1 Тим 4 - У Сугынь

4 ГЛАВА 1-16 Ӱшаныше-влакын вуйлатышышт шкеныштым кузе кучышаш улыт.

¹ Шӱлыш раш ойла: ондалыше шӱлыш-влакым да ия-влакын туныктымыштым колыштын, пытартыш жапыште южышт Христослан ӱшаныме деч кораҥыт.

² Тыгай туныктымаш йӱлен пытыше совестян да сайла кояш тӧчышӧ шояче-влак гоч толеш.

³ Нуно ӱдырым налаш але марлан лекташ чарат да, мом Юмо ӱшаныше да чыным пален налше-влаклан тауштен кочкашышт ыштен, тудым кочкаш чарат.

⁴ Юмын ыштыме чылажат сай, тауштен налме гын, нимо шӱкалме лийшаш огыл,

⁵ тудым Юмын шомак да кумалме святитлат.

⁶ Тидым иза-шольо-влаклан эре ушештарен шогет гын, Иисус Христосын сай служитлышыже лият, ӱшанымаш шомак тыйым пукша, сай туныктымым шуктен шогет, да тудо тыйым пеҥгыдемда.

⁷ А йӧрдымӧ да шонен лукмо тӱрлӧ ойлыштмаш деч кораҥ, Юмым пагалымаште шкендым вияҥде.

⁸ Капым вияҥдымаш шагал пайдам пуа, но Юмым пагалымаш чыла шотыштат пайдале, вет тудо кызытсе илышымат, ончыкылык илышымат сӧра.

⁹ Тиде мут чын да шӱмыш пышташ чыла шотыштат йӧра.

¹⁰ Вет ме илыше Юмылан ӱшаннам пыштенна, садлан пашам уло вийын ыштена да вурсымым чытена, Тудыжо – чыла айдемын, поснак ӱшаныше-влакын, Утарышышт.

¹¹ Тидым ышташ кӱштӧ да тидлан туныкто.

¹² Самырыкетлан кӧра тек тыйым шотлыдымо нигӧ ок лий. Мутланымаштат, шкем кучымаштат, йӧратымаштат, шӱлышыштат, ӱшанымаштат, арулыкыштат ӱшаныше-влаклан корным ончыкто.

¹³ Мыйын мийымешкем, еҥ-влаклан Возымашым лудмылан, каҥашымылан, туныктымылан шкендым пу.

¹⁴ Пресвитер-влакын тый денет кид пыштымым шуктымышт годым пророкла каласыме гоч Юмын тыланет пуымо моштымашым ит шӱкал.

¹⁵ Тыйын сеҥымашке шуметым чылан ужышт манын, чыла тиде верч тырше, тидлан уло виетым пыште.

¹⁶ Шкендымат, туныктыметымат шекланен шого. Чыла тидым пеҥгыдын кучо, вет тыге ыштымет дене тый шкендымат, колыштшо-влакетымат утарет.