1 Тим 6 - У Сугынь

6 ГЛАВА 3-10 Шояк туныктымаш да чын поянлык. 11-21 Тимофейлан Павелын сугыньжо.

¹ Юмын лӱмжӧ да мемнан туныктымашна ынышт вурсалт манын, кид йымалне улшо кул-влак шке озаштым чыла шотыштат пагалаш йӧрышылан шотлышаш улыт.

² А кӧн Христослан ӱшаныше озаже уло, тек озажым шотлыдымо ок лий, вет нуно ӱшанымаште иза-шольо улыт. Тудо утларак тыршен веле тарзыланышаш, молан манаш гын озаже – ӱшаныше да йӧратыме еҥ – эре порым гына ышта. Чыла тидлан туныкто да каҥашым пу.

³ Кӧ весылан туныкта да мемнан Господьна Иисус Христосын яндар шомакше да чын ӱшанымаш туныктымо дене ок келше,

^4-5 тудо кугешна, нимом ок пале, но ӱчашыме да мут нерген тавалыме чер дене черланен, тидыж дечын пужлышо ушан, чыным йомдарыше еҥ-влак коклаште кӧранымаш, келшыдымаш, вурсен ойлымаш, осал йолам ыштымаш да ӱчашымаш лектыт. Тыгай еҥ-влак Юмым пагалыме дене пояш лиеш манын шонат. Нунын деч кораҥ.

⁶ Чынжымак, мо уло дене серлаген, Юмым пагалаш – кугу поянлык.

⁷ Ме тӱняшке нимом конден огынал да, чылалан раш, тиде тӱня гыч нимом пеленна налын огына керт.

⁸ Кочкышна да вургемна уло гын, тидын дене серлагышаш улына.

⁹ А пояш шонышо-влак алгаштаралтыт, ушдымо да зияным ыштыше тӱрлӧ сутланымашын лӧдышкыжӧ логалыт, нунышт еҥ-влакым кугу азапыш пуртен, пытымашке шуктат.

¹⁰ Вет чыла осалын вожшо – оксам йӧратымаш, оксалан вуйым пуымеке, южышт ӱшанымаш деч кораҥыныт да шкеныштым шке шуко орлыкыш пуртеныт.

¹¹ А тый, Юмын еҥже, тыгай деч кораҥ курж да чын ыштымаште, Юмым пагалымаште, ӱшанымаште, йӧратымаште, чытымаште, тыматле лиймаште сеҥымашке шу.

¹² Христослан ӱшаныме верч шогымаште чыла виет дене тырше, курымаш илышым кучо. Юмо тыйым тиде илышланак ӱжын, да тый шуко таныклыше ончылно шке ӱшаныметым пеҥгыдын почын каласенат.

¹³ Чылалан илышым пуышо Юмын ончылно да Понтий Пилат годым пеҥгыдын таныклен ойлышо Христос Иисус ончылно мый тыланет кӱштем:

¹⁴ мемнан Господьна Иисус Христос толмешке, тыланет кӱштымым яндарын да шылталаш лийдымын шуктен шого.

¹⁵ Тудын толмыжым поро пиалан ик шкет куатле Юмо, кугыжаланыше-влакын Кугыжашт да озаланыше-влакын Озашт, шке жапыштыже ончыкта.

¹⁶ Тудо шкетынак веле колыдымо, лишемаш лийдыме волгыдышто ила, Тудым ик айдемат ужын огыл да ужын ок керт. Тудлан чап да курымашлык вий-куат. Аминь.

¹⁷ Шкеныштым кӱшкӧ ынышт шынде да пытышаш поянлыклан огыл, а мыланна куанен илаш чылажымат лыҥ пуышо илыше Юмылан ӱшаным пыштышт манын, кызытсе курымысо поян-влаклан кӱштӧ.

¹⁸ Тек нуно порым ыштат, нунын поянлыкышт порым ыштымышт лийже, вес еҥлан тӱрлын полшаш эре кумылан лийышт.

¹⁹ Тидын дене нуно шкаланышт чын поянлыкым погат, тидыже ончыкылыкыштлан пеҥгыде негыз лиеш, да курымашлык илышыш шуын кертыт.

²⁰ О, Тимофей! Тылат ӱшанен пуымым арале, йӧрдымӧ яра мутланымаш деч да шинчымаш манын мом йоҥылыш лӱмдат, тудын торешланымыже деч кораҥ.

²¹ Южышт тудын велке савырненыт да Христослан ӱшаныме корно гыч кораҥыныт. Тый денет Юмын порылыкшо лийже. Аминь.