2 Тим 2 - У Сугынь

2 ГЛАВА 1-13 Поро Увер верч тыршымаш. 14-26 Юмын сайлан шотлымо тарзе.

¹ А тый, эргым, Христос Иисусын порылыкшо дене пеҥгыдем.

² Шуко таныклыше улмо годым мом мый дечем колынат, ӱшанле еҥ-влаклан тудым ӱшанен пу. Нуно вара молымат туныктен кертыт.

³ Иисус Христосын сай сарзыже семын нелылыкым чыте.

⁴ Воеводылан кажне сарзе келшаш тырша, сандене илышысе тыглай паша дене шкенжым ок кылде.

⁵ Тыгак таҥасыше айдемат, чын почеш ок таҥасе гын, сеҥымаш вуйшӱдышым ок нал.

⁶ Мланде пашам тыршен ыштыше еҥ саскам эн ондак налшаш.

⁷ Мом мый ойлем, тудын нерген шоналте. Господь тылат чылажымат умылаш полшыжо.

⁸ [Господь] Иисус Христосым шарне. Мыйын увертарыме Поро Увер дене келшышын Тудо Давид тукым гыч лийын да колымаш гыч ылыж кынелын.

⁹ Поро Уверлан кӧра мый орланем, мыйым осалланыше еҥ семын казаматыш шынденыт, но Юмын шомакшым шинчырлаш ок лий.

¹⁰ Сандене мый ойырен налме-влак верч чыла чытем: нунат Христос Иисус дене ушнымаште утарымашым да курымашлык чапым налшаш улыт.

¹¹ Тиде мут чын: Ме Тудын дене пырля коленна гын, Тудын дене пырляк илашат тӱҥалына,

¹² чытена гын, Тудын дене пырля кугыжаланашат тӱҥалына, Тудым ме огына пале манына гын, Тудат мемнам ом пале манеш,

¹³ ме ӱшанле огынал гын, Тудо – ӱшанле, вет Тудо Шкеж деч Шке кораҥын огеш керт.

¹⁴ Тидым ушештарен шого, мут шотышто ынышт ӱчаше манын, Господь ончылно кӱштӧ. Тыгайже нимогай пайдам ок пу, а колыштшо-влакым энгекыш шукта.

¹⁵ Юмылан йӧрышӧ лияш тырше: шке пашат деч ит вожыл, чынын шомакшым чын туныкто.

¹⁶ А йӧрдымӧ арам ойлыштмаш деч кораҥ, вет тыге кутыркалыше еҥ-влак утларак да утларак Юмо деч кораҥыт.

¹⁷ Нунын шомакышт шӱйшӧ сусырла шарлаш тӱҥалеш. Тыгай улыт Именей ден Филит.

¹⁸ Ылыж кынелмаш уже лийын манмышт дене нуно чын корно гыч кораҥыныт да тыге южыштын ӱшанымашыштым локтылыт.

¹⁹ Но Юмын пыштыме чоткыдо негызше шога, ӱмбалныже тыгай печать: «Господь шке еҥже-влакым пала», «Господьын лӱмжым ӱжшӧ чыла еҥ чын огыл деч кораҥже».

²⁰ Кугу пӧртыштӧ шӧртньӧ да ший ате веле огыл, пу да шун дене ыштыме ате-влакат улыт. Иктыштым аклыме ате кӱлмӧ годым кучылтыт, весыштым – тыглай жапыште.

²¹ Тугеже, кӧ шкенжым чыла тыгай осал деч эрыкта гын, тудо аклыме ате гай, святитлыме да Озажлан пайдале, тӱрлӧ поро пашалан ямде лиеш.

²² Самырык годсо сутланымаш деч кораҥ курж, Господьлан яндар шӱм дене кумалше-влак дене пырля чын ыштымым, Христослан ӱшанымым, йӧратымым, тыныслыкым пеҥгыдын кучо.

²³ Но ораде да шотдымо ӱчашымаш деч кораҥ, палет вет: нуно келшыдымашым шочыктат.

²⁴ Господьын тарзыже ӱчашышаш огыл, а чыла дене тыматле, туныктен моштышо да чытыше лийшаш.

²⁵ Ваштареш шогышо-влакым тудо тыматлын тӧрлышаш. Юмо нунылан языкыштым касарыкташ да Шкеж деке савырнаш ала йӧным пуа. Тыге лиеш гын, нуно, чыным пален налын

²⁶ да ушым шынден, диаволын вапшыж деч утлен кертыт, вет диавол, шкенжын эрыкшым шуктышт манын, нуным кучен.