2 Петр 3 - У Сугынь

3 ГЛАВА 1-18 Иисус Христос кокымшо гана толеш.

¹ Йӧратымем-влак, ынде кокымшо серышым тыланда возем, нине серышлаште шке шарныктымем дене тендан кӧргыштӧ яндар шонымашым помыжалтарынем.

² Святой пророк-влакын ондак ойлымо шомакыштым да Господьын, Утарышын, тендан Апостолда-влак гоч пуымо кӱштымыжым шарныза шонем.

³ Эн ондак тидым палыза: пытартыш кечылаште шке сутланымышт почеш илыше, мыскылен воштылшо-влак толыт

⁴ да ойлат: «Тудын толаш сӧрымыжӧ кушто? Вет ачана-влак ӱмырым шуктеныт, но, тӱням ыштыме деч тӱҥалын, кузе лийын, чылажат тугак кодеш».

⁵ Вӱд гыч да вӱд дене ыштыме кавам да мландым тӱҥалтыште Юмын шомак дене ыштымым нуно мондаш шонат.

⁶ Вӱд денак, ташлыме дене, тунамсе тӱня пытаралтын.

⁷ А кызытсе кава ден мландым тудо шомак денак туллан арален кодымо, Юмым пагалыдыме еҥ-влакым судитлыме да пытарыме кечылан нуным саклыме.

⁸ Йӧратымем-влак, теве икте тендан деч шылтыме лийшаш огыл: Господьлан ик кече – тӱжем ий гай, да тӱжем ий – ик кече гай.

⁹ Господь юватылеш манын, южо еҥ шотла гынат, Господь сӧрымыжым шукташ ок юватыл, а мемнан шотышто чытымашым ончыкта. Иктынат пытымыжым Тудо ынеж уж, а чылан языкыштым касарыктышт да Юмо деке савырнышт манын шона.

¹⁰ А Господьын кечыже йӱдым толшо вор семын толеш, тунам кава мӱгырен йомеш, сандалыкыште чылажат чот ырен шалана, а мланде да тушто мо уло – чылажат йӱла.

^11-12 Тыге чылажат шалана гын, тугеже тыланда, Юмын кечыжым да тудын вашкерак толын шумыжым вучышо-влаклан, святой илышыште да Юмым пагалымаште могай лияш кӱлеш! Тудо кечын кава тул дене шалана да сандалыкысе чыла ужаш шокшеш лева.

¹³ Но Юмын сӧрымыж семын ме у кавам да у мландым вучена. Тушто чын ыштымаш илаш тӱҥалеш.

¹⁴ Сандене, йӧратымем-влак, тидым вучен, Юмын ончылно ару чонан, шылталаш лийдыме да тынысан лияш тыршыза.

¹⁵ Йӧратыме Павел изана тудлан пуымо уш-акыл дене тыланда кузе возен, Господьнан чытымыжым утарымашлан шотлыза.

¹⁶ Тидын нерген возымыж годым Павел эре тидымак ойла. Тудын серышлаштыже южо шонымашым умылаш неле, нуныштым тунемдыме ден пеҥгыдем шудымо еҥ-влак моло Возымаш семынак кадыртылыт, тидын дене шкеныштым пытымашке шуктат.

¹⁷ Тугеже те, йӧратымем-влак, тидым ончылгоч паледа гын, шекланыза. Закондымо-влакын йоҥылыш корнышт тендам шкеж деке ынже шупшыл, те пеҥгыде негызда деч ида кораҥ.

¹⁸ Мемнан Господьна да Утарышына Иисус Христосын порылыкыштыжо да Тудым пален шогымаште кушкын толза. Тудлан кызытат, курым-курымаш кечынат эре чап лийже! Аминь.