2 Петр 2 - У Сугынь

2 ГЛАВА 1-22 Шояк туныктышо-влак.

¹ Израиль калык коклаште шояк пророк-влакат лийыныт, тыгак тендан коклаштат шояк туныктышо-влак лектыт. Нуно пытымашке наҥгайыше шояк туныктымашым кондат да шкеныштымат тӱлен налше Господь деч кораҥыт, тидын дене шке ӱмбакышт вашке пытымашым кондат.

² Шукышт нунын пужлымаш корнышт дене каят, да тидлан кӧра чынын корныжо мыскылымаште лиеш.

³ Опкын улмыштлан кӧра нуно шоякым ойлымо дене тендан кӱшеш илаш тӱҥалыт. Нунылан суд пунчал шукертак ямде, пытымашышт ок нере.

⁴ Юмо языкыш пурышо суксо-влакым чаманен огыл, а пычкемышын шинчырже дене кылден, нуным тамыкыш сӱмыралын да суд кече марте орландарен оролаш пуэн.

⁵ Тошто тӱнямат Юмо чаманен огыл, Юмым пагалыдыме-влакын тӱняшт ӱмбаке вӱд ташлымашым колтен. Но чын илыме верч ойлышо Нойын ешыжым – кандаш чоным – арален коден.

⁶ Содом ден Гоморра ола-влакым Тудо пытараш судитлен да ломыжыш савырен, нине ола-влакым шалатыме дене Юмым пагалыдыме ончыкылык еҥ-влаклан шижтарен,

⁷ а шотдымо-влакын пужлен илымышт дене йӧсланыше Лотым, чын ыштыше еҥым, утарен.

⁸ Вет нунын коклаште илымыж годым тиде чын ыштыше еҥ закондымылыкым ыштымыштым ужын-колын, да тудын чыным йӧратыше чонжо кече еда орланен.

⁹ Господь чыла тидым ыштен гын, Юмым пагалыше-влакым тергымаш деч кузе утараш Тудо пала да, закондымылыкым ыштыше-влакым осал пашашт верч мутым кучаш шогалташ манын, суд кечылан оролымаште кузе кучаш, шинча.

^10-11 Кап ден чонысо шакше сутланымаш почеш кайыше да властьым пагалыдыме-влаклан суд поснак пеҥгыде лиеш. Нунын деч кугурак вий-куатан Суксо-влакат Господь ончылно нуным мыскылыше мут дене титаканыш огыт лук, но нине торжа да ӱскырт еҥ-влак чапланыше Суксо-влакым мыскылаш огыт лӱд.

¹² Тыгай еҥ-влак мом огыт пале, тудым мыскылат. Нуно пӱртӱс палемдыме почеш илыше, кучалташ да пытаралташ шочшо умылыдымо янлык гай улыт да нине янлык-влак семынак пытарыме лийыт.

¹³ Закондымылыкыштлан нунылан тӱлалтеш. Кечывал кечын шерыштым темымым ракатланымылан шотлат, тендан дене пырля кочмышт-йӱмышт годым нине лавыра гай намысле еҥ-влак ондалымышт дене ракатланат.

¹⁴ Шинчаштышт яжарланымаш да чарныдыме язык веле, пеҥгыдем шудымо чоным кучат, шӱмышт опкынланымашлан тунемын, нуно каргымашын икшывыж-влак улыт.

¹⁵ Вияш корным коден, нуно йомыныт, Восорын Валаам эргыжын корныж дене каеныт, тудыжо чын огыл пашалан тӱлымым йӧратен,

¹⁶ но закондымылыкым ыштымыжлан тудым шылталыме: ойлен кертдыме осел, айдеме йӱк дене ойлен, пророкын ушдымылыкшым чарен шогалтен.

¹⁷ Нине еҥ-влак вӱддымӧ памаш, тӱтан мардеж поктылмо шем пыл улыт. Нунылан курымашлык тӱвыт пычкемышым ямдылыме.

¹⁸ Вет кугешнылме яра мутым ойлыштын, нуно кап ден чонын сутланымыже, пужлымыжо дене тугай еҥ-влакым оптышыш кучат, могайышт шояште илыше-влак деч пыкше гына утлаш тӱҥалыныт.

¹⁹ Шкешт шӱймашын кулжо улыт гынат, нунылан эрыкым сӧрат. Вет кӧлан сеҥалтынат, тудын кулжо улат.

²⁰ Мемнан Господьна да Утарышына Иисус Христосым палыме гоч тиде тӱнясе лавыра деч утлымеке, тушан угыч варнат да сеҥалтыт гын, тугеже мучаште нунылан тӱҥалтыш годымсышт деч ударак лиеш.

²¹ Чын ыштымаш корным пален налме да нунылан пуымо святой кӱштымаш деч мӧҥгеш савырныме олмеш чын ыштымаш корным огыт пале гын, нунылан сайрак ыле.

²² Нунын дене чын калыкмутышто ойлымо семын лийын: «Пий шке укшинчышыж деке пӧртылеш», да «Мушмо сӧсна лавыраште пӧрдалеш».