2 Тим 1 - У Сугынь

1 ГЛАВА 1-2 Саламлымаш. 3-18 Юмылан тауштымаш.

¹ Иисус Христос дене ушнымаште сӧрымӧ илышым увертараш колтымо, Юмын эрыкше почеш Иисус Христосын Апостолжо лийше Павел деч

² шкенжын йӧратыме Тимофей эргыжлан. Ача Юмо да Господьна Христос Иисус деч тыланет порылык, чаманымаш да тыныслык лийже.

³ Мый Юмылан таум ыштем – Тудлан ача-кочам семынак яндар совесть дене служитлем – да йӱдшӧ-кечыже кумалмаштем тыйым эре шарнем.

⁴ Мый шинчавӱдетым шарналтем, тыйым ужмем шуэш, ужмекем, мыйым куан тема.

⁵ Тыйын чон гыч лекше ӱшанымашетым мый шарнем. Ондак тыйын Лоида коват ден Евника аватын шӱмыштыштат тыгаяк ӱшанымаш лийын, да мый инанем: тудо тыйынат кӧргыштет ила.

⁶ Сандене тыланет ушештарем: ӱмбакет кидем пыштымем годым Юмо деч налме моштымашетым угычын вияҥден шого.

⁷ Юмо мыланна лӱдмашын шӱлышыжым огыл, а вийын, йӧратымашын да яндар уш-акыл дене илымын шӱлышыжым пуэн.

⁸ Тугеже мемнан Господьна [Иисус Христос] нерген таныклыме дечат, мый дечемат – Тудын верч петырымаште шинчыше деч – ит вожыл, а Поро Увер верч нелылыкым чытымашке мый денем пырля ушно, тидлан Юмо вийым пуа.

⁹ Тудо мемнам утарен да святой илышышке ӱжын. Тидым мемнан пашаланна кӧра огыл, а ончылгоч шонен пыштымыжлан кӧра да жап тӱҥалме деч ончычак мыланна Христос Иисус гоч ончыктымо порылыкшылан кӧра ыштен.

¹⁰ Тидыже ынде мемнам Утарыше Иисус Христосын толмыж гоч почылтын. Тудо колымашын вийжым пытарен, Поро Увер гоч илышым да колыдымашым почын ончыктен.

¹¹ Тиде Поро Уверын увертарышыжлан да Апостолжылан мыйым шогалтыме. Мый чын Юмым палыдыме-влаклан тудым туныктышаш улам.

¹² Тидлан кӧра мый тыге орланем. Туге гынат ом вожыл: Кӧлан мый ӱшанем, Тудым палем, да саде кече марте мыланем ӱшанен пуымым аралаш Тудын куатше уло манын инанем.

¹³ Мый дечем тый яндар туныктымашым колынат. Тек тудо тылат корным ончыкта, Христос Иисус дене ушнымаште шочшо ӱшанымашым да йӧратымашым арале.

¹⁴ Тыланет ӱшанен пуымо порылыкым мемнан шӱм-чонышто илыше Святой Шӱлышын полшымыж дене арале.

¹⁵ Тый палет: Асийысе-влак чыланат мый дечем кораҥыныт, нунын коклаште Фигелл ден Ермогенат улыт.

¹⁶ Тек Онисифорлан да тудын мӧҥгысыж-влаклан Господь порылыкым ышта, вет тудо мыйым шуко гана кумылаҥден да, мыйым шинчырленыт гынат, мый дечем вожылын огыл.

¹⁷ А кунам тудо Римыш толын, мыйым чот тыршен кычалын да муын.

¹⁸ Тек Господь шке кечынже тудлан порылыкшым ончыкта. А кунар тудо мылам Ефесыште полшен, тый эн сай палет.