иисуслан ӱшаныме дене утаралташ тыланет ушым пуэн кертеш.

¹⁶ Чыла Возымаш Юмын Шӱлыш деч лектын да туныкташ, титакым чараш лукташ, койыш-шоктышым тӧрлаш, чын ыштымашке виктараш пайдале.

¹⁷ Тугеже, Юмын айдемыжын нимогай ситыдымашыже уке, тудо чыла поро пашаланат ямдылыме лиеш.