1 Тим 5 - У Сугынь

5 ГЛАВА 1 – 6:2 Ӱшаныше-влакын тӱрлӧ тӱшкашт дене шкем кузе кучаш.

¹ Шоҥгыеҥым ит шылтале, но ачам туныктымыла пагален туныкто, а самырык пӧръеҥ-влакым – иза-шольым туныктымо семын.

² Илалше ӱдырамаш-влакым авам туныктымыла пагален туныкто, самырык ӱдырамаш-влакым – ака-шӱжарым туныктымо семын, койышет чыла шотыштат ару лийже.

³ Чынжымак шкет кодшо тулык вате-влакым пагале.

⁴ А иктаж тулык ватын йочаж але уныкаж-влак улыт гын, тек ондак шке ешыштым пагалаш да ача-аваштлан поро дене пӧртылташ тунемыт, тидыже Юмын ончылно сай.

⁵ Чынжымак родо-тукымжо деч посна кодшо тулык ӱдырамаш ӱшанжым Юмылан пышта да, полышым йодын, Тудлан йӱдшӧ-кечыже кумалеш.

⁶ А шке шержым темаш йӧратыше илышынек колен.

⁷ Еҥ-влакын шылталаш амалышт ынже лий манын, чыла тидымак ышташ кӱштӧ.

⁸ А кӧ родо-тукымжо да поснак шке ешыже верч ок тырше гын, тудо ӱшанымаш деч кораҥын да ӱшаныдыме еҥ дечат ударак лийын.

⁹ Кудло деч шагал огыл ийыш шушо да ик гана веле марлан лекше тулык ӱдырамаш тек тулык вате радамыш пурталтеш.

¹⁰ Тудо поро пашаж дене палыме лийшаш: йоча-влакым ончен-куштен, корныеҥ-влакым ончен, святой-влакын йолыштым мушкын, нелылыкыш логалшылан полшен да тӱрлӧ поро пашам ыштен шоген.

¹¹ Самырык тулык вате-шамычым тыгай радамыш ит пурто. Кунам нуно шкеныштым куштылгын кучаш тӱҥалыт, Христос деч торлат да марлан лекнешт,

¹² ӱшанле лияш мутым пуэныт гынат, тудым пудыртат да титаканыш лукталтыт.

¹³ Тыгодымак нуно йолагайланаш, пӧрт еда кошташ тунемыт, да йолагайланаш гына огыл, а утым ойлен кошташ, кӱлеш-оккӱлым пален налаш тыршат да оккӱлым ойлыштыт.

¹⁴ Сандене самырык тулык вате-влак марлан лектышт, йочам ыштышт, сурт сомылкам чумыркалышт манын тыланем, осалым ойлаш тушманлан нимогай амалым ынышт пу.

¹⁵ Вет южышт ынде чын корно гыч кораҥыныт да сатана почеш каеныт.

¹⁶ Ӱшаныше иктаж пӧръеҥын але ӱдырамашын лишыл родыжо-влак коклаште тулык вате уло гын, тудлан полшыжо, чынжымак шкет кодшо тулык ватылан Черке полшен кертше манын, тиде нелылык Черке ӱмбаке ынже воч.

¹⁷ Черкым моштен вуйлатыше пресвитер-влакым, Юмын шомакым каласкалыше да тыршен туныктышо-влакым, поснак пагалаш кӱлеш.

¹⁸ Возымаште ойлалтеш: «Пырчым шийше ӱшкыжын умшажым ит петыре», тыгак: «Пашаеҥ шке пашадаржым сулен налеш».

¹⁹ Кок але кум таныклыше деч посна пресвитерым титаклымым ит колышт.

²⁰ Молат лӱдышт манын, языкым ыштен шогышо-влакым чылаштын ончылно шылтале.

²¹ Юмо ончылно, Господь Иисус Христос ончылно да ойырен налме Суксо-влак ончылно мый тыланет нине каҥашем шукташ пеҥгыдын кӱштем. Пашам шымлымешке, чыла раш манын, ончылгоч ит шоно, иктаж-кӧн велке ит лий.

²² Нигӧ дене кид пыштымым шукташ ит вашке, еҥ-влакын языкыштышт тыйын ужашет ынже лий. Шкендын арулыкетым арале.

²³ Ончыкыжым вӱдым веле огыл йӱ, а пагаретлан да чӱчкыдын черле лийметлан кӧра йошкар аракамат изиш кучылт.

²⁴ Южо еҥын языкше раш коеш да судитлымашке вик конда, а южыштын вара почылтеш.

²⁵ Тыгак поро пашат раш коеш, а кудыжо ок кой гын, шылын кодын ок керт.